އީރާނަށް ދެވިދާނެ ހަމަލާތަކާ ގުޅޭ މައުލޫމާތު އެމެރިކާގެ ރައީސް ޑޮނަލްޑް ޓްރަމްޕަށް އަރުވައިފި

އީރާނާ ދެކޮޅަށް ބޭނުން ކުރެވިދާނެ އަސްކަރީ އަދި ސިއްރު އޮޕަރޭޝަންތަކާ ގުޅޭ މަޢުލޫމާތު، އެމެރިކާގެ ރައީސް ޑޮނަލްޑް ޓްރަމްޕަށް އަރުވައިފި ކަމަށް އެމެރިކާގެ ދިފާޢީ ވުޒާރާ (ޕެންޓަގަން) ގެ އޮފިޝަލުންނާ ހަވާލާދީ ސީ.ބީ.އެސް ނިއުސް އިން ރިޕޯޓްކޮށްފި އެވެ.

މި މަޢުލޫމާތު ހިއްސާކުރި މަޞްދަރުތަކުން ބުނާގޮތުގައި، އީރާނަށް ހަމަލާދިނުމުގައި ދުރުރާސްތާގެ މިސައިލް ބޭނުންކުރުމުގެ އިތުރުން، ސައިބަރ އޮޕަރޭޝަންތަކާއި ނަފްސާނީ ހަނގުރާމައިގެ އުކުޅުތައް ބޭނުންކުރުމުގެ އިޚްތިޔާރުތައް ވެސް ޕެންޓަގަންގެ އޮފިޝަލުން ވަނީ ރައީސް ޓްރަމްޕަށް ހުށަހަޅާފަ އެވެ.

އީރާނާ އެކު ވިޔަފާރީގެ ގުޅުން ބާއްވާ ޤައުމުތަކުން އެމެރިކާ އަށް އެތެރެކުރާ މުދަލުން 25 އިންސައްތައިގެ ޓެރިފެއް ނަގާނެކަން ޓްރަމްޕް ވަނީ ހޯމަ ދުވަހު އިޢުލާން ކުރައްވާފަ އެވެ.

އީރާނުގެ ޚާރިޖީ ވަޒީރު ވިދާޅުވި ގޮތުގައި، އެމެރިކާ އާއެކު މަޝްވަރާކުރުމަށް ތެހެރާން އޮތީ ތައްޔާރަށެވެ. ނަމަވެސް، ކުރިމަތިވެދާނެ ހަނގުރާމައަކަށް ވެސް އީރާނުން އޮތީ ފުރިހަމަ އަށް ތައްޔާރުވެގެން ކަމަށް އޭނާ ވިދާޅުވި އެވެ.

މި މައްސަލައިގައި އަޅާނެ ފިޔަވަޅުތަކާ ގުޅޭގޮތުން މަޝްވަރާ ކުރުމަށް ޓްރަމްޕްގެ ޤައުމީ ސަލާމަތާ ބެހޭ ޓީމުން އަންގާރަ ދުވަހު ވައިޓް ހައުސްގައި ބައްދަލުވުމެއް ބޭއްވުމަށް ވަނީ ހަމަޖެހިފަ އެވެ. އެހެންނަމަވެސް، މި ބައްދަލުވުމުގައި ރައީސް ޓްރަމްޕް ބައިވެރިވެ ވަޑައިގަންނަވާނެ ކަން އަދި ސާފެއް ނުވާ ކަމަށް ރިޕޯޓުތައް ބުނެ އެވެ.

އީރާނުގެ މުޒާހަރާތަކުގައި އިތުރު މީހުން މަރުވާ ނަމަ، އެމެރިކާގެ އަސްކަރިއްޔާ އިން "ވަރުގަދަ ފިޔަވަޅުތަކެއް" އެޅުމަށް ވިސްނަމުންދާ ކަމަށް ރައީސް ޓްރަމްޕް މީގެ ކުރިން ވަނީ ވިދާޅުވެފަ އެވެ. އަދި އީރާނުގެ ލީޑަރުން މަޝްވަރާ ކުރުމަށް އެދިވަޑައިގެންފައިވާ ކަމަށާއި، ނަމަވެސް ބައްދަލުވުމެއް ބޭއްވުމުގެ ކުރިން ފިޔަވަޅެއް އަޅަން ޖެހިދާނެ ކަމަށްވެސް ޓްރަމްޕް ފާހަގަކުރެއްވި އެވެ.

އީރާނުގެ ފައިސާގެ އަގު އިންތިހާ އަށް ވެއްޓުމާއި، ދަތިކުރުމުގެ ފިޔަވަޅުތަކުގެ ސަބަބުން ކުރިމަތިވެފައިވާ އިޤްތިޞާދީ މައްސަލަ ތަކުގެ ސަބަބުން ވިޔަފާރިވެރިން ފެށި އިހުތިޖާޖުތައް ފަހުން ވަނީ ބޮޑެތި ހަމަނުޖެހުންތަކަކަށް ބަދަލުވެފަ އެވެ.

ވައިޓް ހައުސްގެ ޕްރެސް ސެކްރެޓަރީ ކެރޮލީން ލީވްިޓް ވިދާޅުވި ގޮތުގައި، އީރާނުގެ އޮފިޝަލަކު ޓްރަމްޕްގެ ޚާއްޞަ މަންދޫބު ސްޓީވް ވިޓްކޮފްއާ މުޢާމަލާތް ކުރައްވާފައިވެ އެވެ. އަދި އީރާނުން އާންމުކޮށް ދައްކާ ވާހަކަތަކާއި، ސިއްރުން އެމެރިކާ ސަރުކާރަށް ފޮނުވާ މެސެޖުތަކާ ދެމެދު ބޮޑެތި ތަފާތުތަކެއް ހުރިކަން އޭނާ ފާހަގަކުރެއްވި އެވެ.

އެހެންނަމަވެސް، ރައީސް ޓްރަމްޕަށް ފެނިވަޑައިގަންނަވާ ހާލަތެއްގައި އަސްކަރީ ބާރުގެ ބޭނުންކުރުމަށް އެމަނިކުފާނު ފަސްޖެހިވަޑައިނުގަންނަވާނެ ކަމަށް ލީވްިޓް ވަނީ އިންޒާރު ދެއްވާފައެވެ.

މި މައްސަލައިގެ މަޢުލޫމާތު ހުރި އޮފިޝަލުން ބުނާ ގޮތުގައި، އެމެރިކާ އިން އަސްކަރީ ފިޔަވަޅެއް އަޅައިފިނަމަ ބޮޑަށް ބަލާނީ ވައިގެ މަގުން ހަމަލާދިނުމަށެވެ. މީގެ އިތުރުން އީރާނުގެ އަސްކަރީ ކޮމާންޑް ސިސްޓަމްތަކާއި މުވާޞަލާތީ ވިއުގަތަކަށް ބުރޫއަރުވާލުމުގެ ފިޔަވަޅުތަކެއް ވެސް ދަނީ ރޭވެމުންނެވެ.

މީގެ އިތުރުން، އީރާނުގައި ތިބި އެމެރިކާގެ ރައްޔިތުން އެ ޤައުމުން ފޭބުމަށް ނުވަތަ ސަރުކާރުގެ އެހީއަކާ ނުލައި އެ ޤައުމުން ނިކުމެވޭނެ އިންތިޒާމުތައް ހަމަޖެއްސުމަށް އެމެރިކާ ސަރުކާރުން ވަނީ އިލްތިމާސްކޮށްފަ އެވެ.