ގްރީންލޭންޑުގެ މައްސަލައިގައި ނޭޓޯގެ ރުޓޭއާ ވަރަށް ކާމިޔާބު މަޝްވަރާ ތަކެއް ކޮށްފައިވާ ކަމަށް ޓްރަމްޕް ވިދާޅުވެއްޖެ

ގްރީންލޭންޑުގެ މައްސަލައިގައި ނޭޓޯގެ ސެކްރެޓަރީ ޖެނަރަލް މާކް ރުޓޭއާ ފޯނުން ގުޅުއްވައި، ވަރަށް ރަނގަޅު އަދި ކާމިޔާބު މަޝްވަރާ ތަކެއް ކުރެވިފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އަންގާރަ ދުވަހު ޓްރަމްޕް އެހެން ވިދާޅުވެފައި ވަނީ، އޭނާގެ ޓުރުތު ސޯޝަލް މީޑިއާގައި ކުރެއްވި ޕޯސްޓެއްގަ އެވެ. އެ ޕޯސްޓުގައި ޓްރަމްޕް ވިދާޅުވީ ގްރީންލޭންޑަކީ ޤައުމީ އަދި ދުނިޔޭގެ ސަލާމަތަށް ވެސް ވަރަށް މުހިންމު ތަނެއް ކަމަށެވެ. އެކަމުގައި އެއްވެސް ފަރާތަކުން ފަހަތަށް ޖެހިގެން ނުވާނެ ކަމަށާއި، އެކަމުގައި ހުރިހާ ބޭފުޅުން ވެސް އެއްބަސްވެ ވަޑައިގަންނަވާ ކަމަށް ޓްރަމްޕް ވިދާޅުވި އެވެ.

އިތުރަށް އެ ޕޯސްޓުގައި ޓްރަމްޕް ވިދާޅުވީ، ސްވިޒަލެންޑުގެ ޑާވޯސްގައި ބާއްވާ ވޯލްޑް އިކޮނޮމިކް ފޯރަމްގައި އެކި އެކި ލީޑަރުންނާ ބައްދަލު ކުރެއްވުމަށް ވެސް އެއްބަސްވެފަވާ ކަމަށެވެ. އެހެން ނަަމަވެސް، ބައްދަލު ކުރައްވާ ފަރާތް ތަކަކީ ކޮބައި ކަމެއް އެ ޕޯސްޓުގައި ޓްރަމްޕް ވިދާޅުވެފައި ނުވެ އެވެ. 

މީގެ ކުރިން ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، މި ހަފުތާގައި އޮންނަ ވޯލްޑް އިކޮނޮމިކް ފޯރަމްގައި ގްރީންލޭންޑު ހޯދުމުގެ ވާހަކަ ދައްކަވާނެ ކަމަށެވެ. އަދި އެއީ ޑެންމާކަށް އެ ސަރަހައްދު ރައްކާތެރި ކުރެވޭނެ ޤާބިލުކަން ނެތުމުން ކަމަށް ވެސް ޓްރަމްޕް ވިދާޅުވެފައިވެ އެވެ. ޓްރަމްޕް އަންނަނީ އެމެރިކާގެ ބެލުމުގެ ދަށަށް ގްރީންލޭންޑު ގެނައުމުގެ ވާހަކަ ވަރަށް ގިނައިން ދައްކަވަމުންނެވެ.

ގްރީންލޭންޑަކީ ޑެންމާކުގެ މިނިވަން ސަރަހައްދެއް ކަމަށްވާއިރު، އެ ސަރަހައްދުގެ ރައްޔިތުންނަށް އެ މީހުންގެ ކަންކަން ބެލެހެއްޓުމުގެ ބާރު ލިބިފައިވެ އެވެ. ނަމަވެސް، ފޮރިން ޕޮލިސީ އާއި ސަލާމަތީ ކަންކަން ބެލެހެއްޓުމުގެ ބާރު އޮތީ ޑެންމާކުގެ އަތުގަ އެވެ. 

މީގެ ކުރިން ޓްރަމްޕް ވިދާޅުވެފައި ވަނީ، ގްރީންލޭންޑަކީ ލޮކޭޝަންގެ ގޮތުން މުހިންމު ސަރަހައްދެއް ކަމަށާއި، އެ ސަރަހައްދު އެމެރިކާގެ ބާރުގެ ދަށަށް ގެނެސް، އެމެރިކާގެ ބެލުމުގެ ދަށުން ކަންކަން ކުރިއަށް ގެންދަން ބޭނުންފުޅުވާ ކަމަށެވެ. 

ޓްރަމްޕް މިހެން ވިދާޅުވެފައި ވީ ނަމަވެސް، ޑެންމާކު އަދި ގްރީންލޭންޑުގެ ލީޑަރުން ވަނީ ޓްރަމްޕްގެ ވިސްނުންފުޅާ ދެކޮޅު ހައްދަވައިފަ އެވެ. އެގޮތުން ގްރީންލޭންޑަކީ ވިއްކާނެ ސަރަހައްދެއް ވެސް ނޫން ކަމަށް، އެ ޤައުމު ތަކުގެ ލީޑަރުން ވަނީ ވިދާޅުވެފަ އެވެ. ޑެންމާކު އަދި ގްރީންލޭންޑުގެ އިތުރުން، ބައިނަލްއަޤުވާމީ މުޖުތަމައު ވެސް ވަނީ ޓްރަމްޕްގެ ވާހަކަތަކާ ދެކޮޅު ހަދައިފަ އެވެ.