ރައީސް މުއިއްޒުގެ ވައުދުފުޅާ ހިލާފުވެ، މިފްކޯ ގެ ސެންޓަރު ތަކަށާއި ބޯޓުތަކަށް ކުޑަ އަގެއްގައި ކަންނެލި ގަންނަން ފަށައިފި
މިފްކޯ އިން ބޮޑުކަންނެލި ގަންނަން ފަށާ، ކަންނެލީގެ އަގު 80 ރުފިޔާ އާއި 100 ރުފިޔާ އާއި ދޭތެރޭ ހިފަހައްޓާ ބޭސް ރޭޓުގައި މަސްވެރިންނަށް ތެލާއި އައިސް ލިބޭނެ އިންތިޒާމު ހަމަޖެއްޒުމަކީ ރައީސް މުއިއްޒު ގެ ރިޔާސީ ވައުދެއް.
ބޮޑު ކަންނެލި މަސްވެރިންނަށް ރައީސް މުއިއްޒު ވީ ވަދުދުތައް ފުއްދުމަށް އެދި, ބޮޑު ކަންނެލި މަސްވެރިން ކުރި މުޒާހަރާ އެއްގެ ތެރެއިން | ސަން އޮންލައިން
ރިޔާސީ އިންތިހާބު ކެމްޕެއިން ތެރޭ ރައީސް ޑރ. މުހައްމަދު މުއިއްޒު ވީ ވައުދާ ޚިލާފަށް މިފްކޯ އިން ބޮޑު ކަންނެލި ކިލޯއަކަށް 20 ރުފިޔާގެ ރޭޓުން މަސްވެރިން އަތުން ގަންނަން ފަށައިފި އެވެ.
ވެރިކަމަށް އަންނަން ވެެގެން ރައީސް މުއިއްޒު ވިދާޅުވެފައިވަނީ ބޮޑު ކަންނެލި ކިލޯއެއް 80 ރުފިޔާ އާއި 100 ރުފިޔާ އާ ދެމެދުގެ އަގެއްގައި މަސްވެރިން އަތުން ގަންނާނެ ކަމަށެވެ.
މިފްކޯ އިން ބުނީ 10 ކިލޯއާއި 15 ކިލޯއާ ދެމެދުގެ ކަންނެލި ގަންނަން ފަށާފައިވަނީ ކިލޯ އެއް 20 ރުފިޔާ ގެ ރޭޓުން ކަމަށާއި 15 ކިލޯ އަށްވުރެ މަތީގެ ކަންނެލި ގަންނަމުންދާނީ ކިލޯ އަކަށް 25 ރުފިޔާ ގެ ރޭޓުން ކަމަށެވެ. މި އަގުތަކަކީ ރައީސް މުއިއްޒު ވިދާޅުވި ވައުދާ ބޮޑު ތަނުން ތަފާތު ހެޔޮ އަގު ތަކެކެވެ.
އަންގާރަ ދުވަހު ކޫއްޑޫ ބަނދަރާއި އައްޑޫ ބަނދަރާއި ފުވައްމުލަކާއި ގދ. ގައްދޫ އާއި ގދ. ތިނަދޫ އިން މިފްކޯ ގެ ބޯޓުފަހަރަށް 10 ކިލޯ އާއި 15 ކިލޯ އާ ދެމެދުގެ ކަންނެލި ގަނެފައިވާ ކަމަށް މިފްކޯ އިން ބުންޏެވެ. މީގެ އިތުރުން މިފްކޯ އިން ބުނީ ކަޅުބިލަމަހެކޭ އެއްފަދައިން މިފްކޯ އަށް ކިރުވާ ކަންނެލި މަހަށްވެސް 48 ގަޑިއިރުތެރޭގައި ފައިސާ ދޫކުރަމުންދާ ކަމަށެވެ.
ސަރުކާރަށް ދެ އަހަރު ވީއިރު މިފްކޯ އިން މި މަހުގެ 11 ގައި ވަނީ ފުރަތަމަ ފަހަރަށް ކަނޑުއޮތްގިރިން ވެސް ބޮޑު ކަންނެލި ގަންނަން ފަށާފަ އެވެ. އޭގެ ފަހުން މިހާރު މިފްކޯގެ ބޯޓުތަކާއި ހުރިހާ ސެންޓަރަކަށް ވެސް ބޮޑު ކަންނެލި ގަންނަން މިވަނީ ފަށާފަ އެވެ.
ބޮޑު ކަންނެލީގެ އަގު 80 ރުފިޔާއާއި 100 ރުފިޔާއާ ދެމެދުގައި ހިފަހައްޓައި، ބޭސް ރޭޓުގައި މަސްވެރިންނަށް ތެލާއި އައިސް ލިބޭނެ އިންތިޒާމު ހަމަޖެއްސުމަކީ ރައީސް މުއިއްޒުގެ ރިޔާސީ ވައުދެކެވެ. ނަމަވެސް ސަރުކާރަށް ދެ އަހަރު ވީއިރުވެސް މި ވައުދުތައް ފުއްދާ ނުދިނުމުގެ ސަބަބުން މަސްވެރިން ވަނީ ކަންބޮޑުވުންތައް އެތައް ފަހަރެއްގެ މަތިން ފާޅުކޮށް އިހުތިޖާޖު ވެސް ކޮށްފަ އެވެ.
ވައުދުތައް ފުއްދުމަށް ގޮވާލައި މިދިޔަ މަހުގެ 10 ވަނަ ދުވަހު ފާހަގަކުރި މަސްވެރިންގެ ދުވަހުގައި މާލެ ފަޅުކައިރީގައި ގިނަ އަދަދެއްގެ މަސްދޯނި ތައް ބާއްވައިގެން ބޮޑު ކަންނެލި މަސްވެރިން ވަނީ އިހުތިޖާޖުކޮށްފަ އެވެ. ރައީސް މުއިއްޒު ބާރުގެ ބޭނުންކޮށްގެން މަސްވެރިންގެ އިހުތިޖާޖު ހުއްޓުވާފައިވާއިރު، އަދިވެސް އެ މަސްވެރިންގެ ކަންބޮޑުވުންތަކަށް ހައްލެއް ލިބިފައެއް ނުވެ އެވެ.
މަސްވެރިންގެ ކަންބޮޑުވުންތަކަށް ހައްލެއް ހޯދައިނުދީ، ސަރުކާރުން ވަނީ ވައުދުތައް ފުއްދަން އައު ތާރީހު ތަކެއް ދީ ވާހަކައިން ހުރިހާ ކަމެއް ހައްލު ކޮށްފަ ކަމަށް މަސްވެރިން ބުނެ އެވެ.
