ޣައްޒާގެ ހަނގުރާމަ ހުއްޓާލުމުގެ އެއްބަސްވުމާއެކު މާސްކް ކުންފުނިން އަލުން ސުއޭޒް ކެނަލް އާއި ރަތް ކަނޑުން ދަތުރުތައް ފަށަނީ

ޝިޕިންގ ދާއިރާގެ ބޮޑު ކުންފުންޏެއް ކަމަށްވާ މާސްކް އިން، އެކުންފުނީގެ ބޯޓުތައް ރަތްކަނޑާއި ސުއޭޒް ކެނަލް ތެރޭން އަލުން ދަތުރުތައް ފެށުމަށް ނިންމައިފި ކަމަށް ޑެންމާކުގެ އެ ކުންފުނިން ބުރާސްފަތި ދުވަހު ހާމަކޮށްފި އެވެ. މިއީ މެދުއިރުމައްޗާއި އިންޑިއާ، އެމެރިކާގެ އިރުމަތީ އައްސޭރިފަށާ ގުޅުވައިދޭ މުހިންމު މަގެކެވެ.

އެ ކުންފުނިން ނެރުނު ބަޔާނެއްގައި ބުނެފައި ވަނީ، ކުންފުނީގެ ހުރިހާ ދަތުރުތަކެއް ސުއޭޒް ކެނަލް މެދުވެރިކޮށް ކުރާގޮތަށް އަލުން ބަދަލުކުރުމަށް ނިންމާފައިވާ ކަމަށެވެ. މިއީ އެކުންފުނީގެ އުޅަނދުފަހަރުތަކުގެ ދަތުރުތައް އާންމު ހާލަތަކަށް ގެނައުމަށްޓަކައި މަރުހަލާ ތަކަކަށް ބަހާލައިގެން ކުރިއަށްގެންދާ މަސައްކަތެއްގެ ބައެއް ކަމަށްވެސް މާސްކް އިން ބުނެ އެވެ.

ޣައްޒާގެ ރައްޔިތުންނާ އެކު އޮތް ތާއީދު ހާމަކުރުމުގެ ގޮތުން، ޔަމަނުގެ ހޫޘީން ރަތްކަނޑުން ދަތުރުކުރާ އުޅަނދުތަކަށް ހަމަލާދޭން ފެށުމާ ގުޅިގެން، ވޭތުވެދިޔަ ދެ އަހަރަށްވުރެ ގިނަ ދުވަހު ޝިޕިންގ ކުންފުނިތަކުން ދަތުރުކުރަމުން ދިޔައީ އެފްރިކާ ބައްރު ވަށާލާފައެވެ. ނަމަވެސް، މިހާރު ގިނަ ކުންފުނިތަކަކުން ދަނީ އޭޝިއާ އާއި ޔޫރަޕާ ދެމެދު އޮންނަ މި މުހިންމު ވިޔަފާރި މަގަށް އަލުން ރުޖޫޢަވުމަށް ވިސްނަމުންނެވެ.

ޣައްޒާގައި ހަނގުރާމަ ހުއްޓާލުމުގެ އެއްބަސްވުމެއް އޮތުމަކީ ކަނޑުގެ ދަތުރުފަތުރުތައް އާންމު ހާލަތަކަށް އަތުވެދާނެ ކަމުގެ އުންމީދު އާވި ކަމެކެވެ. މިގޮތުން، މިދިޔަ ހޯމަ ދުވަހު މާސްކްގެ އުޅަނދަކުން ވަނީ މި މަގުން ދަތުރުކޮށް، މަގުގެ ރައްކާތެރިކަން ޓެސްޓުކޮށްފަ އެވެ.

ޚިދުމަތަށް ގެނައި މި ބަދަލާއެކު، ފުރަތަމަ އުޅަނދު ފުރުމަށް ހަމަޖެހިފައިވަނީ ޖެނުއަރީ 26 ވަނަ ދުވަހު އޮމާންގެ ސަލާލާ ބަނދަރުންނެވެ.

ސުއޭޒް ކެނަލަކީ ޔޫރަޕާއި އޭޝިއާ ގުޅުވައިދޭ އެންމެ އަވަސް މަގެވެ. "ކްލާކްސަންސް ރިސާޗް" ގެ ތަފާސްހިސާބުތަކުން ދައްކާގޮތުގައި، ހޫޘީންގެ ހަމަލާތައް ފެށުމުގެ ކުރިން ދުނިޔޭގެ ކަނޑު މަގުން ކުރާ ވިޔަފާރީގެ ގާތްގަނޑަކަށް 10 އިންސައްތަ ހިއްސާކުރަނީ މި މަގުންނެވެ.

މިދިޔަ އަހަރުގެ އޮކްޓޫބަރު މަހުން ފެށިގެން ޣައްޒާގައި ހަނގުރާމަ ހުއްޓާލާފައި އޮތުމަކީ ރަތްކަނޑުގެ ދަތުރުފަތުރުތައް އާންމު ހާލަތަށް ގެނައުމަށް ލިބުނު އުންމީދެކެވެ. މި އެއްބަސްވުމުގެ ސަބަބުން ފާއިތުވި ތިން މަސްދުވަހުގެ ތެރޭގައި ޣައްޒާގައި ކުރިއަށްދިޔަ ބޮޑެތި ކުރިމަތިލުންތައް ވަނީ ހުއްޓުމަކަށް އައިސްފައެވެ. ނަމަވެސް، ދެފަރާތުންވެސް އެއްބަސްވުމާ ޚިލާފުވަމުންދާ ކަމުގެ ތުހުމަތުތައް ދަނީ ކުރެވެމުންނެވެ. މި އެއްބަސްވުމަށް އަމަލުކުރަން ފެށި ފަހުން ފަލަސްތީނުގެ 440 އަށްވުރެ ގިނަ މީހުން ޝަހީދުވެފައިވާއިރު، އިޒްރޭލުގެ ތިން ސިފައިން ވަނީ މަރުވެފަ އެވެ.