60 ށް ވުރެ ގިނަ ފަހަރު ޗުއްޓީ ހޭދަ ކުރަން އައި އިނގިރޭސި ދެމަފިރިން ރާއްޖޭގައި ޑައިވް ކުރަން އުޅުމުގެ ތެރޭގައި ހިނގި ހާދިސާއެއް ގައި މަރުވެއްޖެ

60 ށް ވުރެ ގިނަ ފަހަރު ޗުއްޓީ ހޭދަ ކުރަން ރާއްޖެ އަށް ޒިޔާރަތް ކޮށްފައިވާ އިނގިރޭސި ދެމަފިރިން ރާއްޖޭ ގައި ޑައިވް ކުރަން އުޅުމުގެ ތެރޭގައި ހިނގި ހާދިސާއެއް ގައި މަރުވެއްޖެ އެވެ.

އިނގިރޭސިވިލާތުގެ ޑެއިލީ މެއިލް އިން ރިޕޯޓު ކޮށްފައިވާ ގޮތުގައި މިދިޔަ ޑިސެމްބަރު މަހުގެ 19 ވަނަ ދުވަހު، އުމުރުން 70 އަހަރުގެ އިލެއިން ރިޗްމަންޑް މަރުވީ އދ. އެއްލައިދޫ ކައިރީގައި ޑައިވް ކުރަން އުޅުމުގެ ތެރޭގަ އެވެ. އޭނާގެ ފިރިމީހާ، އުމުރުން 71 އަހަރުގެ މެލްކަމް ރިޗްމަންޑް މަރުވީ އޭގެ ތިން ދުވަސް ފަހުން، ޑިސެމްބަރު މަހުގެ 22 ވަނަ ދުވަހު ހޮސްޕިޓަލުގައި ފަރުވާދެމުން ދަނިކޮށެވެ.

މި ހާދިސާ ހިނގަން މެދުވެރިވި ސީދާ ސަބަބު އަދި ސާފުވެފައި ނުވާއިރު، މިކަމާ ގުޅޭ އިތުރު ތަފްސީލުތައް އަދި ވަނީ ލިބޭގޮތް ނުވެފައި ކަމަށް ޑެއިލީ މެއިލް ގައިވެ އެވެ.

މި ދެމަފިރިންނަކީ "މޯލްޑިވްސް ހޮލިޑޭމޭކާސް" ނަމަކަށް ކިޔާ ގްރޫޕުގެ މެންބަރުންގެ މެދުގައި މަގުބޫލު، އެއްލައިދޫ ރިސޯޓަށް ގަވާއިދުން ޒިޔާރަތްކުރާ ދެމަފިރިން ކަމަށްވެ އެވެ. އެމީހުން ވަނީ މިހާތަނަށް 60 އަށް ވުރެ ގިނަ ފަހަރު އެ ރިސޯޓަށް ޒިޔާރަތްކޮށްފައި ކަމަށް ރިޕޯޓު ކޮށްފައިވެ އެވެ. އަދި ވޭތުވެދިޔަ 17 އަހަރުގެ ކްރިސްމަސް ބަންދުގައި މެދުކެނޑުމެއް ނެތި އެމީހުން ހޭދަކޮށްފައި ވަނީ ވެސް އެ ރިސޯޓުގަ އެވެ.

ފޭސްބުކް ގްރޫޕެއް ކަމަށްވާ "މޯލްޑިވްސް ހޮލިޑޭމޭކާސް" ގައި އެމީހުންނަށް ތައުޒިޔާ ކިޔަމުން ބުނެފައި ވަނީ، އެ ގްރޫޕުގެ އެންމެ ގާތް ދެ މެންބަރުން ކަމަށްވާ އިލެއިން އާއި މެލްކަމް ރިޗްމަންޑް، ކްރިސްމަސް ބަންދުގެ ތެރޭގައި ރާއްޖޭގައި މަރުވި ޚަބަރު އަޑުއެހީ ވަރަށް ފުން ހިތާމަޔާއެކު ކަމަށެވެ.

މި ދެމަފިރިންގެ މަރުގެ މައްސަލަ ބަލައި، ހަގީގަތް ދެނެގަތުމަށްޓަކައި ޗެސްޓަފީލްޑް ކޮރޯނާސް ކޯޓުގައި ޖެނުއަރީ 30 ވަނަ ދުވަހު އަޑުއެހުމެއް ބޭއްވުމަށް ވަނީ ހަމަޖެހިފައެވެ.

މާލެ އާ ގާތްގަނޑަކަށް 42 ކިލޯމީޓަރު (26 މޭލު) ދުރުގައި އޮންނަ އެއްލައިދޫ އަކީ ފަތުރުވެރިންގެ މެދުގައި، ހާއްސަކޮށް ޑައިވް ކުރާ މީހުންގެ މެދުގައި ވަރަށް މަގުބޫލު ރިސޯޓެކެވެ.

މި ހާދިސާ އާ ބެހޭ ގޮތުން ރިސޯޓުގެ ފަރާތުން ވެސް އަދި ސަރުކާރުގެ ކަމާ ބެހޭ ފަރާތުން ވެސް އެއްޗެއް ބުނެފަ އެއް ނުވެ އެވެ.