އެމެރިކާގެ ސީއައިއޭގެ ޑިރެކްޓަރު، ވެނެޒުއެލާގެ ވަގުތީ ރައީސްއާ ބައްދަލު ކުރައްވައިފި

އެމެރިކާގެ ސީއައިއޭގެ ޑިރެކްޓަރު ޖޯން ރެޓްކްލިފް، ވެނެޒުއެލާގެ ވަގުތީ ރައީސް ޑެލްސީ ރޮޑްރިގޭޒްއާ ބައްދަލު ކުރައްވާފައިވާ ކަމަށް ނިއު ޔޯކް ޓައިމްސް އިން ރިޕޯޓު ކޮށްފި އެވެ. 

ނިއު ޔޯކް ޓައިމްސް އިން މިކަން ރިޕޯޓު ކޮށްފައި ވަނީ، އެމެރިކާ ސަރުކާރުގެ އިސް އޮފިޝަލެއްގެ ފަރާތުން ލިބުނު މައުލޫމާތުގެ މައްޗަށެވެ. އެކަމާ ގުޅޭ ގޮތުން އެމެރިކާގެ ރިޔާސީ ގަނޑުވަރު، ވައިޓް ހައުސް އިން މިހާތަނަށް ވަކި އެއްޗެއް ބުނެފައި ނުވެ އެވެ. 

ރިޕޯޓު ތަކުގައި ބުނެފައިވާ ގޮތުން، ވެނެޒުއެލާގެ ވަގުތީ ރައީސް ޑެލްސީއާ ރެޓްކްލިފް ބައްދަލު ކުރައްވާފައި ވަނީ، އެ ޤައުމުގެ ރައީސް ޑޮނަލްޑް ޓްރަމްޕްގެ އިރުޝާދުގެ މަތިންނެވެ. އެގޮތުން އެމެރިކާ އިން ވެނެޒުއެލާއާ އެކު ގުޅިގެން މަސައްކަތް ކުރުމަަށް ބޭނުންވާ ކަމުގެ މެސެޖު ފޯރުކޮށްދީފައިވާ ކަމަށް ވެސް ރިޕޯޓު ކޮށްފައިވެ އެވެ. 

އެ ބައްދަލު ކުރެއްވުމުގައި އިންޓެލިޖެންސް ދާއިރާ އިން ގުޅިގެން މަސައްކަތް ކުރުމާއި، އިޤްތިސާދީ ހަމަޖެހުމާއި، ވެނެޒުއެލާގެ ދުޝްމަނުން އަދި ޚާއްސަކޮށް މަސްތުވާ ތަކެތީގެ ވިޔަފާރިވެރިންނަށް ރައްކާތެރިކަމާއި، ހިމާޔަތް ނުދިނުން ކަށަަވަރު ކުރުމުގެ ބޭނުމާ ގުޅޭ ގޮތުން މަޝްވަރާ ކޮށްފައިވާ ކަމަށް ބުނެފައިވެ އެވެ. 

ނިއު ޔޯކް ޓައިމްސްގައި ބުނެފައިވާ ގޮތުން، ކުރިން ނައިބު ރައީސްގެ ހައިސިއްޔަތުން ވެސް ޑެލްސީ ވަނީ އެމެރިކާގެ ބައެއް އިސްވެރިންނާ ބައްދަލު ކުރައްވައިފަ އެވެ. އެގޮތުން އެމެރިކާގެ ޚާއްސަ މަންދޫބު ރިޗާޑް ގްރެނެލް އާއި އެހެން އޮފިޝަލުންނާ އެކު ބައްދަލުކޮށް، އަމިއްލަ އިޚުތިޔާރުގައި ވެރިކަމުގެ ބާރުތައް ދޫކޮށްލުމަށް ވެނެޒުއެލާގެ ރައީސް ނިކޮލަސް މަދޫރޯ އެއްބަސް ކުރުމަށް މަޝްވަރާ ކޮށްފައިވާ ކަމަށް ނިއު ޔޯކް ޓައިމްސްގައި ބުނެފައިވެ އެވެ. 

އެމެރިކާ އިން މަދޫރޯ ހައްޔަރު ކުރުމާ އެކު، ޑެލްސީ ވަނީ އެކަމަށް ވަރަށް ބޮޑަށް ފާޑު ވެސް ވިދާޅުވެފަ އެވެ. އަދި މަދޫރޯ އަކީ ވެނެޒުއެލާގެ ހަގީގީ ރައީސް ކަމަށާއި، ވަގުތުން ވަގުތަށް މަދޫރޯ މިނިވަން ކުރުމަށް ވެސް އޭނާ ވަނީ ގޮވާލައްވައިފަ އެވެ. އޭގެ ފަހުން ވެނެޒުއެލާގެ ސުޕްރީމް ކޯޓުން ވަނީ އެ ޤައުމުގެ ވަގުތީ ރައީސް އަކީ ޑެލްސީ ކަމަށް ކަނޑައަޅައިފަ އެވެ. އަދި އެމެރިކާ އިން ވެސް ވަނީ ވަގުތީ ލީޑަރެއްގެ ގޮތުގައި ޑެލްސީ ބަަލައިގެންފަ އެވެ. 

މި ބައްދަލުވުން ބާއްވާފައި ވަނީ ވެނެޒުއެލާގެ ސިޔާސީ މަޝްރަހު ވަރަށް ބޮޑަށް ހަލަބޮލި ވެފައިވާ ދަނޑިވަޅެއްގަ އެވެ. މި ބައްދަލުވުމުގެ ކުރިން، ޑެލްސީ ވަނީ އެމެރިކާގެ ރައީސް ޓްރަމްޕްއާ ފޯނުން ގުޅުއްވައި މަޝްވަރާ ކުރައްވައިފަ އެވެ. އޭގެ ފަހުން މި ބައްދަލުވުން ބާއްވާފައިވާ ކަމަށް ރިޕޯޓު ކޮށްފައިވާއިރު، މި ބައްދަލުވުން އޮތީ ވެނެޒުއެލާގެ ވެރި ރަށް ކަރަކާސްގައި ކަމަށް ވެސް ބުނެފައިވެ އެވެ.