އދ ގެ ސަލާމަތީ މަޖިލީހުގެ ކުއްލި ބައްދަލުވުމެއް ހޯމަ ދުވަހު

އދ ގެ ސަލާމަތީ މަޖިލީހުގެ ކުއްލި ބައްދަލުވުމެއް ހޯމަ ދުވަހު ބާއްވަން ނިންމާފައިވާ ކަމަށް، ރަސްމީ އޮފިޝަލުން ހާމަ ކޮށްފި އެވެ. 

ހޯމަ ދުވަހު އޮންނަ އދ ގެ ސަލާމަތީ މަޖިލީހުގެ ކުއްލި ބައްދަލުވުމަކީ، ރަޝިޔާ އިން ޔޫކްރެއިން އަށް ދިން ހަމަލާ ތަކުގެ ސަބަބުން ބާއްވާ ބައްދަލުވުމެއް ކަމަށް ބުނެފައިވެ އެވެ. އެގޮތުން ރަޝިޔާ އިން ޔޫކްރެއިންގެ ވެރި ރަށް ކީވް އަށް ދިން ހަމަލާ ތަކުގެ ސަބަބުން، ފިނު މޫސުގެ ދުވަސް ވަރުގައި ވެސް ޔޫކްރެއިންގެ ރައްޔިތުންނަށް ހީޓިން ނުލިބި، އެތައް ދަތިތަކާ ކުރިމަތިލާން ޖެހިފައިވާ ކަމަށް ފާހަގަ ކޮށްފައިވެ އެވެ. 

ސާލަމަތީ މަޖިލީހުގެ ޝެޑިއުލް އަށް ބަދަލު ގެނައުމަށް ފަހު، ހުކުރު ދުވަހުގެ ރޭ ވަނީ އާންމު ކޮށްފަ އެވެ. އެ ބައްދަލުވުމުގައި ރަޝިޔާ އިން ޔޫކްރެއިންގެ އާންމު ރައްޔިތުންނާއި، އާންމު ރައްޔިތުން ބޭނުން ކުރާ އިމާރާތް ތަކަށް ދެމުން އަންނަ ހަމަލާ ތަކާ ގުޅޭ ގޮތުން ވެސް މަޝްވަރާ ކުރާނެ ކަމަށް ވަނީ ބެލެވިފަ އެވެ. 

ޔޫކްރެއިންގެ ސަފީރު އަންޑްރީ މެލްނިކް، ސެކިއުރިޓީ ކައުންސިލް އަށް ފޮނުވާފައިފާ ސިޓީގައި ވަނީ، ރަޝިޔާ އިން ހިންގަމުން އަންނަ އަމަލުތަކާއި، ދެމުން އަންނަ ހަމަލާތައް ވަރަށް ބޮޑަށް ކުށްވެރި ކޮށްފަ އެވެ. އޭއެފްޕީ އަށް ސިޓީ ލިބިފައިވާއިރު، ސަފީރު ވިދާޅުވެފައި ވަނީ ރަޝިޔާ އިން ޔޫކްރެއިންގެ އާންމު ރައްޔިތުންނާއި، ރައްޔިތުންގެ އިމާރާތްތަކަށް ދެމުން އަންނަ ހަމަލާ ތަކަކީ ހަނގުރާމައިގެ ކުށްތަކާއި، އިންސާނިއްޔަތާ ދެކޮޅު ކުށް ތަކުގެ ނުރައްކާތެރި އައު ފެށުމެއް ކަމަށް ބުނެފައިވެ އެވެ.

ރަޝިޔާ އިން ޔޫކްރެއިންގެ ވެރި ރަށް ކީވް އަށް ދިން ހަމަލާ ތަކުގެ ސަބަބުން، އެ ސަރަހައްްދުގައި ހީޓިން ލިބުމުގައި އެތައް ދަތި ތަކެއް ދިމާވެފައިވެ އެވެ. މިއީ ފިނު މޫސުމުގައި އާންމު ރައްޔިތުންނަށް ކުރިމަތި ވާނެ ވަރަށް ބޮޑު ދަތި ކަމެއް ކަމަށް ޔޫކްރެއިންގެ ސަރުކާރުން ވެސް ވަނީ ބުނެފަ އެވެ. 

ރަޝިޔާ އާއި ޔޫކްރެއިންއާ ދެމެދު ހިނގަމުން އަންނަ ހަނގުރާމައިގައި މީގެ ކުރިން ވެސް ވަނީ ސަލާމަތީ މަޖިލީހުގެ ގިނަ ބައްދަލުވުން ތަކެއް ބާއްވައިފަ އެވެ. އެތައް ޤަރާރެއް ހުށަހަޅާފައި ވީ ނަަމަވެސް، ރަޝިޔާ އަކީ ސަލާމަތީ މަޖިލީހުގެ ދާއިމީ މެމްބަރެއް ކަމުން ވީޓޯގެ ބާރު ބޭނުން ކޮށްގެން އެތައް ޤަރާރެއް ވަނީ ހުއްޓުވައިފަ އެވެ. އެކަމުގެ ސަބަބުން ޔޫކްރެއިންގެ މައްސަލައިގައި ބައިނަލްއަޤުވާމީ މުޖުތަމައު އަށް ވަރުގަދަ ފިޔަވަޅު ތަކެއް އެޅުމަށް ދަތިތަކާ ކުރިމަތިލާން ޖެހިފައިވެ އެވެ. 

ބައިނަލްއަގުވާމީ މުޖުތަމައު އިން ރަޝިޔާ އިން ޔޫކްރެއިން ގައި ހިންގަމުން އަންނަ ހަނގުރާމައިގެ ސަބަބުން އާންމު ރައްޔިތުންނަށް ކުރިމަތިވަމުން އަންނަ ދަތިތަކާ ގުޅިގެން ކަންބޮޑުވުން ފާޅުކޮށްފައިވެ އެވެ. އެތައް ގައުމު ތަކަކުން ރަޝިޔާ އަށް އިގުތިސާދީ ހުރަސްތައް އަޅާފައިވާއިރު، ޔޫކްރެއިން އަށް ހަތިޔާރާއި އިންސާނީ އެހީތެރިކަން ވެސް ފޯރުކޮށްދެމުން ގެންދެ އެވެ.