ގްރީންލޭންޑް އެމެރިކާ އިން ހޯދުމަށް ކުރާ މަސައްކަތައް އެއްބާރުލުން ނުދޭ ގައުމުތަކަށް އަދަބު ދޭނެ ކަމަށް ޓްރަމްޕް ވިދާޅުވުމުން އެކަމަށް ވިލާތުން ރައްދު ދީފި
ޓެކްސް ބޮޑުކުރާނެ ކަމަށް އެމެރިކާ އިން ދީފައިވާ އިންޒާރާ މެދު އަމަލުކުރާނެ ގޮތެއް ނިންމުމަށްޓަކައި، ވިލާތުގެ އިއްތިހާދުގެ 27 ގައުމުގެ ސަފީރުން އާދީއްތަ ދުވަހު ކުއްލި ބައްދަލުވުމެއް ބޭއްވުމަށް ވަނީ ހަމަޖެހިފައި.
ޔޫރަޕިއަން ޔޫނިއަން އަދި އެމެރިކާގެ ދިދަ | ގެޓީ އިމޭޖަސް
އެމެރިކާ އަށް ގްރީންލޭންޑް ހޯދުމުގެ ފުރުސަތު ތަނަވަސް ކޮށްދެންދެން، ވިލާތުގެ އިއްތިހާދުގެ ގައުމުތަކުން އެމެރިކާ އަށް އެތެރެކުރާ މުދަލުން ނަގާ ޓެކްސް (ޓެރިފް) ބޮޑުކުރާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވުމާ ގުޅިގެން، މިއީ އިގްތިސާދީ ގޮތުން "ނުރައްކާތެރި ދަށު ދަރަޖައަކަށް" ކަންކަން ހިނގައިދާނެ ކަމެއް ކަމަށް ވިދާޅުވެ ވިލާތުގެ އިއްތިހާދުގެ ލީޑަރުން ހޮނިހިރު ދުވަހު އިންޒާރު ދެއްވައިފި އެވެ.
ޔޫރަޕިއަން ކޮމިޝަންގެ ރައީސް އުރުސުލާ ވޮން ޑަރ ލޭޔަން އާއި ޔޫރަޕިއަން ކައުންސިލްގެ ރައީސް އެންޓޯނިއޯ ކޮސްޓާ އެކްސް ގައި ކުރެއްވި ޕޯސްޓުތަކެއްގައި ވިދާޅުވީ، "ޓެކްސް ބޮޑުކުރުމުގެ ސަބަބުން އެޓްލާންޓިކްގެ ދެބިތުގެ ގުޅުމަށް ބުރޫ އަރައި، ކަންކަން ނުރައްކާތެރި މިސްރާބަކަށް ހިނގައިދާނެ" ކަމަށެވެ. އަދި ވިލާތުގެ ގައުމުތައް އޮންނާނީ އެކަތިގަނޑެއްގެ ގޮތުގައި ކަމަށާއި، ގައުމުތަކުގެ މިނިވަންކަމާއި އިސްތިގުލާލު ހިމާޔަތް ކުރުމުގައި ދެމިތިބޭނެ ކަމަށް ވެސް އެ ބޭފުޅުން ވިދާޅުވި އެވެ.
އިއްތިހާދުގެ އެންމެ އިސް ޑިޕްލޮމެޓް ކާޔަ ކާލަސް ވިދާޅުވީ، ޓެކްސް ބޮޑުކުރުމުގެ ސަބަބުން އެޓްލާންޓިކް ކަނޑުގެ ދެފަރާތުގެ ގައުމުތަކުގެ ތަނަވަސްކަމަށް ގެއްލުން ލިބޭނެ ކަމަށެވެ. އަދި މީގެ ސަބަބުން، ޔޫކްރެއިން ގައި ރަޝިޔާ ކުރަމުންދާ ހަނގުރާމަ ހުއްޓުވުމަށް ވިލާތުން ކުރަމުންދާ "މައިގަނޑު މަސައްކަތަށް" ސަމާލުކަން ކުޑަވެގެންދާނެ ކަމަށްވެސް އޭނާ ފާހަގަކުރެއްވި އެވެ.
"މިއީ ޗައިނާ އާއި ރަޝިޔާ އަށް ލިބޭނެ ވަރަށް ބޮޑު ފުރުސަތެއް. އެކުވެރި ގައުމުތަކުގެ މެދުގައި އުފެދޭ ބައިބައިވުންތަކުގެ ފައިދާ އެންމެ ބޮޑަށް ކުރާނީ އެ ގައުމުތަކަށް،" ކަލަސް ވިދާޅުވި އެވެ.
އޭނާ އިތުރަށް ވިދާޅުވީ، ޓެކްސް ބޮޑުކުރުމުގެ ސަބަބުން ވިލާތާއި އެމެރިކާ ވެސް ފަގީރުވެ، ދެފަރާތުގެ މެދުގައި އޮތް ތަނަވަސްކަމަށް ބުރޫއަރާނެ ކަމަށެވެ. އަދި ގްރީންލޭންޑްގެ ރައްކާތެރިކަމާ މެދު ކަންބޮޑުވުމެއް އޮތް ނަމަ، އެކަމާ ބެހޭގޮތުން ނޭޓޯގެ ތެރެއިން މަޝްވަރާ ކުރެވިދާނެ ކަމަށްވެސް އޭނާ ވިދާޅުވި އެވެ.
ޓެކްސް ބޮޑުކުރާނެ ކަމަށް ދީފައިވާ އިންޒާރާ މެދު އަމަލުކުރާނެ ގޮތެއް ނިންމުމަށްޓަކައި، ވިލާތުގެ އިއްތިހާދުގެ 27 ގައުމުގެ ސަފީރުން އާދީއްތަ ދުވަހު ކުއްލި ބައްދަލުވުމެއް ބޭއްވުމަށް ވަނީ ހަމަޖެހިފަ އެވެ.
