ރަޝިޔާގެ ތެޔޮ ރައްކާކުރާ ތަނަކަށް ޔޫކްރެއިނުން ޑްރޯނު ހަމަލާ އެއްދީ އެތަނުގައި ރޯކޮށްލައިފި

ރަޝިޔާގެ ދެކުނުގެ ވޮލްގޯގްރޭޑް ސަރަޙައްދުގެ އޮކްޓިއަބްރްސްކީ ޑިސްޓްރިކްޓުގައި ހުރި ތެޔޮ ގުދަނަކަށް ޔޫކްރެއިނުން ދިން ޑްރޯން ހަމަލާއެއްގެ ސަބަބުން އެތަނުގައި އަލިފާން ރޯވެފައިވާ ކަމަށް އެ ސަރަޙައްދުގެ ކަމާބެހޭ ފަރާތްތަކުން ހޮނިހިރު ދުވަހު ބުނެފި އެވެ.

ގަވަރުނަރު އަންދްރޭ ބޮޗަރޯވްގެ ރަސްމީ ޓެލެގްރާމް ޗެނަލްގައި ޝާއިޢުކޮށްފައިވާ ޚަބަރެއްގައިވާ ގޮތުން، މިހާތަނަށް މި ހާދިސާގައި އެއްވެސް މީހަކަށް ގެއްލުމެއް ލިބިފައިވާ ކަމުގެ ރިޕޯޓެއް ލިބިފައެއް ނުވެ އެވެ. ނަމަވެސް، އެ ސަރަޙައްދާ ކައިރީގައި ދިރިއުޅޭ މީހުން ރައްކާތެރި ހިސާބުތަކަށް ބަދަލުކުރަން ޖެހިދާނެ ކަމަށް އޭނާ ފާހަގަކުރެއްވި އެވެ.

ޔޫކްރެއިންގެ އަސްކަރިއްޔާއިން ހޮނިހިރު ދުވަހު ބުނި ގޮތުގައި، ރޭގަނޑުގެ ވަގުތެއްގައި އެގައުމުން ވަނީ 'ޒޫޓޯވްސްކާޔާ' ތެޔޮ ގުދަނަށް ހަމަލާދީފަ އެވެ.

ރަޝިޔާ އިން ކީވް އާ ދެކޮޅަށް ކުރަމުންދާ ހަނގުރާމަ އަށް ބޭނުންވާ މާލީ ވަސީލަތްތައް ހޯދުމަށް ހުރަސްއެޅުމުގެ މަގުސަދުގައި، ފާއިތުވި މަސްތަކުގައި ޔޫކްރެއިނުން ދަނީ ރަޝިޔާގެ ހަކަތައާ ބެހޭ އުމްރާނީ ވަސީލަތްތަކަށް އަމާޒުކޮށް ހަމަލާތައް ދެމުންނެވެ.

ރަޝިޔާގެ ދިފާއީ ވުޒާރާއިން ހޮނިހިރު ދުވަހު ބުނި ގޮތުގައި، އެ ދުވަހު އެގައުމުގެ ވައިގެ ދިފާއީ ނިޒާމުން ވަނީ ޔޫކްރެއިންގެ 67 ޑްރޯން ވައްޓާލާފައެވެ.