ތެލުގެ ވިޔަފާރިން ވެނެޒުއެލާ އަށް 300 މިލިއަން ޑޮލަރު ލިބިއްޖެ

ތެލުގެ ވިޔަފާރިން ވެނެޒުއެލާ އަށް 300 މިލިއަން އެމެރިކާ ޑޮލަރު ލިބިފައިވާ ކަމަށް، އެ ޤައުމުގެ ވަގުތީ ރައީސް ޑެލްސީ ރޮޑްރިގޭޒް ވިދާޅުވެއްޖެ އެވެ.

އަންގާރަ ދުވަހު ޑެލްސީ ވިދާޅުވީ، މި މަހުގެ ކުރީ ކޮޅު އެމެރިކާ އިން ވެނެޒުއެލާގެ ރައީސް ނިކޮލަސް މަދޫރޯ ހައްޔަރު ކުރުމަށް ފަހު، އެމެރިކާގެ ރައީސް ޑޮނަލްޑް ޓްރަމްޕް އިއުލާން ކުރެއްވި 50 މިލިއަން ބެރަލްގެ ތެލުގެ އެއްބަސްވުމުގެ ދަށުން، ތެލުގެ ވިޔަފާާރިން 300 މިލިއަން ޑޮލަރު ލިބިފައިވާ ކަމަށެވެ. 

ވެނެޒުއެލާގެ ވެރި ރަށް ކަރަކާސްގައި އޮތް ޙަރަކާތެއްގައި ޑެލްސީ ވިދާޅުވީ، ތެލުގެ ވިޔަފާރިން ފައިސާ ލިބިފައިވާ ކަމަށާއި، ފުރަތަމަ 500 މިލިއަން އެމެރިކާ ޑޮލަރުން، 300 މިލިއަން އެމެރިކާ ޑޮލަރު ލިބިފައިވާ ކަމަށެވެ. މި ލިބުނު ފައިސާ، ވެނެޒުއެލާގެ ފައިސާ ބަދަލު ކުރުމުގެ ބާޒާރުގެ ޒަރިއްޔާ އިން، ޤައުމީ ބޭންކު ތަކާއި، މަރުކަޒީ ބޭންކުން މެދު ކެނޑުމެއް ނެތި ބޭނުން ކުރާނެ ކަމަށް އޭނާ ވިދާޅުވި އެވެ. އަދި މި ފައިސާ ބޭނުން ކުރާނީ ބާޒާރު ޚަރުދަނާކޮށް ސަލާމަތް ކުރުމާއި، މުވައްޒަފުންގެ އާމްދަނީ އާއި ވިޔަފާރީގެ ބާރު ރަައްކާތެރި ކުރުމަށް ކަމަށް އޭނާ ވިދާޅުވި އެވެ. 

މިދިޔަ ހަފުތާގެ ތެރޭގައި ރޮއިޓާސް އިން ރިޕޯޓު ކޮށްފައިވާ ގޮތުގައި، ވެނެޒުއެލާގެ ހަތަރު ބޭންކަކަށް އެ ޤައުމުގެ ސަރުކާރުން އަންގާފައި ވަނީ، ޤަތަރުގައި ހުރި އެކައުންޓެއްގައި ޖަމާ ކޮށްފައިވާ ތެލުގެ އާމްދަނީ އިން 300 މިލިއަން އެމެރިކާ ޑޮލަރު ބަހާލާނެ ކަމަށެވެ. މިއީ ވިޔަފާރީގެ ކަންކަމަށް ފައިސާ ބޭނުންވާ ވެނެޒުއެލާގެ ކުންފުނި ތަކަށް ޑޮލަރު ވިއްކުމުގެ ފުރުސަތު ހުޅުވާލުމަށް ކަމަށް، ރިޕޯޓުތައް ބުނެ އެވެ.

ވެނެޒުއެލާގެ ޤާނޫނު ހަދާ މަޖިލީހުގެ ރައީސް، އަދި ވަގުތީ ރައީސް ޑެލްސީގެ ބޭބެ، ޖޯޖް ރޮޑްރިގޭޒް ވިދާޅުވީ މި ހަފުތާގައި ފުރަތަމަ ފަހަރަށް މަޝްވަރާ ކުރުމަށް ހަމަޖެހިފައިވާ ޤައުމުގެ މައި ތެލުގެ ޤާނޫނަށް ގެންނަ އިސްލާޙު، ރައީސް މަދޫރޯގެ ވެރި ކަމުގައި ފުރަތަމަ ފެށި ބައިވެރި ވުމުގެ އުސޫލުގެ މައްޗަށް ބިނާ ކުރާޏެ ކަމަށެވެ. ނަމަވެސް، އެކަމާ ގުޅޭ އިތުރު ތަފްސީލެއް އޭނާ ދެއްވާފައި ނުވެ އެވެ. 

މިދިޔަ ހަފުތާގެ ތެރޭގައި ޤާނޫނު ހަދާ މަޖިލީހުގައި ވާހަކަ ދައްކަވަމުން ވަގުތީ ރައީސް ޑެލްސީ ވިދާޅުވީ، ބޭރުގެ އިންވެސްޓްމަންޓް އިތުރު ކުރުމަށް ހައިޑްރޯކާބަން ޤާނޫނަށް ބަދަލު ގެނައުމަށް ސަރުކާރުން ތާއީދު ކުރާ ކަމަށެވެ. އެ ޤާނޫނުގައި ހިމެނެނީ ސަރުކާރުގެ ކުންފުނި ޕީޑީވީއެސްއޭގެ ބެލުމުގެ ދަށުން ހިންގާ ގުޅިފައިވާ ވިޔަފާރި ތަކުގެ އެއް ކޮންޓްރެކްޓް މޮޑެލް އެކެވެ. ނަމަވެސް، ފަހުގެ އަހަރު ތަކުގައި ޤައުމުން އައި ބައިވެރިވުން އުފައްފައި، އެކަމުގައި ބައިވެރިވުމުގެ ކޮންޓްރެކްޓުތައް ތައާރަފު ކުރަމުން އަންނަ ކަމަށް ބުނެފައި ވީ ނަމަވެސް، އެ ކޮންޓްރެކްޓް ތަކުގެ ޝަރުތު ފުރިހަމަ އަށް ހާމަ ކޮށްފައި ނުވެ އެވެ. 

ނޫސްވެރިންނާ ވާހަކަ ދައްކަވަމުން ޖޯޖް ރޮޑްރިގޭޒް ވިދާޅުވީ ،އެ ކޮންޓްރެކްޓް ތަކަކީ ގާނޫނުގެ އިސްލާހު ގައި ހިމަނަން ޖެހޭ މުހިންމު އެއްޗެއް ކަމަށެވެ.