އެމްޑީޕީގެ މަގުބޫލުކަން ސަރުކާރަކަށް ހަޖަމެއް ނުވި, ޕީއެންސީން "މަރުފަލި" ޖަހަން ފަށައިފި
ލޯކަލް ކައުންސިލް އިންތިޚާބު ކައިރިވަމުން ދާއިރު, އިންތިޚާބު ކާމިޔާބު ކުރަން މަސައްކަތް ކުރުމުގެ ބަދަލުގައި, އިދިކޮޅު އެމްޑީޕީގެ އަގުވައްޓާލުމަށް ޕީއެންސީން ދަނީ މަސައްކަތް ކުރަމުން.
އެމްޑީޕީ އިން މީގެ ކުރިން ބޭއްވި ޙަރަކާތެއްގެ ތެރެއިން އެ ޕާޓީގެ ދިދަ ހިފައިގެން އާންމު މެމްބަރުން | ސޯޝަލް މީޑިއާ
ކުރިއަށް އޮތް ލޯކަލް ކައުންސިލް އިންތިޚާބުގެ ފޯރި ގަދަވަމުން އަންނައިރު, ރާއްޖޭގެ ސިޔާސީ މަޝްރަހު މިވަނީ ވަރަށް ބޮޑަށް ހޫނުވެފަ އެވެ. ޚާއްޞަކޮށް، އިދިކޮޅު އެމްޑީޕީގެ މަގުބޫލުކަން ރައްޔިތުންގެ މެދުގައި ދުވަހުން ދުވަހަށް އިތުރުވަމުންދާކަން ފާހަގަކުރެވެން ފެށުމާއެކު، ސަރުކާރު ހިންގާ ޕީއެންސީން ވަނީ އެމްޑީޕީގެ އަގުވައްޓާލުމަށް މަސައްކަތް ފަށާފަ އެވެ.
މި ދަނޑިވަޅުގައި ޕީއެންސީން ކުރަމުންދާ މަސައްކަތްތަކީ، އެ ޕާޓީގެ ސިޔާސީ ބާރު ކެނޑެމުންދާތީ، އެކަމުން ސަލާމަތްވުމަށްޓަކައި "މަރުފަލި" ޖެހުމެވެ. ރައްޔިތުންގެ ތާއީދު ގެއްލެމުންދާކަމުގެ ބިރުވެރިކަން އިހުސާސް ކުރެވެން ފެށުމުން، ހަޤީޤަތާއި ޚިލާފު ވާހަކަތައް ފެތުރުމަށް ޕީއެންސީން ވަނީ އަތުކުރި އޮޅާލާފަ އެވެ.
މިގޮތުން ޕީއެންސީން ދާދި ފަހުން އެމްޑީޕީ އާއި ދެކޮޅަށް މީސްމީޑިއާގެ ޕްލެޓްފޯމެއްގައި އާންމުކޮށްފައިވާ ޕޯސްޓެއްގައި ވަނީ، "ކައުންސިލްތަކަށް ހަޤީޤީ މާލީ ބާރުވެރިކަން ދިނީ ކޮން ސަރުކާރެއް؟" ތޯ ސުވާލު އުފައްދައި، އޮޅުވާލުންތަކުން ފުރިގެންވާ ވާހަކަތަކެއް ވަނީ ދައްކާފައެވެ. ޕީއެންސީން ބުނާ ގޮތުގައި، ކައުންސިލްތަކަށް މާލީ މިނިވަންކަން ހޯދައިދީ، ބަޖެޓް ގްރާންޓްތަކުގެ އެހީގައި ރަށްރަށުގައި ތަރައްޤީގެ ރަންޒަމާނެއް ފައްޓަވައިދެއްވީ ރައީސް މުޢިއްޒުގެ ސަރުކާރުންނެވެ. އަދި އެމްޑީޕީގެ ދައުރުގައި ކައުންސިލްތައް އޮތީ ބާރުވެރިކަމެއް ނެތި ހުއްޓިފައި ކަމަށްވެސް އެ ޕާޓީން ވަނީ ތުހުމަތުކޮށްފަ އެވެ.
ނަމަވެސް، ޕީއެންސީން ދެއްކި މި ވާހަކަތައް މިހާރު ވަނީ އަމިއްލަ އަތަށް ގޮވާފަ އެވެ. ރާއްޖޭގެ ލާމަރުކަޒީ ނިޒާމުގެ ބާނީއަކީ އެމްޑީޕީ ކަމަށްވާއިރު، ކައުންސިލްތަކަށް ޤާނޫނީ ބާރުވެރިކަމާއި، މާލީ މިނިވަންކަން ހޯދައިދިނުމަށް އެމްޑީޕީން ކުރި މަސައްކަތްތަކީ ރައްޔިތުންނަށް އޮޅޭނެ ކަންކަމެއް ނޫނެވެ. ރަށު ކައުންސިލްތަކުގެ ބަޖެޓަށް ސީދާ ފައިސާ ޖަމާކޮށް، ބާރުވެރިކުރުވީ އެމްޑީޕީގެ ސަރުކާރުން ކަން ތާރީޚީ ހަގީގަތްތަކުން ފެންނަން އެބައޮތެވެ.
އެމްޑީޕީގެ މަގުބޫލުކަން އިތުރުވަމުންދާތީ، އެކަން ހަޖަމުނުވެގެން ޕީއެންސީން ކުރަމުންދާ މިފަދަ މަސައްކަތްތަކަކީ ހަޤީޤަތް އޮޅުވާލުމަށާއި ޕީއެންސީން ބުނާ "އިޚްލާޞްތެރި ސިޔާސަތު" ރަށްރަށުގެ ތަރައްޤީއަށްވުރެ ބޮޑަށް އަމާޒުވެފައިވަނީ ސިޔާސީ ވާދަވެރިންގެ އަގުވައްޓާލުމަށް ކުރަމުންދާ ކަމެއްކަން އެއީ މިހާރު ފެންނަން އޮތް ހެއްކެކެވެ.
ޕީއެންސީގެ މި އެންޓި ކެމްޕެއިނާއި ދޮގު މައުލޫމާތު ފެތުރުމުގެ ސިޔާސަތުގެ ސަބަބުން ފެންނަނީ، ލޯކަލް ކައުންސިލް އިންތިޚާބާ ކުރިމަތިލާއިރު އޮތް ބިރުވެރިކަމާއި، ސިޔާސީ ގޮތުން ނުކުޅެދިފައިވާ މިންވަރުގެ އިތުރުން ސަރުކާރަށް ރައްޔިތުންގެ އިތުބާރު ކުޑަވަމުންދާތަނެވެ.
