މާލެތެރެއަށް ބުޅަލުގެ ނަޖިސް އެޅެން ދޫކުރާނެ އުޒުރެއް ނުދެއްކޭނެ، ނުވަންޏާ ހަވާލުކުރޭ: މޭޔަރު އާދަމް އާޒިމް
މާލޭ ސިޓީ ކައުންސިލުގެ ޚަރަދުގައި ހުޅުމާލޭގައި ބުޅާތަކަށް ހެދި ފެސިލިޓީ އެގްރިކަލްޗާ މިނިސްޓްރީއާ ހަވާލުކުރިއިރު، އެތަނަށް ފުދޭ އަދަދަކަށް ބުޅާ ނުގެންދިޔުމުގެ ކަންބޮޑުވުން ކައުންސިލަރުން ފާޅުކުރެއްވި. ފެސިލިޓީ ހަވާލުކޮށްދިނުމަށް ދެ ފަހަރަށް އެދިފައިވާ ކަމަށް މޭޔަރު ވިދާޅުވި. ފެސިލިޓީއަށް ނޮން-ރިކަރަންޓް ޚަރަދުގެ ގޮތުގައި 1.2 މިލިއަން ރުފިޔާ ޚަރަދުވާނެ ކަމަށް އެނިމަލް ވެލްފެއާ މިނިސްޓަރު ޑރ. މަރިޔަމް މާރިޔާ ވިދާޅުވި.
މާލެ ސިޓީ މޭޔަރު އާދަމް އާޒިމް | ރާއްޖެ އެމްވީ
މާލެތެރެއަށް ބުޅަލުގެ ނަޖިސް އެޅެން ދޫކުރާނެ އުޒުރެއް މިނިސްޓްރީ އަށް އަދި ސަރުކާރަށް ވެސް ނުދެއްކޭނެ ކަމަށް މާލޭގެ މޭޔަރު އާދަމް އާޒިމް ވިދާޅުވެއްޖެ އެވެ.
މާލެ ސިޓީ ކައުންސިލުގެ ރަސްމީ އާންމު ޖަލްސާގައި ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު ވަނީ މި ކަންކަމާ ގުޅުވައި ކަންބޮޑުވުން ފާޅުކުރައްވާފަ އެވެ. އެ ޖަލްސާގައި މޭޔަރު ވިދާޅުވީ، މާލެތެރެއަށް ބުޅަލުގެ ނަޖިސް އެޅެން ދޫކުރާނެ އުޒުރެއް ސަރުކާރަށް ނުދެއްކޭނެ ކަމަށާއި ބުޅާތައް ގެންދަން ފަރުކޮޅުފުށީގައި އެޅި ބުޅާ ފެސިލިޓީ ހަވާލުކުރުމަށް ދެ ފަހަރަށް އެގްރިކަލްޗާ އެންޑް އެނިމަލް ވެލްފެއާ މިނިސްޓްރީގައި އެދިފައިވާނެ ކަމަށެވެ.
ބުޅަލުގެ މައްސަލައަށް ހައްލެއް ގެނައުމަށް މާލޭ ސިޓީ ކައުންސިލުގެ ޚަރަދުގައި ހުޅުމާލޭގައި ފެސިލިޓީއެއް ވަނީ އަޅާފަ އެވެ. އެ ތަން ރައީސް ޑރ. މުހައްމަދު މުއިއްޒު ނޮވެންބަރު، 2024 ގައި ވަނީ ހުޅުވައިދެއްވާފަ އެވެ. އަދި އެތަން ހުޅުވުމަށް ފަހު ރައީސް މުޢިއްޒު އެންގެވުމުގެ މަތިން ސިޓީ ކައުންސިލް އިން ވަނީ ބުޅާތައް ބަލަހައްޓަން ހުޅުމާލޭގައި ހެދި ފެސިލިޓީ، އެގްރިކަލްޗާ އެންޑް އެނިމަލް ވެލްފެއާ މިނިސްޓްރީއާ ހަވާލުކޮށްފަ އެވެ. އެހެން ނަމަވެސް ބުޅަލުގެ މައްސަލައަށް އެދެވޭ ހައްލެއް ނާދެ އެވެ.
މި ޖަލްސާގައި ސައިފް ވަނީ ބުޅާތައް ގެންދަން ހެދި ފެސިލިޓީއަށް އެކަށީގެންވާ މިންވަރަށް ނުގެންދާތީ އެކަމުގެ ކަންބޮޑުވުން ވެސް ފާޅުކުރައްވާފަ އެވެ. އެ ފެސިލިޓީއަށް އެގްރިކަލްޗާ މިނިސްޓްރީން 30 ބުޅާ ލައިގެން 'ބަލަހައްޓައިގެން' ތިބުމުން ބުޅަލުގެ މައްސަލަ ހައްލުނުވާކަން އޭނާ ފާހަގަކުރެއްވި އެވެ.
އަސްލުގަ ވަރަށް ޒިންމާދާރުކަން ކުޑަ ގޮތަކަށް އެތަން ހަވާލުކޮށްފަ ހުރި ފަރާތް އެކަންކަން އެކުރަނީ. އެންމެ ބޮޑަށް ބުޅަލުގެ އަނިޔާ ލިބޭތީ އެވާހަކަ ދެއްކި އެއްފަރާތް އެފަރާތަކީ. މިއަދު އެފަރާތާ ހަވާލުކުރީމަ އެފަރާތުން އެކަން ނުކޮށް ފާޑުފާޑު ޓުވީޓުކޮށް މިތަނުން ބުޅާ ނަޖިސް ނުނަގައޭ ބުނުމަކީ ވަރަށް ޒިންމާދާރުކަން ކުޑަ ވަރަށް ވިޔާނުދާ އަމަލެއް އޭނަ އެކުރަނީ. އެހެންވީމަ ސަރުކާރުންވެސް އެބަޖެހޭ އޭނައާ ދޭތެރޭ ފިޔަވަޅު އަޅަން އަސްލު މިހާރު. އަދި ބުޅަލުގެ ކަންތައްތަކުގަ ވަކާލާތު ކުރާ ފަރާތްތަކުން އޭނަ އާއި ދެކޮޅަށް ވަކާލާތުވެސް ކުރަންޖެހޭ.މާލޭގެ މޭޔަރު އާދަމް އާޒިމް
މޭޔަރު ވިދާޅުވީ، ބުޅަލުގެ މައްސަލަ ހައްލު ނުވާތީ އެ ތަން ހަވާލުކުރުމަށް އެދި ދެ ފަހަރަށް މިނިސްޓްރީ އަށް ސިޓީ ފޮނުވާފައިވާ ކަމަށެވެ. އެ ގޮތުން، ސިޓީ ކައުންސިލުން ފެސިލިޓީ ހަދާފައި އެ ހުރީ، މާލޭގައި އުޅޭ ބުޅާތައް ގެންގުޅެވޭ ވަރަށް ކަމަށް އާޒިމް ވިދާޅުވި އެވެ.
ފާހަގަކޮށްލެވޭ ގޮތުގައި މިދިޔަ އަހަރުގެ މެއި މަހު އެނިމަލް ވެލްފެއާ މިނިސްޓަރު ޑރ. މަރިޔަމް މާރިޔާ ވިދާޅުވި ގޮތުގައި، މާލެ ސަރަހައްދުގައި އުޅޭ ބުޅާތައް ގެންދިޔުމަށް ހުޅުމާލޭ ފަރުކޮޅުފުށީގައި ގާއިމުކުރި "އޮޅު ހިޔާ"އަށް ނޮން-ރިކަރަންޓް ޚަރަދުގެ ގޮތުގައި 1.2 މިލިއަން ރުފިޔާ ޚަރަދުވާނެ އެވެ.
