ދުނިޔެ މި މިސްރާބު ޖަހާފައި ވަނީ ހަމައެކަނި ބާރުގަދަ މީހާގެ ބަސް ހިނގާ، އިސްތިއުމާރީ ފިކުރުތައް އަލުން އާލާވަމުންދާ ޒަމާނަކަށް: ފްރާންސްގެ ރައީސް

ގްރީންލޭންޑްގެ މައްސަލަ އާއި ދުނިޔޭގެ ވިޔަފާރިއާ ބެހޭ ގޮތުން އެމެރިކާ އިން އިއުލާނުުުު ކުރަމުންދާ ހަރުކަށި ސިޔާސަތުތަކާ ގުޅިގެން ސްވިޒަލޭންޑުގެ ޑާވޯސްގައި ބޭއްވުނު ވޯލްޑް އިކޮނޮމިކް ފޯރަމްގައި، ފަރަންސޭސި ރައީސް އެމެރިކާ އަށް ވަރަށް ބޮޑަށް ފާޑު ވިދާޅުވެއްޖެ އެވެ.

މި ބައްދަލުވުން ބާއްވާފައި ވަނީ، ގްރީންލޭންޑް އެމެރިކާގެ ބާރުގެ ދަށަށް ގެންދިއުމަށާއި އެކަމާ ގުޅޭ ވިޔަފާރީގެ ޓެރިފްތައް ކަނޑައެޅުމަށް އެމެރިކާގެ ރައީސް ޑޮނަލްޑް ޓްރަމްޕް ވާހަކަފުޅު ދައްކަވަމުން ގެންދަވާ ދަނޑިވަޅެއްގަ އެވެ.

ލޮލުގެ އިންފެކްޝަނެއްގެ ސަބަބުން އަވިއައިނު އަޅުއްވައިގެން ހުންނެވި ފަރަންސޭސި ރައީސް އެމަނުއެލް މެކްރޯން ވަނީ، މިއީ އެތައް އަހަރެއްގެ ގުޅުމާއި އެއްބާރުލުމަށް ބުރޫ އަރާ ފަދަ "އައު އިސްތިއުމާރީ އުސޫލެއް" ކަމަށް ސިފަކުރައްވައި އެކަމުގެ އިންޒާރު ދެއްވާފަ އެވެ.

ފަރަންސޭސި ރައީސްގެ ވާހަކަފުޅު ފެއްޓެވީ "މިއީ ސުލްހަވެރިކަމާއި، ހަމަޖެހުމާއި، ކަންކަން ލަފާކުރަން އެނގޭ ދުވަސްވަރެއް" ކަމަށް ވިދާޅުވެ މަޖާޒީ ގޮތަކަށެވެ. ނަމަވެސް، ބޮޑެތި ބާރުތަކުން ޒަމާނީ އިސްތިއުމާރީ ރޫހެއްގައި އަމަލުކުރާ ކަމަށް ވިދާޅުވެ، އެކަމުގެ އިންޒާރު ދެއްވަމުން އޭނާ ވިދާޅުވީ، ދުނިޔެ މި މިސްރާބު ޖަހާފައި ވަނީ އެއްވެސް އުސޫލެއް ނެތް ޒަމާނަކާ ދިމާލަށް ކަމަށެވެ. އެއީ ބައިނަލްއަގުވާމީ ގާނޫނުތަކަށް އިހުތިރާމް ކުޑަކޮށް، ހަމައެކަނި ބާރުގަދަ މީހާގެ ބަސް ހިނގާ، އިސްތިއުމާރީ ފިކުރުތައް އަލުން އާލާވަމުންދާ ދުނިޔެ އެއް ކަމަށް އޭނާ ސިފަކުރެއްވި އެވެ.

މީގެ އިތުރުން، ޓްރަމްޕްގެ ސަރުކާރަށް ފާޑުވިދާޅުވަމުން މެކްރޮން ވިދާޅުވީ، އެމެރިކާ އިން އެކުލަވާލާ ވިޔަފާރީގެ އެއްބަސްވުންތަކުގެ ސަބަބުން ޔޫރަޕްގެ އެކްސްޕޯޓް މަސްލަހަތުތަކަށް ގެއްލުންވެ، ޔޫރަޕް ބަލިކަށިކޮށްލުމަށް ފާޅުގައި މަސައްކަތް ކުރަމުންދާ ކަމަށެވެ. އަދި ގައުމެއްގެ މިނިވަންކަމާއި އިސްތިގުލާލަށް އަސަރުކުރާ ފަދަ ގޮތަކަށް ޓެރިފްތައް ބޭނުން ކުރުމަކީ އެއްވެސް ހާލެއްގައި ބަލައިގަނެވޭނެ ކަމެއް ނޫން ކަމަށް ވެސް އޭނާ ވިދާޅުވި އެވެ.