ޚާމަނާއީ އަކީ ބަލި މީހެއް، އީރާން އޮތީ އައު ލީޑާޝިޕް އަކަށް ބޭނުން ވެފައި: ޓްރަމްޕް

އީރާން އޮތީ އައު ލީޑާޝިޕް އަކަށް ބޭނުންވެފައި ކަމަށާއި، އައު ލީޑާޝިޕެއްގެ ވަގުތު އައިސް ޖެހިފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ޓްރަމްޕް މިހެން ވިދާޅުވެފައި ވަނީ، އިޤްތިސާދީ ދަތި ކަމުގެ ސަބަބުން އީރާންގައި ކުރިއަށް ދިޔަ މުޒާހަރާ ތަކަށް މަޑު ޖެހުމެއް އައިސްފައިވާ ވަގުތެއްގަ އެވެ. އީރާންގައި ކުރިއަށް ދިޔަ މުޒާހަރާ ތަކަށް މީގެ ކުރިން ޓްރަމްޕް އާއި އެމެރިކާ އިން ވަނީ ވަރަށް ބޮޑަށް ހިތްވަރު ވެސް ދީފަ އެވެ. 

އެމެރިކާގެ ޕޮލިޓިކޯ އަށް ދެއްވި އިންޓަވިޔުއެއްގައި ޓްރަމްޕް ވިދާޅުވީ، އީރާން އަށް އައު ލީޑާޝިޕެއް ބޭނުންވާ ވަގުތު އައިސް ޖެހިފައިވާ ކަމަށެވެ. 

މި ވާހަކަތައް ޓްރަމްޕް ދައްކަވާފައިވާއިރު، މުޒާހަރާ ތަކުގެ ސަބަބުން އީރާން ވަރަށް ބޮޑަށް ހަލަބޮލި ވެގެން ދިޔަ އެވެ. އަދި އީރާންގެ ރޫޙާނީ ލީޑަރު އާޔަތުﷲ އަލީ ޚާމަނާއީ ވަނީ ޓްރަމްޕް އަށް ތުހުމަތު ތަކެއް ކުރައްވައިފަ އެވެ. އެގޮތުން އީރާންގައި ފެށުނު މުޒާހަރާ ތަކުގެ ފަހަތުގައި އޮތީ އެމެރިކާ އާއި އިސްރާއީލް ކަމަށާއި، އެކަމުގެ ސަބަބުން ލިބުނު ގެއްލުން ތަކުގެ ޒިންމާ ޓްރަމްޕް ނަންގަވަން ޖެހޭނެ ކަމަށް ޚާމަނާއީ ވިދާޅުވެފައިވެ އެވެ. 

މުޒާހަރާ ތަކުގައި ބައިވެރިވި މީހުންނާ ދެކޮޅަށް އީރާން އިން ހަމަލާ ދީ، މީހުން ހައްޔަރުކޮށް، އަދި ބަޔަކު މަަރައިފި ނަމަ، އެމެރިކާ އިން އެކަމާ ދެކޮޅަށް ހަމަލާ ދޭނެ ކަމުގެ އިންޒާރު ވެސް ޓްރަމްޕް އޮތީ ދެއްވައިފަ އެވެ. ނަމަވެސް، މިދިޔަ ހުކުރު ދުވަހު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވަނީ އީރާންގެ ލީޑާޝިޕް އަށް ޝުކުރު އަދާ ކުރައްވައިފަ އެވެ. އެގޮތުން ގިނަ އަދަދެއްގެ ބަޔަކަށް މަރުގެ އަދަބު ދިނުމަށް ނިންމި ނިންމުން ބާތިލު ކޮށްފައިވާތީ، އެކަމަށް ޝުކުރު އަދާ ކުރައްވާ ކަަމަށް ޓްރަމްޕް ވިދާޅުވި އެވެ.

ނަމަވެސް، އީރާން އިން ބުނެފައި ވަނީ އެއްވެސް ބަޔަކަށް މަރުގެ އަދަބު ދިނުމުގެ ވިސްނުމެއް އަދި ޕްލޭނެއް ވެސް ނެތް ކަމަށެވެ. 

ޕޮލިޓިކޯގެ އިންޓަވިޔުގައި ޓްރަމްޕް ވަނީ ޚާމަނާއީ އަށް ވަރަށް ބޮޑަށް ފާޑު ވިދާޅުވެފަ އެވެ. އަދި ޚާމަނާއީ އަކީ ބަލި މީހެއްް ކަމަށާއި، އީރާންގެ ވެރިން ވެރިކަން ކުރަނީ ރައްޔިތުން ބަލިކަށި ކޮށްގެން ކަމަށް ޓްރަމްޕް ވިދާޅުވި އެވެ. އެގޮތުން ޤައުމެއްގެ ލީޑަރުގެ ހައިސިއްޔަތުން ޚާމަނާއީ ކުށްވެރި ވަނީ، ޤައުމު ފުރިހަމަ އަށް ހަލާކު ކޮށްފައިވާތީ ކަމަށް ޓްރަމްޕް ވިދާޅުވި އެވެ. 

ޓްރަމްޕް ވިދާޅުވެފައި ވަނީ ލީޑާޝިޕް އަކީ ރައްޔިތުން ބިރު ގަތުމާއި، މަރާ ގުޅުން ހުރި ކަމެއް ނޫން ކަމަށެވެ. އެއީ އިހުތިރާމް އާއި، ބަދަހު ކަމާ ގުޅުން ހުރި ކަމެއް ކަމަށް ވެސް ޓްރަމްޕް ވިދާޅުވެފަ އެވެ. ޚާމަނާއީ އަކީ ބަލި މީހެއް ކަމަށް އިޝާރާތް ކުރައްވައި ޓްރަމްޕް ވިދާޅުވީ، ޤައުމު ރަނގަޅަށް ހިންގައި މީހުން މެރުން ހުއްޓާލަން ޖެހޭ ކަމަށެވެ. 

ޚާމަނާއީ އަށް ފާޑު ވިދާޅުވެ، އީރާންގެ ލީޑާޝިޕް ބަދަލު ވާން ޖެހޭ ކަމަށް ޓްރަމްޕް ވިދާޅުވެފައިވާއިރު، އެމެރިކާ އިން ބޭނުން ވަނީ އީރާންގެ ވެރިކަން ބަދަލު ކުރަން ކަމަށް މީގެ ކުރިން ވެސް އީރާން އިން ވަނީ ތުހުމަތު ކޮށްފަ އެވެ. އަދި އެމެރިކާގެ ކުރިމަތީގައި ކުޑަ ކަކޫ ނުޖަހާނެ ކަމަށް ޚާމަނައީ އަންނަނީ ތަކުރާރުކޮށް ވިދާޅުވަމުންނެވެ.