ޣައްޒާގެ ކަންކަމާ ގުޅޭގޮތުން އެމެރިކާ އިން އެކުލަވައިލި ލަފާދޭ މަޖިލީހާ މެދު ހިތްހަމަނުޖެހި، ނަތަންޔާހޫ އޭނާގެ އިއްތިހާދުގެ ބައިވެރިންނާ ބައްދަލުކޮށްފި

ޣައްޒާގެ ކަންކަމާ ގުޅޭގޮތުން އެމެރިކާގެ ވައިޓް ހައުސް އިން އެކުލަވައިލި ލަފާދޭ މަޖިލީހުގައި ހިމެނޭ މެންބަރުންނާ މެދު ހިތްހަމަނުޖެހުން ފާޅުކޮށް، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އޭނާގެ އިއްތިހާދުގެ ބައިވެރިންނާ އާދީއްތަ ދުވަހު ބައްދަލުކޮށްފި އެވެ.

ވައިޓް ހައުސް އިން މި ހަފުތާގައި އިޢުލާންކޮށްފައި ވަނީ "ޣައްޒާ އެގްޒެކެޓިވް ބޯޑު" ގެ ނަމުގައި ކޮމިޓީއެއް އުފެއްދުމަށެވެ. މިއީ އެމެރިކާގެ ރައީސް ޑޮނަލްޑް ޓްރަމްޕްގެ ރިޔާސަތުގެ ދަށުން ހިންގާ "ބޯޑް އޮފް ޕީސް" ނުވަތަ ސުލްހައިގެ މަޖިލީހުގެ ދަށުން މަސައްކަތްކުރާނެ ބޯޑެކެވެ. މިއީ ޣައްޒާގައި ހިނގަމުންދާ ހަނގުރާމަ ނިމުމަކަށް ގެނައުމަށް ޓްރަމްޕް ހުށަހަޅާފައިވާ 20 ނުކުތާގެ މައްޗަށް އެކުލެވޭ މަޝްރޫޢުގެ ބައެކެވެ.

މި ބޯޑަކީ ލަފާދޭ ދައުރެއް އަދާކުރާނެ ބޯޑެއް ކަމަށް ބުނެފައިވާއިރު، އޭގައި ތުރުކީގެ ޚާރިޖީ ވަޒީރު ހާކާން ފިދާން އާއި ޤަޠަރުގެ ޑިޕްލޮމެޓް ޢަލީ އަލްޘަވާދީގެ އިތުރުން ސަރަޙައްދީ އަދި ބައިނަލްއަޤްވާމީ ބައެއް އިސް ބޭފުޅުން ހިމެނިވަޑައިގަންނަވަ އެވެ.

ހޮނިހިރު ދުވަހުގެ ރޭ ނަތަންޔާހޫގެ އޮފީހުން ވަނީ މި ބޯޑު އެކުލަވައިލާފައިވާ ގޮތާމެދު އިޢުތިރާޒު ކޮށްފަ އެވެ. އެ އޮފީހުން ނެރުނު ބަޔާނެއްގައި ބުނެފައި ވަނީ، "ސުލްހައިގެ މަޖިލީހުގެ" ދަށުން ހިންގާ މި ބޯޑު އެކުލަވައިލުމުގައި އިޒްރޭލާ އެއްވެސް މަޝްވަރާއެއް ކޮށްފައި ނުވާ ކަމަށާއި، މިއީ އެ ޤައުމުގެ ސިޔާސަތުތަކާ މުޅިން ޚިލާފު ކަމެއް ކަމަށެވެ. އަދި މިކަމާ ގުޅޭގޮތުން އެމެރިކާގެ ސެކްރެޓަރީ އޮފް ސްޓޭޓާ ވާހަކަދެއްކުމަށް ނަތަންޔާހޫ ވަނީ އިޒްރޭލުގެ ޚާރިޖީ ވަޒީރަށް އަންގަވާފަ އެވެ.

އިޒްރޭލުން އިއުތިރާޒުކުރި ސީދާ ސަބަބެއް ހާމަކޮށްފައި ނުވި ނަމަވެސް، ހަނގުރާމައަށް ފަހު ޣައްޒާގެ ކަންކަމުގައި ތުރުކީން އެއްވެސް ދައުރެއް އަދާކުރުމާ މެދު އިޒްރޭލުން ކުރިން ވެސް ވަނީ ވަރަށް ބޮޑަށް ދެކޮޅު ހަދާފަ އެވެ. 2023 ވަނަ އަހަރުގެ އޮކްޓޫބަރު މަހު ހަނގުރާމަ ފެށުނީއްސުރެ މި ދެ ޤައުމުގެ ގުޅުން ވަނީ ވަރަށް ބޮޑަށް ގޯސްވެފަ އެވެ. ތުރުކީގެ ޚާރިޖީ ވަޒީރުގެ އިތުރުން، ޓްރަމްޕް ވަނީ ތުރުކީގެ ރައީސް ރަޖަބް ތައްޔިބު އުރުދުޣާން ވެސް "ސުލްހައިގެ މަޖިލީހުގައި" ބައިވެރިވެވަޑައިގަތުމަށް ދަޢުވަތު ދެއްވާފަ އެވެ.

މީޑިއާ ރިޕޯޓްތައް ބުނާގޮތުން، އާދީއްތަ ދުވަހު އިޒްރޭލުގެ ކޯލިޝަން ސަރުކާރުގެ އިސްވެރިން ބައްދަލުކުރައްވައި މި ބޯޑާ ގުޅޭގޮތުން މަޝްވަރާކުރެއްވުމަށް ވަނީ ހަމަޖެހިފަ އެވެ. ނަތަންޔާހޫގެ ލިކުޑް ޕާޓީގެ ތަރުޖަމާނު ވިދާޅުވި ގޮތުގައި، ކޯލިޝަންގެ ބައްދަލުވުން އޮތީ އާދީއްތަ ދުވަހުގެ ހެނދުނު 10:00 ގައެވެ.

ނަތަންޔާހޫގެ ލިކުޑް ޕާޓީގެ އިތުރުން މި ކޯލިޝަންގައި ހިމެނެނީ ހަރުކަށި ފިކުރުގެ މާލީ ވަޒީރު ބެޒަލެލް ސްމޮޓްރިޗްގެ "ރިލިޖަސް ޒަޔަނިސްޓް ޕާޓީ" އާއި ހަރުކަށި ދާޚިލީ ސަލާމަތާ ބެހޭ ވަޒީރު އިޓަމާ ބެން ގްވީރުގެ "އޮޓްޒްމާ ޔެހޫދާ" ޕާޓީ އެވެ.

ވައިޓް ހައުސް އިން ހާމަކުރި ގޮތުގައި ޓްރަމްޕްގެ މި ޕްލޭން ބެހިގެން ވަނީ ތިން ބަޔަކަށެވެ. އެއީ ޓްރަމްޕް ރިޔާސަތު ބަލަހައްޓަވާ "ސުލްހައިގެ މަޖިލީހާއި"، ޣައްޒާ ހިންގުމަށް ހަމަޖެހިފައިވާ ފަލަސްޠީނުގެ ފަންނީ ބޭފުޅުންގެ ކޮމިޓީއަކާއި، ލަފާދޭ ރޯލެއް އަދާކުރާނެ "ޣައްޒާ އެގްޒެކެޓިވް ބޯޑު" އެވެ. ފަލަސްތީނުގެ ފަންނީ ކޮމިޓީގެ ފުރަތަމަ ބައްދަލުވުން ހޮނިހިރު ދުވަހު މިޞްރުގެ ޤާހިރާގައި ވަނީ ބާއްވާފަ އެވެ.

މި ޑިޕްލޮމެޓިކް ހަރަކާތްތައް މި ހިނގަނީ، ޣައްޒާގެ ހަނގުރާމަ ހުއްޓާލުމުގެ ޕްލޭން މިހާރު ދެވަނަ މަރުހަލާއަކަށް ވަދެފައިވާ ކަމަށް އެމެރިކާ އިން ބުނެފައިވާ ދަނޑިވަޅެއްގަ އެވެ. އެއީ ހަމަލާ ބަދަލުކުރުން ހުއްޓާލުމުގެ މަރުހަލާ އިން، ޙަމާސްގެ ހަތިޔާރުތައް އަތުލުމުގެ މަރުހަލާ އަށް ބަދަލުވުމެވެ.