ނޮބެލް ސުލްހައިގެ އިނާމު ނުލިބުމުން ދެން ކޮންމެހެން ހަމަ އެކަނި ސުލްހަ އަށް އުޅޭކަށް ނުޖެހޭ: ޓްރަމްޕް

 ނޮބެލް ސުލްހައިގެ އިނާމު އޭނާ އަށް ލިބިވަޑައިނުގަތުމުން، މީގެ ފަހުން ހަމައެކަނި "ސުލްހަ އަށް" ވިސްނަވަން ޖެހިވަޑައިނުގަންނަވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ނޯވޭގެ ބޮޑުވަޒީރަށް ފޮނުއްވި މެސެޖެއްގައި ވިދާޅުވެއްޖެ އެވެ.

ހޯމަ ދުވަހު ނޯވޭގެ ބޮޑުވަޒީރު ޔޯނަސް ގާރ ސްޓޮރޭ އަށް ފޮނުއްވި މި މެސެޖުގައި ޓްރަމްޕް ވިދާޅުވެފައި ވަނީ، އޭނާ 8 ހަނގުރާމަ އަށް ވުރެ ގިނަ ހަނގުރާމަ ހުއްޓުވާފައިވާއިރު ވެސް، އެ ގައުމުން އޭނާ އަށް ނޮބެލް ސުލްހައިގެ އިނާމު ނުދިނުމަށް ނިންމާފައި ވާތީ، މީގެ ފަހުން ހަމައެކަނި ސުލްހައާ މެދު ވިސްނުމުގެ އެއްވެސް މަޖުބޫރުކަމެއް އޮތް ކަމަކަށް ދެކެވަޑައި ނުގަންނަވާ ކަމަށެވެ.

އޭގެ އިތުރުން ޓްރަމްޕް ވިދާޅުވީ ދެން އޭނާ ގެ ވިސްނުންފުޅު ބަހައްޓަވާނީ އެމެރިކާ އަށް މޮޅު އަދި ފައިދާ ހުރި ގޮތަށް ކަމަށެވެ.

މި މެސެޖުގެ ސައްހަކަން މިކަމާ ގުޅުންހުރި މަސްދަރަކުން އޭއެފްޕީ ނިއުސް އެޖެންސީ އަށް ކަށަވަރުކޮށްދީފައިވާ އިރު، ނޯވޭ ގެ ބޮޑުވަޒީރު ވެސް ވަނީ ނޯވޭގެ 'ވީޖީ' ނޫހަށް މި މެސެޖް ޓްރަމްޕް ފޮނުއްވިކަން ކަށަވަރުކޮށްދެއްވާފަ އެވެ.

މީގެ އިތުރުން، އެމެރިކާގެ ބާރުގެ ދަށަށް ގްރީންލޭންޑް ނުގެނެވޭހާ ހިނދަކު ދުނިޔެ އަށް ސަލާމަތްތެރިކަމެއް ނެތް ކަމަށް ވެސް ޓްރަމްޕް އެ މެސެޖުގައި ފާހަގަކުރައްވާފައިވެ އެވެ. "ގްރީންލޭންޑްގެ ފުރިހަމަ އަދި މުޅި ކޮންޓްރޯލް އަހަރެމެންނަށް ނުލިބޭހާ ހިނދަކު، ދުނިޔެ އަކީ ރައްކާތެރި ތަނެއް ނޫން،" ޓްރަމްޕް ވިދާޅުވި އެވެ.

ނޯވޭގެ ބޮޑުވަޒީރުގެ އޮފީހުން ވެސް ވަނީ މި މެސެޖުގެ ސައްހަކަން މީޑިއާތަކަށް ކަށަވަރުކޮށްދީފަ އެވެ.

ގްރީންލޭންޑަކީ ޑެންމާކުގެ ދަށުން އަމިއްލަ އިދާރީ ހިންގުމެއް އޮންނަ ސަރަހައްދެކެވެ.

ޓްރަމްޕް ގެންދަވަނީ އެއްގޮތް ނެތިއްޔާ އަނެއް ގޮތަކުން ވިޔަސް ގްރީންލޭންޑް އެމެރިކާގެ ތަނަކަށް ހައްދަވާނެ ކަމަށް ތަކުރާރުކޮށް ވިދާޅުވަމުންނެވެ.