ގްރީންލޭންޑުން ރަޝިޔާގެ ނުރައްކާތެރިކަން ދުރު ކުރަން ޖެހޭ: ޓްރަމްޕް

ގްރީންލޭންޑޫގައި މިހާތަނަށް ރަޝިޔާގެ ނުރައްކާތެރިކަން ކުޑަ ކުރެވިފައި ނުވާ ކަމަށާއި، މިހާރު މިއީ އެ ސަރަހައްދުން ރަޝިޔާގެ ނުރައްކާތެރިކަން ދުރު ކުރަން ޖެހޭ ވަގުތު ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

މިފަހަކަށް އައިސް ޓްރަމްޕް ގެންދަވަނީ ގްރީންލޭންޑު ހޯއްދެވުމުގެ ވާހަކަ ތަކުރާރުކޮށް ދައްކަވަމުންނެވެ. އަދި އެކަން ކުރުމަކީ އެމެރިކާގެ ޤައުމީ ސަލާމަތަށް ކޮންމެހެން ވެސް ބޭނުންވާ ކަމެއް ކަމަށް ޓްރަމްޕް ވިދާޅުވެފައިވެ އެވެ. އެގޮތުން އެއް ގޮތެއް ނެތިއްޔާ، އަނެއް ގޮތަކުން ވެސް އެކަން ކުރައްވާނެ ކަމަށް މީގެ ކުރިން ޓްރަމްޕް ވިދާޅުވެފައިވެ އެވެ. 

އާދީއްތަ ދުވަހު ޓްރަމްޕް ވިދާޅުވީ، ގްރީންލޭންޑުން ރަޝިޔާގެ ނުރައްކާތެރިކަން ދުރު ކުރައްވާނެ ކަމަށެވެ. އެގޮތުން ޓްރަމްޕް ވިދާޅުވީ، ރަޝިޔާގެ ނުރައްކާތެރިކަން އެ ސަރަހައްދުން ދުރު ކުރުމަކީ ޑެންމާކަށް ކުރެވިފައިވާ ކަމެއް ނޫން ކަމަށެވެ. 

ޓްރަމްޕް މިހެން ވިދާޅުވެފައި ވީ ނަމަވެސް، ޑެންމާކު އަދި ގްރީންލޭންޑުގެ ލީޑަރުން ވަނީ ޓްރަމްޕްގެ ވިސްނުންފުޅާ ދެކޮޅު ހައްދަވައިފަ އެވެ. އެގޮތުން ގްރީންލޭންޑަކީ ވިއްކާނެ ސަރަހައްދެއް ވެސް ނޫން ކަމަށް، އެ ޤައުމު ތަކުގެ ލީޑަރުން ވަނީ ވިދާޅުވެފަ އެވެ. ޑެންމާކު އަދި ގްރީންލޭންޑުގެ އިތުރުން، ބައިނަލްއަޤުވާމީ މުޖުތަމައު ވެސް ވަނީ ޓްރަމްޕްގެ ވާހަކަތަކާ ދެކޮޅު ހަދައިފަ އެވެ. 

ގްރީންލޭންޑަކީ ޑެންމާކުގެ މިނިވަން ސަރަހައްދެއް ކަމަށްވާއިރު، އެ ސަރަހައްދުގެ ރައްޔިތުންނަށް އެ މީހުންގެ ކަންކަން ބެލެހެއްޓުމުގެ ބާރު ލިބިފައިވެ އެވެ. ނަމަވެސް، ފޮރިން ޕޮލިސީ އާއި ސަލާމަތީ ކަންކަން ބެލެހެއްޓުމުގެ ބާރު އޮތީ ޑެންމާކުގެ އަތުގަ އެވެ. 

މީގެ ކުރިން ޓްރަމްޕް ވިދާޅުވެފައި ވަނީ، ގްރީންލޭންޑަކީ ލޮކޭޝަންގެ ގޮތުން މުހިންމު ސަރަހައްދެއް ކަމަށާއި، އެ ސަރަހައްދު އެމެރިކާގެ ބާރުގެ ދަށަށް ގެނެސް، އެމެރިކާގެ ބެލުމުގެ ދަށުން ކަންކަން ކުރިއަށް ގެންދަން ބޭނުންފުޅުވާ ކަމަށެވެ. 

ޓްރަމްޕްގެ މި ވާހަކަތަކާ ގުޅިގެން އެމެރިކާ އާއި ޑެންމާކާ ދެމެދު އޮތް ގުޅުން އަސަރު ކުރުމުގެ ފުރުސަތު ވަރަށް ބޮޑު ކަމަށް މާހިރުން ވަނީ ފާހަގަ ކޮށްފަ އެވެ. ބައެއް މާހިރުން ފާހަގަ ކޮށްފައިވާ ގޮތުގައި، ގްރީންލޭންޑާ ބެހޭ ގޮތުން ޓްރަމްޕް ދައްކަވަނީ ބައިނަލްއަޤުވާމީ ޤާނޫނާ ވެސް ޚިފާލު ވާހަކަ ތަކެކެވެ.