ސަރވިސް ޗާޖު ޑޮލަރުން ދިނުން ލާޒިމު ކުރަން ގާނޫނަށް އިސްލާހެއް
ވަޒީފާއާ ބެހޭ ގާނޫނަށް އިސްލާހު ހުށަހެޅުއްވީ ކެންދޫ ދާއިރާގެ މެންބަރު މައުރޫފު ޒާކިރު
ރިސޯޓެއްގެ މުވައްޒަފަކު ފަތުރުވެރިންނަށް ޚިދުމަތް ދެނީ
ސަރވިސް ޗާޖުގެ ގޮތުގައި ލިބޭ ޑޮލަރު، ރުފިޔާ އަށް މާރުކޮށްގެން ދިނުން ހުއްޓުވުމަށާއި ސަރވިސް ޗާޖު ނުލިބޭ ގޮތަށް ފަތުރުވެރިންނަށް ސީދާ ޚިދުމަތް ދިނުމުގައި ދާއިމީ ކޮށް ހަރަކާތްތެރިވާ މުވައްޒަފުންނަށް ވެސް ސަރވިސް ޗާޖު ދޭން ޖެހޭ ގޮތަށް ގާނޫނަށް އިސްލާހު ހުށަހަޅައިފި އެވެ.
ވަޒީފާއާ ބެހޭ ގާނޫނަށް މި އިސްލާހު ހުށަހެޅުއްވީ ރައްޔިތުންގެ މަޖިލީހުގެ ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު އެވެ.
މެންބަރު ވިދާޅުވީ ފަތުރުވެރިކަމުގެ ސިނާއަތުގައި ހިންގާ ވިޔަފާރިތަކުން ފޯރުކޮށްދޭ ކޮންމެ ޚިދުމަތަކުން 10 އިންސައްތަ އަށްވުރެ މަދު ނޫން އަދަދަކުން ސަރވިސް ޗާޖު ނަގަންވާނެ ކަމަށެވެ. އަދި އެ ފައިސާ، ވަޒީފާދޭ ފަރާތުގެ ހުރިހާ މުވައްޒަފުންގެ މެދުގައި ހަމަހަމަ ކަމާއެކު ބަހަންވާނެ ކަމަށް ބަޔާން ކޮށްފަައި ވީނަމަވެސް ސަރވިސް ޗާޖުގެ ގޮތުގައި ނަގާ ފައިސާގެ ބާވަތުން ބެހުމުގެ ބަދަލުގައި އެ ފައިސާ މާރު ކޮށްގެން ބައެއް ތަންތަނުން މުވައްޒަފުންނަށް ދިވެހި ރުފިޔާ އިން ސަރވިސް ޗާޖު ދެމުންދާ ކަމަށެވެ.
އޭގެ ސަބަބުން ސަރވިސް ޗާޖުގެ ގޮތުގައި ނަގާ ފައިސާ، މުވައްޒަފުންގެ މެދުގައި ބެހުމަށް ލާޒިމް ކޮށް، ވަޒީފާއާ ބެހޭ ގާނޫނުގައި ކަނޑައަޅާފައިވާ އުސޫލުގެ މަންފާ އެންމެ ފުރިހަމައަށް މުވައްޒަފުންނަށް ލިބުމަށް ހުރަސް އެޅޭ ކަމަށް ވެސް މެންބަރު ވިދާޅުވި އެވެ.
އެހެންކަމުން މި ބިލު ހުށަހެޅުމުގެ މަގުސަދަކީ ފަތުރުވެރިކަމުގެ ސިނާއަތުގައި މަސައްކަތް ކުރާ މުވައްޒަފުންނަށް ގާނޫނުން ކަށަވަރު ކޮށްދީފައިވާ ސަރވިސް ޗާޖު ލިބުމުގެ ހައްގު އެންމެ ފުރިހަމަ އަށް ތަނަވަސް ކޮށްދިނުން ކަމަށް މައުރޫފް ވިދާޅުވި އެވެ.
މެންބަރު ހުށަހަޅުއްވާފައި ވަނީ ވަޒީފާއާ ބެހޭ ގާނޫނުގެ 52 ވަނަ މާއްދާ (ށ)ގެ ދެވަނަ ނަންބަރުގެ ފަހަތަށް ދެ އަކުރު އިތުރު ކުރުމަށެވެ.
އިސްލާހުގައި ބުނީ ސަރވިސް ޗާޖުގެ ގޮތުގައި ނަގާ ފައިސާގެ ތެރެއިން، މުވައްޒަފުންނަށް ބަހަންޖެހޭ ފައިސާގެ ބާވަތް ބަދަލުކުރުމުގެ ގޮތުން ވަޒީފާދޭ ފަރާތުން އެ ފައިސާ ދިވެހި ރުފިޔާއަށް މާރުކޮށްގެން ނުވާނެ ކަމަށެވެ. އަދި އެ ފައިސާ ދޭން ވާނީ ސަރވިސް ޗާޖުގެ ގޮތުގައި ފައިސާ ލިބުނު ބާވަތުން ކަމަށް ވެސް އިސްލާހުގައި ވެއެވެ.
ފަތުރުވެރިކަމުގެ ސިނާއަތުގައި ހިންގާ ވިޔަފާރިތަކުން ޚިދުމަތް ފޯރުކޮށްދިނުމުގައި މަސައްކަތްކުރާ މުވައްޒަފަކު ވަޒީފާ އަދާކުރަނީ ވަގުތީ އެއްބަސްވުމެއް ނުވަތަ ތިންވަނަ ފަރާތެއްގެ މުވައްޒަފެއްގެ ގޮތުގައި ވިޔަސް އެފަދަ މުވައްޒަފުންނަށް ވެސް ސަރވިސް ޗާޖު ދިނުމުގައި ތަފާތުކޮށްގެން ނުވާނެ ކަމަށް ވެސް މެންބަރު މައުރޫފް ހުށަހެޅުއްވި އިސްލާހުގައި ވެއެވެ.
