މުވައްޒަފުން ފަސޭހައިން ވަޒީފާ އިން ވަކި ކުރެވޭ ގޮތަށް އެޗްޑީސީ ގެ އުސޫލުތައް ބަދަލު ކޮށްފި

ކުރިޔަށް އޮތް ލޯކަލް ކައުންސިލް އިންތިހާބާ ދިމާކޮށް މުވައްޒަފުންނަށް ބިރު ދެއްކުމަށް، ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން އެ ކުންފުނީގެ ރިޑަންޑެންސީ ޕޮލިސީ އަށް ބަދަލު ގެނެސް މުވައްޒަފުން ފަސޭހައިން ވަޒީފާ އިން ވަކިކުރެވޭ ގޮތް ހަދައިފި އެވެ.

މި ބަދަލުގެ ސަބަބުން އެ ކުންފުނީގެ މުވައްޒަފުންގެ ހިތްހަމަ ނުޖެހުން އިތުރުވެ، ވަޒީފާގެ ރައްކާތެރިކަން ގެއްލިދާނެ ކަމުގެ ކަންބޮޑުވުން ވަނީ އިތުރުވެފަ އެވެ.

އެޗްޑީސީ ގެ ބޯޑުން މި މަހުގެ 11 ދުވަހު ނެރުނު މެމޯ އެއްގައި ބުނީ ކުންފުނީގެ ރިޑަންޑެންސީ ޕޮލިސީގެ އެއް ވަނަ ނުކުތާގެ އެއް ވަނަ މާއްދާއަށް ބަދަލު ގެންނަން ބޯޑުން ނިންމާފައިވާ ކަމަށެވެ. އަދި އެ ނިންމުމާ އެއްގޮތަށް އަމަލު ކުރަން ފެށީ މި މަހުގެ އަށްވަނަ ދުވަހުން ފެށިގެން ކަމަށް އެ މެމޯގައި ބުނެފައިވެ އެވެ.

ބޯޑުން ގެނައި ބަދަލުގެ ދަށުން، މަސައްކަތްތައް ތަރުތީބު ކުރުމަށްޓަކައި ކުންފުނީގެ އޮޕަރޭޝަނަލް އޮނިގަނޑަށް ބަދަލު ގެންނަން ނިންމައިފި ނަމަ، އެކަމާ ގުޅިގެން މުވައްޒަފުން ވަޒީފާ އިން ވަކިކުރުމުގެ ބާރު ކުންފުންޏަށް ލިބިގެން ދެ އެވެ. މީގެ އިތުރުން، މުވައްޒަފަކު މަސައްކަތް ކުރަމުންދާ ޑިޕާޓްމެންޓެއް އުވައިލައިފި ނަމަ ނުވަތަ އުވައިލަން ނިންމައިފި ނަމަ، އެ ތަނެއްގައި މަސައްކަތް ކުރާ މުވައްޒަފުން ވަކިކުރުމުގެ ބާރު ވެސް ކުންފުންޏަށް ލިބެ އެވެ.

އާ ޕޮލިސީގެ ދަށުން، މުވައްޒަފަކު ވަޒީފާ އަށް ނަގާއިރު ވަކި މަސައްކަތެއް ކުރުމަށްޓަކައި އެ މީހެއްގެ ގައިގައި ހުންނަ ޝަރުތު އުނިވެއްޖެ ނަމަ، ނުވަތަ އުނިވެދާނެ ކަމަށް ފެންނަ ނަމަ ވެސް އެ މުވައްޒަފަކު ވަޒީފާ އިން ވަކިކުރުމުގެ ބާރު ކުންފުންޏަށް ލިބެ އެވެ. އަދި ކުންފުނި ހިންގުމަށް ގެންނަ ބަދަލާ ގުޅިގެން ވަކި މަސައްކަތަކީ ކުންފުންޏަށް ބޭނުންތެރި މަސައްކަތެއް ނޫން ކަމަށް ފެނިއްޖެ ހިނދެއްގައި ވެސް މުވައްޒަފުން ވަކިކުރެވިދާނެ އެވެ.

ގައުމުގެ އިގުތިސާދަށް ނުވަތަ ކުންފުނީގެ މާލީ ހާލަތަށް އަންނަ ހީނަރުކަމަކާ ގުޅިގެން ވެސް މުވައްޒަފުން ވަޒީފާ އިން ވަކިކުރުމުގެ ބާރު އުސޫލަށް ގެނައި ބަދަލުން އެޗްޑީސީ އަށް ލިބިގެން ދެ އެވެ.

އެޗްޑީސީ ގެ އުސޫލަށް މި ބަދަލުތައް ގެނައީ އެ ކުންފުނިން ކަނޑާލަން، ސަރުކާރުން ބޭނުންވާ ބައެއް މުވައްޒަފުން ވަަޒީފާ އިން ވަކިކުރުމުގެ މަގްސަދުގައި ކަމަށް ބައެއް ފަރާތްތަކުން ތުހުމަތު ކުރެ އެވެ. 

އެޗްޑީސީ ގެ ބައެއް މުވައްޒަފުން އަދި އިދިކޮޅު ފަރާތްތަކުން ވެސް ބުނަމުންދަނީ، މި ބަދަލު ގެނެސްފައި ވަނީ ކުރިއަށް އޮތް ލޯކަލް ކައުންސިލް އިންތިހާބާ ދިމާކޮށް މުވައްޒަފުންނަށް ބިރުދެއްކުމަށް ކަމަށެވެ. ލޯކަލް ކައުންސިލް އިންތިހާބު ކާމިޔާބު ކުރުމަށްޓަކާ ސަރުކާރުން ދަނީ އެކި ގޮތްގޮތުން ނުފޫޒު ފޯރުވާ ސާރުކާރު މުވައްޒަފުންނަށް ބިރު ދައްކަމުންނެވެ.