އެމްބާޕޭގެ ދެ ލަނޑާ އެކު، މޮނާކޯ ބަލިކޮށް ރެއާލް ދެ ވަނައިގައި

ޔުއެފާ ޗެމްޕިއަންސް ލީގުގައި މޮނާކޯއާ ދެކޮޅަށް ކުޅުނު މެޗުން މޮޅުވެ، ރެއާލް މެޑްރިޑުން ލީގު ތާވަލްގެ ދެ ވަނަ މަގާމަށް ޖެހިލައިފި އެވެ.

ރެއާލްގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 6-1 އިންނެވެ. މެޗުގެ ފުރަތަމަ ހާފުގައި ރެއާލް އިން ދެ ލަނޑު ޖެހިއިރު، އަނެއް ހަތަރު ލަނޑު ޖެހީ ދެ ވަނަ ހާފުގަ އެވެ. މި ހާފުގައި މޮނާކޯ އިން ވެސް ވަނީ ލަނޑެއް ޖަހައިފަ އެވެ. 

މެޗު ފަށައިގެން ފަސް ވަނަ މިނެޓުގައި ރެއާލް އަށް ލީޑު ނަގައިދިނީ ފްރާންސްގެ ކެޕްޓަން ކީލިއަން އެމްބާޕޭ އެވެ. އެ ލަނޑު އޭނާ ޖެހީ ފެޑެރިކޯ ވަލްވާޑޭ ތަނަވަސްކޮށްދިން ފުރުސަތެއްގަ އެވެ. އޭގެ ފަހުން މެޗުގެ 26 ވަނަ މިނެޓުގައި އެމްބާޕޭ ވަނީ އިތުރު ލަނޑެއް ޖަހައި ރެއާލްގެ ލީޑު ފުޅާ ކޮށްފަ އެވެ. އެ ލަނޑު އެމްބާޕޭ ޖެހީ ވިނީޝިއުސް ޖޫނިއާ ތަނަވަސްކޮށްދިން ފުރުސަތެއްގަ އެވެ. 

އޭގެ ފަހުން މެޗުގެ ދެ ވަނަ ހާފު ފަށައިގެން ހަ ވަނަ މިނެޓުގައި ފްރާންކޯ މަސްޓަންޓޫނޯ ވަނީ ރެއާލްގެ ތިން ވަނަ ލަނޑު ޖަހައިފަ އެވެ. އެ ލަނޑު ޖަހަން މަސްޓަންޓޫނޯ އަށް ވެސް ފުރުސަތު ތަނަވަސްކޮށްދިނީ ވިނީޝިއުސް އެވެ. އޭގެ ހަތަރު މިނެޓު ފަހުން ރެއާލްގެ ހަތަރު ވަނަ ލަނޑަކީ، މޮނާކޯގެ ތިލޯ ކެރާ އަތުން ބައި ކޮޅަށް ވަތް ލަނޑެކެވެ. މެޗުގައި ރެއާލްގެ ފަސް ވަނަ ލަނޑު ވިނީޝިއުސް ޖެހީ 63 ވަނަ މިނެޓުގަ އެވެ. 

ރެއާލް އިން ފަސް ލަނޑު ޖެހި ފަހުން، މެޗުގައި މޮނާކޯގެ ހަމައެކަނި ލަނޑު 72 ވަނަ މިނެޓުގައި ޖެހީ ޖޯޑަން ޓެޒޭ އެވެ. އޭގެ އަށް މިނެޓު ފަހުން ޖޫޑް ބެލިންހަމް ވަނީ ރެއާލްގެ ހަ ވަނަ ލަނޑު ޖަހައިފަ އެވެ. އެ ލަނޑު ޖަހަން ބެލިންހަމް އަށް ފުރުސަތު ތަނަވަސްކޮށްދިނީ ވަލްވާޑޭ އެވެ. 

މިއީ ރެއާލްގެ ކޯޗު ކަމާ  އަލްވާރޯ އާބެލޯ ހަވާލުވި ފަހުންް ޗެމްޕިއަންސް ލީގުގައި އެ ޓީމުން ކުޅުނު ފުރަތަމަ މެޗެވެ. މޮޅާ އެކު ރެއާލް ދެ ވަނައިގައި އޮތީ މިހާތަނަށް ކުޅެފައިވާ ހަތް މެޗުން 15 ޕޮއިންޓާ އެކު އެވެ.