މޮސްކޯ ސަރަހައްދަށް ޔޫކްރެއިނުން ޑްރޯން ފުންޏެއް އޮއްސާލައިފި

މޮސްކޯ ސަރަހައްދަށް އަމާޒުކޮށް 600 އަށްވުރެ ގިނަ ޑްރޯން ހަމަލާ ދީފައިވާ ކަމަށް ރަޝިޔާއިން ބުނެފި އެވެ.

ރަޝިޔާގެ އޮފިޝަލުން ރިޕޯޓްކޮށްފައިވާ ގޮތުގައި، ރޭގަނޑުގެ ވަގުތެއްގައި މޮސްކޯއަށް އަމާޒުކޮށް 620 އަށްވުރެ ގިނަ ޑްރޯން ހަމަލާ ވަނީ ފޮނުވާލާފަ އެވެ. މިއީ ފާއިތުވި އަހަރުތަކުގެ ތެރޭގައި ޔޫކްރޭނުން ރަޝިޔާގެ ވެރިރަށަށް ދިން އެންމެ ވަރުގަދަ އެއް ހަމަލާ ކަމަށް ބެލެވެ އެވެ.

މޮސްކޯގެ މޭޔަރު ސަރްގޭ ސޮބްޔަނިން ވިދާޅުވި ގޮތުގައި، ހޯމަ ދުވަހުގެ އިރުއޮއްސުނު ވަގުތުން ފެށިގެން އަންގާރަ ދުވަހުގެ ފަތިހު 5:00 (ޖީއެމްޓީން 02:00) އާ ހަމައަށް، ވެރިރަށުގެ ސަރަހައްދަށް އަމާޒުވި 180 ޑްރޯން ރަޝިޔާގެ ދިފާއީ ބާރުތަކުން ވަނީ ވައްޓާލާފަ އެވެ. އަދި އޭގެ ފަހުން ވެރިރަށާ ދިމާލަށް ދަތުރުކުރި އިތުރު 17 ޑްރޯން ވައްޓާލާފައިވާ ކަމަށްވެސް އޭނާ ވިދާޅުވި އެވެ. ރަޝިޔާގެ ދައުލަތުގެ ނިއުސް އެޖެންސީ "ޓާސް" އިން ސިފަކޮށްފައިވާ ގޮތުގައި، މިއީ ފާއިތުވި ދެ އަހަރު ދުވަހުގެ ތެރޭގައި މޮސްކޯއަށް އަމާޒުކޮށް ދިން އެންމެ ބޮޑު ޑްރޯން ހަމަލާ އެވެ.

މޮސްކޯ ސަރަހައްދުގެ ގަވަރުނަރު އެންޑްރޭ ވޮރޮބްޔޯވް ޓެލެގްރާމް މެދުވެރިކޮށް ވިދާޅުވި ގޮތުގައި، މި ޑްރޯން ހަމަލާތަކުގައި 10 އަހަރުގެ އަންހެން ކުއްޖަކާއެކު ޖުމްލަ ތިން މީހަކު ވަނީ ޒަޚަމްވެފަ އެވެ. އޭނާ ވިދާޅުވީ އެންމެ ނުރައްކާތެރި ގެއްލުންތައް ލިބިފައިވަނީ ޕަވްލޮވްސްކީ ޕޮސާޑް ޑިސްޓްރިކްޓަށް ކަމަށާއި، އެތަނުގައި ގެއެއް އަނދާފައިވާ ކަމަށެވެ. މީގެ އިތުރުން ބޮގޮރޮޑްސްކީ ޑިސްޓްރިކްޓްގެ ބައެއް ގޭގެއަށާއި ގެސްޓްހައުސްއަކަށް ގެއްލުން ލިބިފައިވާ ކަމަށްވެސް އޭނާ އިތުރަށް ވިދާޅުވި އެވެ.

އަންގާރަ ދުވަހުގެ ޑްރޯން ހަމަލާތަކުގައި މޮސްކޯގެ އިރުމަތީގައި ހުންނަ، އީ-ކޮމާސްގެ ބޮޑު ކުންފުންޏެއް ކަމަށްވާ "ވައިލްޑްބެރީސް" ގެ ގުދަނަކަށް ވެސް ވަނީ ގެއްލުން ލިބިފަ އެވެ. އެ ކުންފުނިން ނެރުނު ބަޔާނެއްގައި ބުނެފައިވަނީ، ޑްރޯންގެ ބައިތައް އިމާރާތުގެ ފާރުގައި ޖެހުމުގެ ސަބަބުން އެތަނުގެ ލޮޖިސްޓިކްސް ކޮމްޕްލެކްސްއަށް "ކުދިކުދި ގެއްލުންތަކެއް" ލިބިފައިވާ ކަމަށެވެ.

ވައިލްޑްބެރީސް ކުންފުންޏަކީ ރަޝިޔާގެ ޑްރޯންތަކަށް ބޭނުންވާ ސާމާނު ފޯރުކޮށްދޭ ކުންފުންޏެއް ކަމަށް ބުނެ، ޔޫކްރޭނުން ވަނީ ފާއިތުވި ހަފުތާތަކުގައި އެ ކުންފުނީގެ ގިނަ ގުދަންތަކަކަށް ހަމަލާދީފަ އެވެ. ޔޫކްރޭންގެ

ޚާރްކީވްއިން ފަސް މީހަކު ޒަޚަމްވި

މި ހަމަލާތަކާ ގުޅިގެން ޔޫކްރެއިންގެ ވައިގެ ސިފަައިން ރިޕޯޓްކޮށްފައިވާ ގޮތުގައި، ރަޝިޔާއިން ފޮނުވާލި 147 ޑްރޯންގެ ތެރެއިން 111 ޑްރޯން ވަނީ ވައްޓާލާފައި ނުވަތަ ހުއްޓުވާފަ އެވެ.

ޚާރްކީވްގެ ސަރަހައްދީ ގަވަރުނަރު އޮލެހް ސިނިއެހުބޯވް ވިދާޅުވި ގޮތުގައި، ރޭގަނޑުގެ ވަގުތެއްގައި ރަޝިޔާއިން އިޒްޔުމް ސިޓީއަށް ދިން ހަމަލާއެއްގައި ނުވަ އަހަރުގެ ފިރިހެން ކުއްޖަކާއެކު ފަސް މީހަކު ވަނީ ޒަޚަމްވެފަ އެވެ. މީގެ އިތުރުން، ރަޝިޔާގެ ޑްރޯންތަކުގެ ސަބަބުން ކީވް ސަރަހައްދުގެ ބްރޮވަރީ ސިޓީގެ އޮފީސް އިމާރާތަކާއި ގުދަންތަކެއްގައި އަލިފާން ރޯވެ ގެއްލުން ލިބިފައިވާ ކަމަށް އެ ސިޓީގެ މޭޔަރު އިހޯރް ސަޕޯޒްކޯ ވިދާޅުވި އެވެ.

ހަނގުރާމައިގެ ކުރީ ސަފުގެ ކުރިމަތިލުންތައް ގާތްގަނޑަކަށް ހުއްޓި، މަޝްވަރާތައް މެދުކެނޑިފައިވާ މި ދަނޑިވަޅުގައި، ޔޫކްރެއިނާއި ރަޝިޔާއިން ވަނީ ދުރު ރާސްތާގެ ހަމަލާތައް ވަރަށް ބޮޑަށް އިތުރުކޮށްފަ އެވެ. މީގެ ސަބަބުން އާންމުން މަރުވާ މިންވަރު ވަނީ 2022 ވަނަ އަހަރު ހަނގުރާމަ ފެށުނު ފުރަތަމަ މަސްތަކަށްފަހު އެންމެ މަތީ މިންވަރަކަށް އުފުލިފަ އެވެ.

އެކުވެރި ދައުލަތްތަކުގެ ޖަމްއިއްޔާ (ޔޫއެން) ގެ ތަފާސްހިސާބުތަކުން ދައްކާ ގޮތުގައި، ހަމައެކަނި ޖުލައި މަހު ވެސް ޔޫކްރއިންގެ 437 އާންމުން ވަނީ މަރުވެފަ އެވެ. މިއީ 2022 ވަނަ އަހަރުގެ މޭ މަހަށްފަހު އެއް މަސްދުވަހުގެ ތެރޭގައި އެންމެ ގިނަ އަދަދަކަށް މީހުން މަރުވި މަހެވެ.

ރަޝިޔާގެ ކަމާބެހޭ ފަރާތްތަކުން ރިޕޯޓްކޮށްފައިވާ ގޮތުގައި، ޔޫކްރެއިނުން ދިން ހަމަލާތަކުގައި ޖުލައި މަހު ރަޝިޔާގެ 79 އާންމުން ވަނީ މަރުވެފަ އެވެ. މިއީ އޭގެ ކުރީ މަހާ އަޅާބަލާއިރު އިތުރު އަދަދެކެވެ.