ޖަރުމަނަށް ކުރައްވަން އޮތް ދަތުރުފުޅު އަލް ޝަރާ ކެންސަލް ކުރައްވައިފި

ސީރިއާގެ ރައީސް އަޙުމަދު އަލް ޝަރާ ޖަރުމަނަށް ކުރައްވަން ހަމަޖެހިފައި އޮތް ދަތުރުފުޅު ކެންސަލް ކުރައްވާފައިވާ ކަަމަށް ޖަރުމަނު ސަރުކާރުން ހާމަ ކޮށްފި އެވެ. 

ޖަރުމަނު ސަރުކާރުގެ ތަރުޖަމާނަކު އާދީއްތަ ދުވަހު ވިދާޅުވީ، އަންގާރަ ދުވަހު ޖަރުމަނަށް ކުރައްވަން އޮތް ދަތުރުފުޅު ކެންސަލް ކުރައްވާފައިވާ ކަމަށެވެ. އެ ދަތުރުފުޅުގައި ސީރިއާގެ ރައްޔިތުން އަނބުރާ އެ މީހުންގެ ޤައުމަށް ފޮނުވުމުގެ މަސައްކަތުގައި ޖަރުމަނުގެ ދައުރާ ގުޅޭ ގޮތުން މަޝްވަރާ ކުރުމަށް ހަމަޖެހިފައިވާ ކަމަށް ވެސް ހާމަ ކޮށްފައިވެ އެވެ. 

އާދީއްތަ ދުވަހު އަލް ޝަރާ ވަނީ، ކުރުދީންގެ ލީޑާޝިޕްގެ ދަށުން ހިންގާ ސީރިއަން ޑިމޮކްރެޓިކް ފޯސަސްގެ އިސްވެރިޔާ މަޒްލޫމް އަބްދީއާ އެކު އެއްބަސްވުމަކަށް އައިސްފައިވާ ކަަމަށް އިއުލާން ކުރައްވައިފަ އެވެ. އެ އެއްބަސްވުމުގައި ސަރުކާރުގެ ސިފައިން އުތުރާއި، އިރުމަތީ ކުރުދީން ކޮންޓްރޯލް ކުރާ ސަރަހައްދު ތަކަށް ދިޔުމަށް ފަހު، ހަނގުރާމަ ހުއްޓުމަށް ހިމެނެ އެވެ. 

އެކަމާ ގުޅޭ ގޮތުން އަލް ޝަރާ ވިދާޅުވެފައި ވަނީ، އެއްބަސްވުމުގެ ތަފްސީލުތައް ފައިނަލް ކުރުމަށް ހޯމަ ދުވަހު އަބްދީއާ ބައްދަލު ކުރައްވާނެ ކަމަށެވެ. 

ދިގު މުއްދަތެއް ވަންދެން ސީރިއާގައި ވެރިކަން ކުރަމުން އައި ބަޝާރު އަލް އަސަދުގެ ވެރިކަން ވައްޓާލުމަށް ފަހު، ސީރިއާގެ ރައީސް ކަމަށް އަލް ޝަރާ ވަޑައިގެންނެވީ 2024 ވަނަ އަހަރު އެވެ. އޭގެ ފަހުން ޖަރުމަނަށް ކުރައްވާ ފުރަތަމަ ދަތުރުފުޅުގައި އެ ޤައުމުގެ ޗާންސެލަރު ފްރެޑްރިކް މާޒް އާއި، އެ ޤައުމުގެ ރައީސް ފްރޭންކް ވޯލްޓާ ސްޓައިންމައިއާ، އަލް ޝަރާ ބައްދަލު ކުރައްވާ ގޮތަށް ވެސް އޮތީ ހަމަޖެހިފަ އެވެ.

ޖަރުމަނު ސަރުކާރުގެ ތަރުޖަމާނަކު ފާއިތުވި ހަފްތާގައި ވިދާޅުވެފައި ވަނީ، ސީރިއާގެ އައު ސަރުކާރާ އެކު ގުޅުން ބަދަހިކޮށް، ގުޅުން ވަރުގަދަ ކުރުމަށް ޖަރުމަނުން އޮތީ ތައްޔާރަށް ކަމަށެވެ.