ޣައްޒާ ގެ ވަގުތީ ސަރުކާރު އެކުލަވާލާ، އެ ސަރުކާރަށް ތާއީދު ކުރައްވާ ކަމަށް ޓްރަމްޕް ވިދާޅުވެއްޖެ

ޣައްޒާގެ ކަންކަން ބެލެހެއްޓުމަށް އަލަށް އުފެއްދި "ފަލަސްތީނުގެ ޓެކްނޮކްރެޓިކް ސަރުކާރު" އަށް ތާއީދުކުރައްވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުރާސްފަތި ދުވަހު ވިދާޅުވެއްޖެ އެވެ. މީގެ އިތުރުން، މިދިޔަ އޮކްޓޯބަރު މަހުން ފެށިގެން އަމަލުކުރަމުން އަންނަ، އެހެން ނަމަވެސް ނާޒުކު ފައްތަރެއްގައި އޮތް ހަނގުރާމަ ހުއްޓާލުމުގެ އެއްބަސްވުމުގެ ދެވަނަ މަރުހަލާ ފަށާފައިވާކަން ވޮޝިންގޓަނުން ވަނީ އިޢުލާންކޮށްފަ އެވެ.

ސޯޝަލް މީޑިއާގައި ޓްރަމްޕް ވިދާޅުވީ، ޣައްޒާ ސަރަހައްދު ހިންގުމަށްޓަކައި، ބޯޑުގެ ހައި ރެޕްރެޒެންޓެޓިވްގެ އެހީތެރިކަމާއެކު އެކުލަވާލާފައިވާ 'ނޭޝަނަލް ކޮމިޓީ ފޯ ދަ އެޑްމިނިސްޓްރޭޝަން އޮފް ގާޒާ' ނުވަތަ ފަލަސްތީނުގެ ޓެކްނޮކްރެޓިކް ސަރުކާރަށް ތާއީދު ކުރައްވާ ކަމަށެވެ.

ޓްރަމްޕް ހުށަހެޅުއްވި މި ރޭވުމަށް އިޒްރޭލާއި ފަލަސްތީނުގެ މުޖާހިދުންގެ ޖަމާއަތެއް ކަމަށްވާ ހަމާސް އިން މިދިޔަ އޮކްޓޯބަރު މަހު ވަނީ އެއްބަސްވެފަ އެވެ. މި ރޭވުމުގެ ދަށުން، އިންތިގާލީ މަރުހަލާގައި ޣައްޒާގެ އިދާރީ ކަންކަން ބަލަހައްޓާނީ ބައިނަލްއަގުވާމީ "ބޯޑް އޮފް ޕީސް" (ސުލްހައިގެ މަޖިލިސް) ގެ އިރުޝާދުގެ ދަށުން ހިންގާ ފަލަސްތީނުގެ ޓެކްނޮކްރެޓިކް އިދާރާއަކުންނެވެ.

އެހެން ޕޯސްޓެއްގައި ޓްރަމްޕް ވިދާޅުވީ، އޭނާ އަމިއްލަފުޅަށް ރިޔާސަތު ބަލަހައްޓަވާ "ބޯޑް އޮފް ޕީސް" މިހާރު އެކުލަވާލާފައިވާ ކަމަށާއި، އޭގެ މެންބަރުން ވަރަށް އަވަހަށް އިޢުލާން ކުރައްވާނެ ކަމަށެވެ.

އިޒްރޭލާއި ހަމާސް އިން އަންނަނީ ހަނގުރާމަ ހުއްޓާލުމުގެ އެއްބަސްވުމާ ހިލާފުވާ ކަމަށް ބުނެ އެއްބަޔަކު އަނެއްބަޔަކަށް ތުހުމަތު ކުރަމުންނެވެ. އޮކްޓޯބަރު މަހު ހަނގުރާމަ މެދުކަނޑާލި ފަހުން ވެސް، އިޒްރޭލުގެ އަނިޔާވެރި ހަމަލާތަކުގައި 440 އަށްވުރެ ގިނަ ފަލަސްތީނު ރައްޔިތުން ވަނީ ޝަހީދުކޮށްލާފަ އެވެ. އޭގެ ތެރޭގައި 100 އަށް ވުރެ ގިނަ ކުޑަކުދިން ހިމެނެއެވެ. އަނެއްކޮޅުން އިޒްރޭލުން ބުނާ ގޮތުގައި އެ ގައުމުގެ ތިން ސިފައިން ވަނީ މަރުވެފަ އެވެ.

ހަނގުރާމަ ހުއްޓާލުމުގެ އެއްބަސްވުމަށް ވަނީ ތަފާތު ގޮންޖެހުންތަކާ ކުރިމަތިވެފައެވެ. އޭގެ ތެރޭގައި، އިޒްރޭލުގެ އެންމެ ފަހު އަސީރުގެ ހަށިގަނޑު ހޯދިފައި ނުވުމާއި، މިސްރާ އިންވެގެން އޮންނަ ޣައްޒާގެ ބޯޑަރު ހުޅުވުމަށް އިޒްރޭލުން ގަސްދުގައި ލަސްކުރަމުންދިއުމާއި، އަދި ހަމާސް އިން ހަތިޔާރު ބެހެއްޓުމަށް މިހާތަނަށް އިންކާރު ކުރުން ހިމެނެ އެވެ.

ހަނގުރާމަ ހުއްޓާލުމުގެ ދެވަނަ މަރުހަލާއާ ގެން ކުރިއަށްދާއިރު، ވޮޝިންގޓަނާއި މެދުވެރިއެއްގެ ދައުރު އަދާކުރާ ބައިވެރިންނަށް ބޮޑެތި ގޮންޖެހުންތަކަކާ ކުރިމަތިލާން ޖެހޭނެ އެވެ. އޭގެ ތެރޭގައި ހަމާސްގެ ހަތިޔާރު އަތުލުމުގެ އުނދަގޫ މަސައްކަތާއި، އެކަމާ ގުޅުވައިގެން އިޒްރޭލު ސިފައިން އިތުރަށް ފަހަތަށް ޖެހުމާއި، އަދި ބައިނަލްއަގުވާމީ ސުލްހަ ބަލަހައްޓާ ފައުޖެއް އެ ސަރަހައްދުގައި ގާއިމުކުރުން ފަދަ ކަންކަން ހިމެނޭ ކަމަށް ތަޖުރިބާކާރުން ބުނެ އެވެ.