ކަނޑައެޅިފައިވާ ނިޒާމުގެ ތެރެއިން ސަރވިސްޗާޖުގެ މައުލޫމާތު ހުށަހެޅުމަށް ލޭބަރ ރިލޭޝަންސް އޮތޯރިޓީން އަންގައިފިއެވެ.

އެ އޮތޯރިޓީން ބުނީ ވަޒީފާއާބެހޭ ގާނޫނުގެ 52 ވަނަ މާއްދާއާއި ސަރވިސްޗާޖާބެހޭ ގަވާއިދުގައި، ވަޒީފާދޭ ފަރާތަށް ސަރވިސްޗާޖުގެ ގޮތުގައި ކޮންމެ މަހަކަށް ލިބުނު އާމްދަނީގެ ތަފްސީލާއި، އެ މަހަކު ސަރވިސްޗާޖް ލިބުނު މުވައްޒަފުންގެ އަދަދާއި، ސަރވިސްޗާޖުގެ ގޮތުގައި ކޮންމެ މުވައްޒަފަކަށް ހައްގުވާ މިންވަރާއި، ސަރވިސްޗާޖުގެ ގޮތުގައި ދިން ފައިސާގެ އަދަދުގެ މައުލޫމާތު ބަލަހައްޓަންވާނެ ކަމަށާއި، އެ މައުލޫމާތު ގަވާއިދުން ލޭބަރ ރިލޭޝަންސް އޮތޯރިޓީއަށާއި މޯލްޑިވްސް އިންލަންޑް ރެވެނިއު އޮތޯރިޓީއަށް ހުށަހަޅަންވާނެކަމަށް ބަޔާންކޮށްފައިވާ ކަމަށެވެ.

ވަޒީފާއާބެހޭ ގާނޫނުގައި ބަޔާންކުރާ ގޮތުގެމަތިން، ވަޒީފާދޭ ފަރާތްތަކުގެ ތެރެއިން ޚިދުމަތްތަކުން ސަރވިސްޗާޖު ނަގާ ފަރާތްތަކުން އެލް.އާރް.އޭއާއި މީރާއަށް ހުށަހަޅަންޖެހޭ ސަރވިސްޗާޖުގެ މައުލޫމާތު ފަސޭހައިން ހުށަހެޅޭނެ ނިޒާމެއް ގާއިމުކުރުމަށްޓަކައި، މީރާގެ އޮންލައިން ޓެކްސްޕޭޔަރ ސަރވިސް "މީރާކަނެކްޓް" މެދުވެރިކޮށް އެ މައުލޫމާތު ފޮނުވޭނެ އިންތިޒާމު ވަނީ ހަމަޖެއްސިފައިކަމަށް ލޭބަރ ރިލޭޝަންސް އޮތޯރިޓީން ބުނެއެވެ. އަދި މިގޮތަށް މައުލޫމާތު ހުށަހެޅުމުން، ސަރވިސްޗާޖާބެހޭ ގަވާއިދުގެ 14 ވަނަ މާއްދާގައިވާ ގޮތުގެ މަތިން ލޭބަރ ރިލޭޝަންސް އޮތޯރިޓީއަށާއި މޯލްޑިވްސް އިންލަންޑް ރެވެނިއު އޮތޯރިޓީއަށް މަޢުލޫމާތު ހުށަހެޅުނީކަމުގައި ބެލޭނެ ކަމަށް އެއޮތޯރިޓީން ބުނެއެވެ.

އެހެންކަމުން ޚިދުމަތްތަކުން ސަރވިސްޗާޖް ނަގާ އެންމެހައި ފަރާތްތަކުން ސަރވިސްޗާޖުގެ މަޢުލޫމާތު ހުށަހެޅުމަށް "މީރާކަނެކްޓް"ގައި ރެޖިސްޓަރވެ، ކަނޑައެޅިފައިވާ ނިޒާމުގެ ތެރެއިން ސަރވިސްޗާޖުގެ މައުލޫމާތު ހުށަހެޅުމަށް އެ އޮތޯރިޓީން ވަނީ އަންގާފައެވެ.

ސަރވިސްޗާޖާ ބެހޭ ގަވާއިދު އެކުލަވާލައި އަމަލުކުރަން ފަށާފައިވަނީ 17 މާޗް 2021ގައެވެ. މި ގަވާއިދުގައި، ވިޔަފާރިތަކުން ސަރވިސްޗާޖް ނަގަންޖެހޭ ގޮތާއި، މުވައްޒަފުންގެ މެދުގައި ސަރވިސްޗާޖް ބެހުމުގައި އަމަލުކުރަންޖެހޭ ގޮތާއި، ވަޒީފާދޭ ފަރާތްތަކުން ސަރވިސްޗާޖްގެ މައުލޫމާތު ހުށަހެޅުމުގައި އަމަލުކުރަންޖެހޭ އުސޫލުތައް ވަނީ ކަނޑައަޅާފައެވެ. 

އެގޮތުން ޓޫރިސްޓް ރިޒޯޓުތަކާއި، ޓޫރިސްޓް ހޮޓާތަކާއި، ޓޫރިސްޓް ގެސްޓްހައުސްތަކާއި، ޓްރެއިނިންގ ރިޒޯޓްތަކާއި، ޓްރާންސިޓް ހޮޓާތަކާއި، ސިޓީ ހޮޓާތަކާއި، ޓޫރިސްޓް އުޅަނދުތަކާއި، ޔޮޓް ބަނދަރުތަކާއި، އިންޓަގްރޭޓަޑް ޓޫރިސްޓް ރިޒޯޓްތަކާއި، ޕްރައިވެޓް އައިލެންޑްތަކުން %10 އަށްވުރެ މަދުނޫން އަދަދަކުން ސަރވިސްޗާޖް ނަގަން ޖެހެއެވެ. އެހެންނަމަވެސް، އެފަދަ ތަންތަނުގައި މުދާ ވިއްކުމަށް ގާއިމުކޮށްފައިވާ ފިހާރަތަކުން ވިއްކާ މުދަލުން ސަރވިސްޗާޖް ނެގުން ލާޒިމެއްނޫނެވެ.

މީގެ އިތުރުން ސަރވިސްޗާޖް ނެގުން ލާޒިމުވާ ވިޔަފާރިތައް ފިޔަވައި އެހެން ވިޔަފާރިތަކުން ސަރވިސްޗާޖް ނަގާނަމަ އަމަލުކުރާނެގޮތް ވެސް ގަވާއިދުގައި ބަޔާންކޮށްފައިވެއެވެ.