ފަހަތުން އަރައި ސިޓީ އިން ރެއާލް ބަލިކޮށްފި

ޔުއެފާ ޗެމްޕިއަންސް ލީގުގައި ރެއާލް މެޑްރިޑްއާ ދެކޮޅަށް ކުޅުނު މެޗުން މެންޗެސްޓަރ ސިޓީ މޮޅުވެއްޖެ އެވެ.

ރެއާލްގެ އަމިއްލަ ދަނޑުގައި ބުދަ ދުވަހުގެ ރޭ ދަންވަރު ކުޅުނު މެޗު ސިޓީ އިން ކާމިޔާބު ކުރީ 2-1 އިންނެވެ. މެޗުގައި ރެއާލް އިން ލަނޑު ޖަހައި ކުރި ހޯދާފައި ވަނިކޮށް، ސިޓީ އިން ވަނީ ފަހަތުން އަރައި ދެ ލަނޑު ޖަހައިގެން މެޗުން މޮޅުވެފަ އެވެ. މެޗުގައި ދެ ޓީމުން ވެސް ލަނޑުތައް ޖެހީ މެޗުގެ ފުރަތަމަ ހާފުގަ އެވެ.

މެޗުގެ ފުރަތަމަ ހާފުގެ 28 ވަނަ މިނެޓުގައި ރެއާލް އަށް ލީޑު ނަގަައިދިނީ ބްރެޒިލްގެ ރޮޑްރީގޯ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ޖޫޑް ބެލިންހަމް އެވެ. އޭގެ ފަހުން ވެސް ރެއާލް އިން ވަނީ އިތުރު ލަނޑު ޖަހަން މަސައްކަތް ކޮށްފަ އެވެ.

ނަމަވެސް މެޗުގެ 35 ވަނަ މިނެޓުގައި ސިޓީ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު ސިޓީ އަށް ޖަހައިދިނީ ނިކޯ އޯރައިލީ އެވެ. އޭނާ އެ ލަނޑު ޖެހީ ޖޮސްކާ ގްވާޑިއޯލް ތަނަވަސްކޮށްދިން ފުރުސަތެއްގަ އެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ސިޓީ އަށް ލީޑު ނަގައިދިނީ ނޯވޭގެ ފޯވާޑު އާލިން ހާލަަންޑް އެވެ. އެއީ ސިޓީގެ ގޯލު އޭރިޔާ ތެރެއިން، ރެއާލްގެ ޑިފެންޑަރު އެންޓޯނިއޯ ރޫޑިއާ، ހާލަންޑް އަށް ކުރި ފައުލަކާ ގުޅިގެން ދިން ޕެނަލްޓީ އެކެވެ.

މެޗުން މޮޅުވެ ސިޓީ އިން ވަނީ ލީގު ތާވަލްގެ ހަތަރު ވަނަ މަގާމަށް ޖެހިލައިފަ އެވެ. މިހާތަނަށް ކުޅެފައިވާ ހަ މެޗުން އެ ޓީމަށް ލިބެނީ 13 ޕޮއިންޓެވެ. ސިޓީ އަތުން ބަލިވި ރެއާލް އޮތީ، މިހާތަނަށް އެ ޓީމު ކުޅެފައިވާ ހަ މެޗުން 12 ޕޮއިންޓާ އެކު ހަތް ވަނައިގަ އެވެ.

މެޗަށް ފަހު އޮތް ނޫސްވެރިންގެ ބައްދަލުވުމުގައި، ސިޓީ އަށް މިފަހަރުގެ ޗެމްޕިއަންސް ލީގު ކާމިޔާބު ކުރެވިދާނެތޯ ވަނީ ގާޑިއޯލާއާ ސުވާލު ކޮށްފަ އެވެ. އެއާާ އެކު ގާޑިއޯލާ ބުނެފައި ވަނީ، ސިޓީ އޮތީ އެކަމަށް ތައްޔާރަށް ނޫން ކަމަށާއި، އެއީ ވަރަށް ދުރުގައި އޮތް ކަމެއް ކަމަށެވެ.

ގާޑިއޯލާ ބުނެފައި ވަނީ ސިޓީގެ ޙާލަތު މަޑު މަޑުން ރަނގަޅު ވަމުން އައި ނަމަވެސް، އަދި ވެސް އެ ޓީމުން ހާސިލު ކުރަން ޖެހޭ ވަރަށް ގިނަ ކަންކަން ހުރި ކަމަށެވެ. ސިޓީ އޮތީ "ވަރަށް ދުރުގައި" ކަމަށް ފާހަގަކޮށް ގާޑިއޯލާ ބުނީ، އަންނަ އަހަރުގެ ފެބްރުވަރީ މަހާ ހަމައަށް ދާއިރު ސިޓީ ރަނގަޅު ވާނެ ކަމަށް އުންމީދު ކުރެވޭ ކަމަށެވެ.

މީގެ އިތުރުން ގާޑިއޯލާ ބުނީ ބައެއް ފަހަރު އެންމެ އުންމީދު ނުކުރެވޭ މެޗުން ވެސް ސިޓީ ބަލިވެފައި ހުރި ކަމަށެވެ. އެހެން ނަމަވެސް، ސިޓީގެ ކުޅުންތެރިން މިހާރު ވަރަށް ބޮޑު ހިތްވަރެއް ލަމުން އަންނަ ކަމަށާއި، ކުޅުންތެރިންގެ ރޫޙު ރަނގަޅު ކަމަށެވެ. އެކަމަކު ވެސް، ސިޓީ އިން ރަނގަޅު ކުރަން ޖެހޭ ވަރަށް ގިނަ ކަންކަން އަދި ވެސް ހުރި ކަމަށް އޭނާ ބުންޏެވެ.