ޕުޓިންއާ މަޝްވަރާ ކުރެވޭ މިންވަރަށް ޙާލަތު ނުދޭ: އީޔޫ

ރަޝިޔާ އާއި ޔޫކްރެއިންއާ ދެމެދު ހިނގަމުން އަންނަ ހަނގުރާމަ ނިންމުމަށް ކުރަމުން އަންނަ މަސައްކަތުގައި، ރަޝިޔާގެ ރައީސް ވްލަޑިމިއަރ ޕުޓިންއާ މަޝްވަރާ ކުރެވޭ މިންވަރަށް ޙާލަތު ނުދާ ކަމަށް ޔޫރަޕިއަން ޔޫނިއަން (އީޔޫ) އިން ބުނެފި އެވެ. 

އީޔޫ އިން މިހެން ބުނެފައި މި ވަނީ، އަލުން ޕުޓިން އާއެކު މަޝްވަރާތައް ފަށަން ޖެހޭ ކަމަށް ފްރާންސް އާއި އިޓަލީގެ ލީޑަރުން ވިދާޅުވެފައިވަ ދަނޑިވަޅެއްގަ އެވެ. 

އީޔޫގެ ތަރުޖަމާނު ޕައުލާ ޕިންހޯ ވިދާޅުވީ، ކޮންމެ ވެސް ވަގުތެއްގައި ރަޝިޔާގެ ރައީސް ޕުޓިންއާ ވާހަކަތައް ދައްކަން ޖެހޭނެ ކަމަށާއި، އޭގެ ކުރިން އެ ދެމެދުގައި ވަރަށް ގިނަ މަސައްކަތްތައް ކުރަން ޖެހޭ ކަމަށެވެ. އެ މަސައްކަތްތައް ކުރަމުން އަންނަކަން ފާހަގަ ކުރައްވާ އޭނާ ވިދާޅުވީ، މަޝްވަރާ ތަކަށް ތައްޔާރަށް ހުންނެވި ކަމުގެ އެއްވެސް ނިޝާނެއް ޕުޓިންގެ ފަރާތުން ނުފެނުމަކީ ހިތާމަހުރި ކަމެއް ކަމަށެވެ. 

އެގޮތުން އެ މަޝްވަރާތައް ކުރެވޭނެ ހިސާބަށް ނުދެވިފައި ތިބި ކަމަށް އޭނާ ވިދާޅުވި އެވެ. އަދި ކޮންމެ ވެސް ވަގުތެއްގައި ޔޫކްރެއިންގެ މައްސަލައިގައި ސުލްޙަ ޤާއިމު ކުރުމަށް އެ ފަދަ ވާހަކަ ތަކެއް ދެއްކޭނެ ކަމަށް އުންމީދު ކުރައްވާ ކަމަށް ވެސް ޕިންހޯ ވިދާޅުވެފައިވެ އެވެ.

އިޓަލީގެ ބޮޑު ވަޒީރު ޖޯޖިއާ މެލޯނީ މިދިޔަ ހުކުރު ދުވަހު ވިދާޅުވެފައި ވަނީ، އީޔޫ އިން ރަޝިޔާ އާއެކު އެންމެ މަތީ ފެންވަރުގެ ވާހަކަތައް އަދި މަޝްވަރާތައް ފަށަން ޖެހިފައިވާ ވަގުތު އައިސްފައިވާ ކަމަށެވެ. އަދި ޔޫކްރެއިންގެ މައްސަލައިގައި ވާހަކަ ދައްކަވަން ޚާއްސަ މަންދޫބެއް، ނުވަތަ ސަފީރެއް ކަނޑައަޅުއްވަން ޖެހިފައިވާ ކަމަށް ވެސް އެކަމަނާ ވިދާޅުވި އެވެ. 

މެލޯނީ އެހެން ވިދާޅުވުމުގެ ކުރިން، މިދިޔަ އަހަރުގެ ޑިސެމްބަރު މަހުގެ ތެރޭގައި ފްރާންސްގެ ރައީސް އިމަނުއެލް މެކްރޮން ވެސް ވަނީ އެ ފަދަ ވާހަކައެއް ދައްކަވައިފަ އެވެ. އެގޮތުން ރަޝިޔާ އާއެކު ވާހަކަ ދެއްކުމަށް ޔޫރަޕުން ގޮތް ތަކެއް ހޯދައި، އުސޫލު ތަކެއް ކަނޑައަޅަން ޖެހޭ ކަމަށް އޭނާ ވަނީ ވިދާޅުވެފަ އެވެ.

ޔޫރަޕުގެ ބާރު ގަދަ ދެ ލީޑަރުން މި ވާހަކަ ދައްކަވާފައިވާއިރު، ރަޝިޔާ އާއި ޔޫކްރެއިންގެ ހަނގުރާމަ ނިންމުމަށް އެމެރިކާގެ ރައީސް ޑޮނަލްޑް ޓްރަމްޕް ވެސް ގެންދަވަނީ ގިނަ މަސައްކަތް ތަކެއް ކުރައްވަމުންނެވެ. އެކަމުގައި ޔޫރަޕުގެ ޤައުމު ތަކުން އެމީހުންގެ ނުފޫޒު ގަދަ ކުރުމަށް ބޭނުންވާ ކަމަށް ބައެއް ފަރާތްތަކުން ވަނީ ފާހަގަ ކޮށްފަ އެވެ. 

އެ މައްސަލައާ ގުޅޭ ގޮތުން އެމެރިކާގެ ރައީސް ޓްރަމްޕް އާއި، ރަޝިޔާގެ ރައީސް ޕުޓިން ވަނީ އެކި ފަހަރު މަތިން ވާހަކަ ދައްކަވައިފަ އެވެ. އަދި ރަޝިޔާ ސަރުކާރުގެ އިސްވެރިންނާއި، އެމެރިކާ ސަރުކާރުގެ އިސްވެރިން ވެސް ވަނީ އެކި ފަހަރު މަތިން ބައްދަލު ކުރައްވައި މަޝްވަރާ ކުރައްވައިފަ އެވެ.