2025 ވަނަ އަހަރު ނިމުނު އިރު ރާއްޖެ އަށް 2.2 މިލިއަނަށް ވުރެ ގިނަ ފަތުރުވެރިން ޒިޔާރަތް ކޮށްފި
2025 ވަނަ އަހަރު ރާއްޖެއަށް 2.2 މިލިއަނަށްވުރެ ގިނަ ފަތުރުވެރިން ޒިޔާރަތްކޮށްފައިވާއިރު މިއީ 2024 ވަނަ އަހަރާ އަޅާބަލާއިރު 8.7 އިންސައްތައިގެ ކުރިއެރުމެއް. އެންމެ ގިނަ ފަތުރުވެރިން ޒިޔާރަތްކުރީ ޑިސެމްބަރު މަހު 218,650 ފަތުރުވެރިން.
މިސް ވޯލްޑް 2000 ކޮންޓެސްޓް ގައި މިސް އިންޑިއާ، ޕްރިޔަންކާ ޗޯޕްރާ ރާއްޖޭގެ ރިސޯޓެއްގައި
2025 ވަނަ އަހަރު ރާއްޖެ އަށް 2.2 މިލިއަނަށް ވުރެ ގިނަ ފަތުރުވެރިން ޒިޔާރަތް ކޮށްފި އެވެ.
ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކާ ގޮތުގައި ހުސްވި އަހަރު ރާއްޖެ އަށް ޒިޔާރަތް ކުރި ޖުމްލަ ފަތުރުވެރިންގެ އަދަދަކީ 2,240,711 އެވެ. މިއީ 2024 ވަނަ އަހަރު ޒިޔާރަތްކުރި 2,046,615 ފަތުރުވެރިންނާ އަޅާބަލާއިރު 8.7 އިންސައްތައިގެ ކުރިއެރުމެކެވެ.
އަހަރުގެ އެންމެ ގިނަ ފަތުރުވެރިން ޒިޔާރަތްކުރި މަހަކަށް ވެފައިވަނީ ޑިސެމްބަރު މަހެވެ. އެ މަހު 218,650 ފަތުރުވެރިން ރާއްޖެ އައިސްފައިވެ އެވެ. ދެން އެންމެ ގިނައިން ފަތުރުވެރިން ޒިޔާރަތްކުރި މަސްތަކަކީ ޖެނުއަރީ (214,863 ފަތުރުވެރިން) އަދި ފެބުރުއަރީ (214,091 ފަތުރުވެރިން) މަހެވެ.
މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓުން އާންމުކުރި ތަފާސްހިސާބުތަކަށް ބަލާއިރު، ޑިސެމްބަރު މަހުގެ އެންމެ ގިނަ ފަތުރުވެރިން ޒިޔާރަތްކުރީ ޑިސެމްބަރު 21 ވަނަ ދުވަހުއެވެ. އެ ދުވަހު އެކަނިވެސް 9,613 ފަތުރުވެރިން ރާއްޖެ އަށް އެތެރެވި އެވެ.
ބައިނަލްއަގުވާމީ މާކެޓުތަކަށް ބަލާއިރު، ރާއްޖެ އަށް އެންމެ ގިނައިން ފަތުރުވެރިން އައީ ޗައިނާއިންނެވެ. އެއީ 329,827 ފަތުރުވެރިން (14.7 އިންސައްތަ) އެވެ. ދެވަނަ އަށް އެންމެ ގިނަ ފަތުރުވެރިން އައި ރަޝިޔާ އިން 277,391 ފަތުރުވެރިން (12.4 އިންސައްތަ) ޒިޔާރަތްކުރިއިރު، ތިން ވަނަ އަށް އެންމެ ގިނަ ފަތުރުވެރިން އައީ އިނގިރޭސިވިލާތުންނެވެ. އެއީ 201,197 ފަތުރުވެރިން (9 އިންސައްތަ) އެވެ. މީގެ އިތުރުން ޖަރުމަނުވިލާތް، އިޓަލީ، އިންޑިއާ، އެމެރިކާ، ފްރާންސް، ސްޕެއިން އަދި ސްވިޒަލޭންޑަކީ ވެސް ފާހަގަކޮށްލެވޭ މުހިންމު މާކެޓުތަކެވެ.
ފަތުރުވެރިން ޗުއްޓީ ހޭދަ ކުރަން ބޭނުންކުރި ވަސީލަތްތަކަށް ބަލާއިރު، އެންމެ ބޮޑު ހިއްސާ އެއް އޮތީ ރިސޯޓުތަކުގައެވެ. އެއީ ޖުމްލަ އެނދުގެ 66 އިންސައްތަ އެވެ. މީގެ އިތުރުން ގެސްޓްހައުސްތަކުގައި 25 އިންސައްތަ، ސަފާރީ އުޅަނދުފަހަރުގައި 5 އިންސައްތަ އަދި ހޮޓާތަކުގައި 4 އިންސައްތަ އެނދު ހިއްސާކުރި އެވެ.
