ޣައްޒާ ބެލެހެއްޓުމަށް އުފެއްދި ނޭޝަނަލް ކޮމިޓީން އެ ކޮމިޓީގެ މަގްސަދުތައް ހާމަކޮށްފި

ޣައްޒާގެ ކަންކަން ބެލެހެއްޓުމަށް އަލަށް އުފެއްދި "ނޭޝަނަލް ކޮމިޓީ ފޯ ދަ އެޑްމިނިސްޓްރޭޝަން އޮފް ޣައްޒާ" (އެން.ސީ.އޭ.ޖީ) އިން ނެރުނު ބަޔާނުގައި، ޣައްޒާ އަލުން އާރާސްތު ކުރުމަށާއި ފަލަސްތީނުގެ ރައްޔިތުންނަށް ދެމެހެއްޓެނިވި ފާގަތިކަމެއް ހޯދައިދިނުމަށް މަސައްކަތްކުރާނެކަމުގެ ޔަގީންކަން ދީފިއެވެ.

އެ ކޮމިޓީގެ ޗީފް ކޮމިޝަނަރު އަދި ފަލަސްތީން އޮތޯރިޓީގެ ކުރީގެ ޑެޕިއުޓީ މިނިސްޓަރު އަލީ ޝާތު ހޮނިހިރު ދުވަހު މި ބަޔާން އާންމުކުރައްވަމުން ވިދާޅުވީ، އޭނާގެ ފުރަތަމަ ރަސްމީ މަސައްކަތަކީ މި ބަޔާން ބަލައިގަނެ، އެއަށް އަމަލުކުރަން ފެށުން ކަމަށެވެ.

އދ. ގެ ސަލާމަތީ މަޖިލީހުގެ 2803 ވަނަ ގަރާރާއި، އެމެރިކާގެ ރައީސް ޑޮނަލްޑް ޓްރަމްޕްގެ 20 ނުކުތާގެ ސުލްހައިގެ މަޝްރޫއުގެ ދަށުން ބާރު ލިބިގެން އުފައްދާފައިވާ މި ކޮމިޓީގެ މަގްސަދަކީ، ޣައްޒާ ގައި މިހާރު ހިނގަމުންދާ ހަނގުރާމަ ހުއްޓާލުމުގެ އިންތިގާލީ މަރުހަލާ އަކީ ފަލަސްތީނުގެ ކުރިމަގުގެ ފާގަތިކަމަށް އެޅޭ ވަރުގަދަ ބިންގަލަކަށް ހެދުން ކަމަށް ރިޕޯޓުތައް ބުނެ އެވެ.

ޓްރަމްޕްގެ ޣައްޒާގެ މަޝްރޫއުގައި ބަޔާންކޮށްފައިވާ ގޮތުގައި، ފަލަސްތީނުގެ ފަންނީ މާހިރުންގެ މައްޗަށް އެކުލެވޭ މި އިދާރާގެ ކަންކަން ބަލަހައްޓާނީ ބައިނަލްއަގުވާމީ "ބޯޑް އޮފް ޕީސް" އިންނެވެ. މި ބޯޑުގެ ބޭނުމަކީ އިންތިގާލީ މަރުހަލާގައި ޣައްޒާގެ އިދާރީ ކަންކަން ސުޕަވައިޒް ކުރުމެވެ.

ރައީސް ޑޮނަލްޑް ޓްރަމްޕް ރިޔާސަތު ބަލަހައްޓަވާ "ބޯޑް އޮފް ޕީސް" ގެ އިރުޝާދުގެ ދަށުންނާއި، ޣައްޒާ އަށް ކަނޑައަޅާފައިވާ ހައި ރެޕްރެޒެންޓޭޓިވްގެ އެހީތެރިކަމާއެކު، އެ ކޮމިޓީގެ އަމާޒަކީ ހަމައެކަނި ޢުމްރާނީ ވަސީލަތްތައް ބިނާކުރުން ނޫން ކަމަށާއި، ރައްޔިތުންގެ ރޫހީ ދިރުން އާލާކުރުން ވެސް ހިމެނޭ ކަމަށް އެ ބަޔާނުގައިވެ އެވެ.

ޣައްޒާގެ ހައި ރެޕްރެޒެންޓޭޓިވްގެ މަގާމު އަދާކުރައްވާނީ ނިކޮލާއި މިލަޑެނޯވް އެވެ. ވައިޓް ހައުސް އިން ހުކުރު ދުވަހު ނެރުނު ބަޔާނެއްގައި ބުނެފައި ވަނީ، މިލަޑެނޯވް މަސައްކަތްކުރައްވާނީ "ބޯޑް އޮފް ޕީސް" އާއި އެން.ސީ.އޭ.ޖީ އާ ދެމެދު އޮންނަ މުހިންމު ގުޅުމެއްގެ ގޮތުގައި ކަމަށެވެ. އަދި ޣައްޒާގެ އިދާރީ ކަންކަމާއި، އާރާދުކުރުމުގެ މަސައްކަތްތައް ބެލެހެއްޓުމުގައި އެ ބޯޑަށް އެހީތެރިވެދީ، މަދަނީ އަދި ސަލާމަތީ ކަންކަން އޭނާ ވިލަރެސްކުރައްވާނެ ކަމަށެވެ.

މީގެ އިތުރުން، އެން.ސީ.އޭ.ޖީ އިން ވަނީ ސަލާމަތީ ކަންކަން ވަރުގަދަކުރުމަށާއި، އިންސާނީ ހައްގުތަކަށް ކޮންމެހެން ބޭނުންވާ ފެނާއި، ކަރަންޓާއި، ސިއްހީ ހިދުމަތާއި، ތައުލީމު ފަދަ އަސާސީ ހިދުމަތްތައް އިއާދަކުރުމަށް މަސައްކަތްކުރާނެ ކަމަށް ބުނެފަ އެވެ. އަދި ސުލްހަޔާއި، ޑިމޮކްރަސީ އަދި އަދުލުވެރިކަމުގެ މައްޗަށް ބިނާވެފައިވާ މުޖުތަމައެއް ބިނާކުރުމަށް ވެސް ވަނީ އިސްކަންދީފަ އެވެ.

ނަޒާހަތްތެރިކަމާއި ދެފުށް ފެންނަ އުސޫލުތަކުގެ ދަށުން މަސައްކަތްކޮށް، ޣައްޒާގެ އިގްތިސާދު ވަރުގަދަކޮށް، ވަޒީފާނެތް މީހުންނަށް އައު ފުރުސަތުތައް ހޯދައިދިނުމަކީ އެ ކޮމިޓީގެ އަމާޒެކެވެ. އަދި ސުލްހައިގެ މަގުން ފަލަސްތީނުގެ ރައްޔިތުންގެ ހައްގުތަކާއި އަމިއްލަ ނިންމުންތައް ނިންމުމުގެ ބާރު ހޯދައިދިނުމަށް މަސައްކަތްކުރާނެ ކަމަށް ވެސް އެ ބަޔާނުގައި ބުނެފައިވެ އެވެ.

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ އެން.ސީ.އޭ.ޖީ އާއެކު މަސައްކަތްކުރުމަށް އުންމީދުކުރައްވާ ކަމަށް ވިދާޅުވެފަ އެވެ. "އެކްސް" ގައި ކުރެއްވި ޕޯސްޓެއްގައި ރޫބިއޯ ވިދާޅުވީ، ޣައްޒާގެ ރައްޔިތުންނަށާއި މުޅި ސަރަހައްދަށް ރަނގަޅު މުސްތަގުބަލެއް ބިނާކުރުމަށްޓަކައި ޑރ. އަލީ ޝާތު އާއި ނޭޝަނަލް ކޮމިޓީއާ އެކު މަސައްކަތްކުރުމަށް ތައްޔާރަށް ހުންނެވި ކަމަށެވެ.