ރައީސް މުއިއްޒު ސަރުކާރުގެ ކުޑަކުދިންގެ ޕާކު ވަރަށް ތަފާތު! ކުޅޭ ސާމަނެއް ނެތް، 16 ލައިޓާއެކު ހުރީ ހުސް ބިމެއް
ސިޓީސް މިނިސްޓްރީ އިން އާރްޑީސީ އާ ހަވާލުކޮށްގެން ވެލިދޫގައި ތަރައްގީ ކުރި ކުޑަކުދިންގެ ޕާކުގައި ކުޅޭ ސާމާނެއް ނެތި ހުސް ބިމެއްގެ ގޮތުގައި ހުރި އިރު 16 ވަރަކަށް ލައިޓު ޖަހާ ވަށާފާރު ވަނީ ރާނާފައި. ކައުންސިލް ރައީސް އާތިފް ވިދާޅުވީ ބޭނުންވާ ތަކެތި ނުލިބޭތީ ހުސްބިމަކަށް ވެފައިވާ ކަމަށާއި ރޭގަނޑު ކުޑަކުދިން ނުކުޅޭ އިރު އެހާ ބައިވަރު ލައިޓު ހުރީ ކީއްވެތޯ ސުވާލު އުފެދޭ ކަމަށް. ރައްޔިތުން ވަނީ ހުސް ބިމަކަށް ޕާކެއް ނަންދީފައި އޮތުމާމެދު ފާޑުކިޔާފަ.
ނ. ވެލިދޫ ގައި ރައީސް ޑރ. މުހައްމަދު މުއިއްޒުގެ ސަރުކާރުން ތަރައްގީ ކޮށްފައިވާ ކުޑަކުދިންގެ ޕާކު | ރާއްޖެއެމްވީ
ނ. ވެލިދޫ ގައި ރައީސް ޑރ. މުހައްމަދު މުއިއްޒުގެ ސަރުކާރުން ތަރައްގީ ކޮށްފައިވާ ކުޑަކުދިންގެ ޕާކު ހުސް ބިމެއްގެ ގޮތުގައި އެއްވެސް ކުޅޭ ސާމާނެއް ނެތި ހުރީ އެ ތަކެތި އަދި ނާންނާތީ ކަމަށް ސަރުކާރުން ބުނެފައިވާ ކަމަށް ވެލިދޫ ކައުންސިލް ގެ ރައީސް އާތިފް ހުސައިން ވިދާޅުވެއްޖެ އެވެ.
މި މަޝްރޫއު އަކީ މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވާރކްސް އިން ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާ ހަވާލު ކޮށްގެން ކުރިއަށް ގެންދިއަ މަޝްރޫއެވެ. މި މަޝްރޫއުގެ އެއްބަސް ވުމުގައި ސޮއި ކޮށްފައިވަނީ 2025 ވަނަ އަހަރުގެ މާޗް މަހުގަ އެވެ.
މި މަޝްރޫއު އާރްޑީސީ އިން ނިންމާފައި ވީ ނަމަވެސް އެތަނުގައި ހުރީ 16 ވަރަކަށް ލައިޓު ޖަހާ ވަށާފާރު ރާނާފައިވާ ހުސް ބިމެކެވެ. ކުޅިވަރު ކުޅޭނެ އެއްވެސް އެއްޗެއް އެތަނުގައި ނެތެވެ.
މިކަމާ ގުޅިގެން ރާއްޖެޓީވީ އާ ވާހަކަ ދައްކަވަމުން ކައުންސިލް ރައީސް އާތިފް ވިދާޅުވީ އެ ބިމަކީ ކުޑަކުދިންގެ ޕާކެއް އެޅުމަށްޓަކައި ތަރައްގީ ކުރާނެ ބިމެއް ހޯދުމަށް ސިޓީސް މިނިސްޓްރީ އިން އެދިގެން ދީފައިވާ ބިމެއް ކަމަށެވެ. އަދި އެތަނުގައި އަދިވެސް ހުސް ބިމެއް ހުރީ އެތަނަށް ބޭނުންވާ ތަކެތި ނުލިބޭތީ ކަމަށް ސަރުކާރުން ބުނާ ކަމަށް ވެސް އާތިފް ވިދާޅުވި އެވެ.
ހުސް ބިމުގައި ހުރި ލައިޓުތަކަށް އިޝާރާތް ކުރައްވާ އާތިފް ވިދާޅުވީ އެތަނުގައި އެހާ ބައިވަރު ލައިޓު ހުރި ސަބަބެއް ނޭނގޭ ކަމަށެވެ. ކުޑަކުދިން އާންމު ކޮށް ރޭގަނޑު ކުޅެން ޕާކު ތަކަށް ނުދާއިރު އެހާ ބައިވަރު ލައިޓު އެތަނުގައި ހުރީ ކީއްވެ ތޯ އާތިފް ވެސް ވަނީ ސުވާލު އުފައްދާފަ އެވެ.
ކައުންސިލް ރައީސް ގެ އިތުރުން ވެސް އެ ރަށުގެ ގިނަ ބައެއްގެ ފާޑު ކިޔުން މި ސަރުކާރުން ވެލިދޫ ގައި ތަރައްގީ ކޮށްފައިވާ ޕާކަށް އަމާޒުވަމުން ދެ އެވެ. ރައްޔިތުން ބުނަމުންދަނީ ހުސް ބިމަކަށް ޕާކެއް ނަން ދިނަސް އެތަން ޕާކަކަށް ނުވާނެ ކަމަށެވެ.
