އަހަރުގެ ފުރަތަމަ ހަފުތާގައި އެންމެ ގިނައިން ފަތުރުވެރިން އައިސްފައިވަނީ ޔޫރަޕުން
2026 ވަނަ އަހަރުގެ ފުރަތަމަ ހަފްތާގައި ރާއްޖެއަށް 43,481 ފަތުރުވެރިން ޒިޔާރަތްކޮށްފައިވާއިރު މިއީ ކުރީ އަހަރާ އަޅާބަލާއިރު 14.6 އިންސައްތައިގެ ކުރިއެރުމެއް. އެންމެ ގިނައިން ފަތުރުވެރިން އައީ ރަޝިޔާ އިން ކަމަށްވާއިރު ދެވަނައަށް އިޓަލީން ފަތުރުވެރިން އައިސްފައިވޭ. 69 އިންސައްތަ ފަތުރުވެރިން ރިސޯޓުތަކުގައި މަޑުކޮށްފައިވާއިރު 25 އިންސައްތަ ފަތުރުވެރިން ގެސްޓްހައުސްތަކުގައި ތިބި ކަމަށް ތަފާސް ހިސާބުތައް ދައްކާ.
ރާއްޖެ އަށް ޒިޔާރަތްކުރި ރަޝިޔާގެ ދެ ފަތުރުވެރިން އެއަރޓެކްސީ އިން ފައިބައިގެން ރިސޯޓަށް ދިއުމަށް ލޯންޗުގައި މަޑުކޮށްލައިގެން | ގެޓީ އިމޭޖަސް
މި އަހަރުގެ ފުރަތަމަ ހަފުތާގައި އެންމެ ގިނައިން ފަތުރުވެރިން އައިސްފައި ވަނީ ޔޫރަޕުން ކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފި އެވެ.
ޖެނުއަރީ 7 ވަނަ ދުވަހު އާންމުކުރި ފަތުރުވެރިކަމާ ބެހޭ އެންމެ ފަހުގެ ތަފާސްހިސާބުތައް ދައްކާ ގޮތުގައި، 2026 ވަނަ އަހަރުގެ ފުރަތަމަ ހަފުތާގައި ރާއްޖެއަށް ޒިޔާރަތްކުރި ފަތުރުވެރިންގެ އަދަދު ވަނީ އޭގެ ކުރީ އަހަރުގެ އެ މުއްދަތާ އަޅާބަލާއިރު ބޮޑުތަނުން އިތުރުވެފަ އެވެ.
މި އަހަރުގެ ޖެނުއަރީ 6 ވަނަ ދުވަހުގެ ނިޔަލަށް ރާއްޖެއަށް ޖުމްލަ 43,481 ފަތުރުވެރިން ޒިޔާރަތްކޮށްފައިވާއިރު، 2025 ވަނަ އަހަރުގެ މި މުއްދަތުގައި ރާއްޖެއަށް އައީ 37,928 ފަތުރުވެރިންނެވެ. މިއީ 14.6 އިންސައްތައިގެ ކުރިއެރުމެކެވެ.
ޖެނުއަރީ މަހުގެ ފުރަތަމަ ހަ ދުވަހު ދުވާލަކު އެވްރެޖްކޮށް 7,200 އަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވެ އެވެ. އެންމެ ގިނަ ފަތުރުވެރިން އައިސްފައި ވަނީ އާ އަހަރުގެ ބަންދު ދުވަސްވަރުގައެވެ. އޭގެ ފަހުން، ފަތުރުވެރިން އަންނަ މިންވަރު ކުޑަކޮށް ދަށަށް ގޮސްފައިވާކަން ފާހަގަ ކުރެވެ އެވެ.
2026 ވަނަ އަހަރުގެ ފުރަތަމަ ހަފުތާގައި އެންމެ ގިނައިން ފަތުރުވެރިން އައިސްފައިވަނީ ޔޫރަޕްގެ ގައުމުތަކުންނެވެ. އެގޮތުން ޖުމްލަ ފަތުރުވެރިންގެ 21 އިންސައްތައާއެކު އެންމެ ކުރީގައި އުޅެނީ ރަޝިޔާ އެވެ. ދެވަނަ އަށް އެންމެ ގިނަ ފަތުރުވެރިން އައީ އިޓަލީންނެވެ. އެއީ 16.2 އިންސައްތަ އެވެ. މީގެ އިތުރުން އިނގިރޭސިވިލާތް، ޖަރުމަނުވިލާތް އަދި އެމެރިކާއަކީ ވެސް އެންމެ ގިނައިން ފަތުރުވެރިން އަންނަ ގައުމުތަކުގެ ތެރޭގައި ހިމެނޭ ގައުމުތަކެވެ.
ފަތުރުވެރިން ތިބުމަށް އެންމެ ގިނައިން އިޚްތިޔާރުކުރަނީ ރިސޯޓުތަކެވެ. އެގޮތުން 69 އިންސައްތަ ފަތުރުވެރިން ރިސޯޓުތަކުގައި މަޑުކޮށްފައިވާއިރު، 25 އިންސައްތައަށްވުރެ ގިނަ ފަތުރުވެރިން ތިބީ ގެސްޓްހައުސްތަކުގަ އެވެ. ބާކީ ބައި ހިއްސާކުރަނީ ހޮޓާތަކާއި ސަފާރީ އުޅަނދުތަކެވެ.
ޖެނުއަރީ 6 ވަނަ ދުވަހާ ހަމައަށް ރާއްޖޭގެ ރިސޯޓުތަކާއި، ގެސްޓްހައުސްތަކާއި، ހޮޓާ އަދި ސަފާރީތައް ހިމެނޭހެން ޖުމްލަ 67,600 އަށްވުރެ ގިނަ އެނދު ބޭނުން ކުރެވޭ ކަމަށް ތަފާސް ހިސާބުން ހާމަވެއެވެ.
ރާއްޖޭގެ އިގުތިސާދު ފަތުވެރިކަމުގެ މައްޗަށް ބިނާވެފަައި އޮތް އިރު 2025 ވަނަ އަހަރު ރާއްޖެ އަށް، 2.24 މިލިއަނަށްވުރެ ގިނަ ފަތުރުވެރިން ޒިޔާރަތްކުރި އެވެ.
