ހަ ވަނަ މޮޅާ އެކު އާސެނަލް އެއް ވަނައިގައި

ޔުއެފާ ޗެމްޕިއަންސް ލީގުގައި ކުލަބު ބްރޫޖްއާ ދެކޮޅަށް ކުޅުނު މެޗުން މޮޅުވެ، އާސެނަލް އިން އެ ޓީމުގެ މޮޅުވުމުގެ ރެކޯޑު ދަމަހައްޓައިފި އެވެ.

ކުލަބު ބްރޫޖްގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު އާސެނަލް އިން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި އާސެނަލް އިން އެއް ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ މެޗުގެ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 25 ވަނަ މިނެޓުގައި އާސެނަލް އަށް ލަނޑު ޖަހައި ލީޑު ނަގައިދިނީ ނޯނީ މަޑުއޭކޭ އެވެ. އޭގެ ފަހުން މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި މަޑުއޭކާ ވަނީ އާސެނަލްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އޭގެ ނުވަ މިނެޓު ފަހުން މެޗުގައި އާސެނަލްގެ ތިން ވަނަ ލަނޑު ޖެހީ ގަބްރިއެލް މާޓިނެލީ އެވެ.

މޮޅާއެކު އާސެނަލް އިން ވަނީ ލީގު ތާވަލްގެ އެއް ވަނަ މަގާމުގައި ތިން ޕޮއިންޓުގެ ލީޑެއް ނަގައިފަ އެވެ. މިހާތަނަށް ކުޅެފައިވާ ހަ މެޗުން ވެސް މޮޅުވެ، އާސެނަލް އެއް ވަަނައިގައި އޮތީ 18 ޕޮއިންޓާ އެކު އެވެ. މި ސީޒަންގެ ޗެމްޕިއަންސް ލީގުގައި މިހާާތަނަށް މެޗަކުން ބަލި ނުވެ އޮތް ހަމައެކަނި ޓީމަކީ ވެސް އާސެނަލް އެވެ.

މެޗަށް ފަހު ވާހަކަ ދައްކަމުން އާސެނަލްގެ ކޯޗު މިކޭލް އާޓެޓާ ބުނެފައި ވަނީ، ޗެމްޕިއަންސް ލީގުގައި ރަށުން ބޭރުގައި ކުޅޭއިރު މޮޅުވުމަކީ އިންތިހާ އަށް އުނދަގޫ ކަމެއް ކަމަށެވެ. ކުލަބު ބްރޫޖްއާ ދެކޮޅަށް ކުޅުނު މެޗުން މޮޅުވެ އާސެނަލް އިން ރެކޯޑު ދެމެހެއްޓުމަކީ ވަރަށް ރަނގަޅު ކަމެއްގެ ގޮތުގައި އާޓެޓާ ވަނީ ފާހަގަ ކޮށްފަ އެވެ. އަދި އާސެނަލްގެ ޓީމުން ވަރަށް ގިނަ ރަނގަޅު ކަންކަން ވެސް ފެންނަމުން އަންނަ ކަމަށް އޭނާ ބުންޏެވެ.

މީގެ އިތުރުން އާޓެޓާ ބުނީ ބައެއް ކުޅުންތެރިން ނެތް ނަމަވެސް، އާސެނަލްގެ ކުޅުންތެރިން އެކުވެގެން ވަރަށް ރަނގަޅަށް މަަސައްކަތް ކޮށްފައިވާ ކަމަށެވެ. ޓީމެއްގެ ހައިސިއްޔަތުން އަދި ވަކި ވަކި ކުޅުންތެރިންގެ ފެންވަރުގައި ވެސް ދައްކާފައިވާ ކުޅުމާ މެދު ވަރަށް ބޮޑަށް ހިތްހަމަ ޖެހިގެން ހުރި ކަމަށް އާޓެޓާ ވަނީ ބުނެފަ އެވެ.

ޗެމްޕިއަންސް ލީގު މެޗާ ކުރިމަތި ލުމުގެ ކުރިން، އިނގިރޭސި ޕްރިމިއާ ލީގުގައި އެސްޓަން ވިލާއާ ދެކޮޅަށް ކުޅުނު މެޗުން އާސެނަލް ބަލިވެފައިވާއިރު، އެކަމަށް އިޝާރާތްކޮށް އާޓެޓާ ބުނީ ބައްޔަކަށް ފަހު ކޮންމެހެން ވެސް ދެން ބޭނުން ވާނީ ކުރިއަށް އޮންނަ މެޗުން މޮޅުވާން ކަމަށެވެ. އާޓެޓާ ބުނީ ބައްޔަށް ފަހު ޗެމްޕިއަންސް ލީގުގެ މެޗާ އާސެނަލް ކުރިމަތިލީއިރު، ދެ ކުޅުންތެރިން މަދު ކަމަށެވެ. ނަމަވެސް، ޓީމުގެ ކުޅުމުން ކުޅުންތެރިން އެކަން ނުދައްކާ ކަމަށް އޭނާ ބުންޏެވެ.

އިތުރަށް އާޓެޓާ ބުނީ އާސެނަލް ކުރިއަށްދާ ގޮތާ މެދު އޭނާ ހިތްހަމަ ޖެހޭ ކަމަށާއި، ރަނގަޅު ކުރަން ހުންނަ ކަންކަން އަބަދު ވެސް ފާހަގަ ވަމުން އަންނަ ކަމަށެވެ. އެއާއެކު، އެކަންކަން ރަނގަޅު ކުރުމަށް އާސެނަލް އިން ވަރަށް ބޮޑަށް މަސައްކަތް ކުރާނެ ކަމަށާއި، އެއް ދުވަހުން އަނެއް ދުވަހަށް ޓީމު ވަރުގަދަ ވުމަށް ބޭނުންވާ ކަމަށެވެ. މިވަގުތު އާސެނަލްގައި އޮތް ރޫޙާއި، ކުޅުންތެރިންގެ މަސައްކަތަށް ބަލާއިރު އާސެނަލް އަށް ރަނގަޅު މިސްރާބުގައި އޮވެވޭނެ ކަަމަށް އޭނާ ބުންޏެވެ.