އީރާނުގެ މުޒާހަރާތަކުގައި މަރުވި މީހުންގެ ޒިންމާ ނަންގަވަން ޖެހޭނީ އެމެރިކާގެ ރައީސް: އީރާނުގެ ލީޑަރު

އީރާނުގައި މިފަހަކުން ހިނގާދިޔަ ހަމަނުޖެހުންތަކާއި، އޭގެ ސަބަބުން ލިބުނު ބޮޑެތި ގެއްލުންތަކުގެ މައިގަނޑު މަސްއޫލުވެރިޔަކީ އެމެރިކާގެ ރައީސް ޑޮނަލްޑް ޓްރަމްޕް ކަމަށް އީރާނުގެ ރޫޙާނީ ލީޑަރު އާޔަތުﷲ ސައްޔިދު އަލީ ޚާމަނާއީ ވިދާޅުވެއްޖެ އެވެ.

ކީރިތި ރަސޫލާ (ޞޢވ) އަށް ވަޙީ ބާވައިލައްވައި، ރަސޫލުކަމާއިގެން ފޮނުއްވުނު މަތިވެރި މުނާސަބަތު ކަމަށްވާ އީދުލް މަބްއަޘް ފާހަގަކުރުމުގެ ގޮތުން ހޯމަ ދުވަހުގެ ހެނދުނު ބޭއްވި ޖަލްސާއެއްގައި ވާހަކަފުޅު ދައްކަވަމުން ޚާމަނާއީ ވަނީ އެކި ދާއިރާތަކުން ހާޒިރުވި އެތައް ހާސް ބަޔަކާ މުޚާތަބު ކުރައްވާފަ އެވެ.

"އީރާނުގެ ރައްޔިތުންނަށް ލިބުނު ގެއްލުންތަކާއި، މަރުވި މީހުންނާއި، އަދި އެ ޤައުމާ ދެކޮޅަށް ކުރެވުނު ދޮގު ތުހުމަތުތަކުގެ ޒިންމާ އުފުލަން ޖެހޭނީ އެމެރިކާގެ ރައީސް،" ކަމަށް ވިދާޅުވެ، ޚާމަނާއީ ވަނީ ޓްރަމްޕަކީ މިކަމުގައި ކުށްވެރިއެއްގެ ގޮތުގައި ސިފަކުރައްވާފަ އެވެ. މީގެ އިތުރުން، މި ހަމަނުޖެހުންތަކުގެ އަސްލާއި، އެކަމުގައި ބޭނުންކުރި ވަސީލަތްތަކާއި، އަދި މިފަދަ ރޭވުންތަކާ ދެކޮޅަށް އީރާނުން އަދާކުރަންޖެހޭ ޒިންމާތަކުގެ މައްޗަށް ވެސް އޭނާ ވަނީ ތަފްސީލީ ގޮތެއްގައި އަލިއަޅުއްވާލައްވާފަ އެވެ.

މިދިޔަ މަހުގެ ފަހުކޮޅު ސުލްހަވެރިކަމާއެކު ފެށުނު މުޒާހަރާތައް މަޑުމަޑުން ހަރުކަށި އަމަލުތަކަށް ބަދަލުވެ، އެކި ސިޓީތަކުގައި ހަމަނުޖެހުން ހިންގައި، ސަލާމަތީ ބާރުތަކުގެ މީހުންނާއި އާންމުން މަރައި، ދައުލަތުގެ އުމްރާނީ ވަސީލަތްތަކަށް ވަނީ ބޮޑެތި ގެއްލުންތަކެއް ދީފަ އެވެ. އީރާނުގެ އިސް މަސްއޫލުވެރިން ވަނީ މި ހަމަނުޖެހުންތަކާއި ޓެރަރިސްޓް އަމަލުތަކަކީ އެމެރިކާ އާއި އިޒްރޭލާ ގުޅުންހުރި ކަންކަން ކަމަށް ތުހުމަތުކުރައްވާފަ އެވެ.

އެމެރިކާ އާއި އިޒްރޭލުގެ ޖާސޫސީ އިދާރާ 'މޮސާޑް' އިން މިކަމުގައި އަމަލީ ގޮތުން ބައިވެރިވާކަން އެ ފަރާތްތަކުން ވަނީ އިއުތިރާފުވެފަ އެވެ. އެގޮތުން އެމެރިކާގެ ކުރީގެ ސެކްރެޓަރީ އޮފް ސްޓޭޓް މައިކް ޕޮމްޕެއޯ ކުރެއްވި ޓްވީޓެއްގައި، މަގުމަތީގައި ތިބި އީރާނުގެ ރައްޔިތުންނަށާއި އެމީހުންގެ ކައިރީގައި ހަރަކާތްތެރިވާ މޮސާޑްގެ އެޖެންޓުންނަށް އާ އަހަރުގެ ތަހުނިޔާ ފޮނުވާފައިވެ އެވެ. އަދި ފާރިސީ ބަހުން މޮސާޑުން ކުރި ޕޯސްޓެއްގައި، ހަމަނުޖެހުން ހިންގާ މީހުންނަށް މަގުމައްޗަށް ނުކުތުމަށް ބާރުއަޅައި، މޮސާޑްގެ އެޖެންޓުން އެމީހުންނާއެކު އަމަލީ ގޮތުން މައިދާނުގައި ހަރަކާތްތެރިވަމުންދާ ކަމަށް ބުނެފައިވެ އެވެ.

ޚާމަނާއީ ފާހަގަކުރެއްވި ގޮތުގައި، މީގެ ކުރިން މިފަދަ ހަމަނުޖެހުންތަކުގައި ބައިވެރިވަނީ އެމެރިކާގެ މީޑިއާތަކާއި ދެވަނަ ދަރަޖައިގެ ސިޔާސީ މީހުންނެވެ. ނަމަވެސް މިފަހަރުގެ ހަމަނުޖެހުންތަކުގެ ތަފާތަކީ، ސީދާ އެމެރިކާގެ ރައީސް މިކަމުގެ ތެރެއަށް ވަދެވަޑައިގެން، ބަޔާންތައް ދެއްވައި، ހަމަނުޖެހުން ހިންގާ މީހުންނަށް ހިތްވަރުދީ، އަދި އަސްކަރީ އެހީތެރިކަން ފޯރުކޮށްދޭނެ ކަމަށް ވިދާޅުވުން ކަމަށް އޭނާ ވިދާޅުވި އެވެ.

"މިއީ އެމެރިކާގެ ރޭވުމެއްކަން ވަރަށް ސާފުކޮށް އެނގޭ. ވޭތުވެދިޔަ 50 އަހަރުގެ ތަޖުރިބާ އަށް ބިނާކޮށް އަޅުގަނޑު ޔަގީންކަމާ އެކު ބުނަން އޮތީ، އެމެރިކާގެ ބޭނުމަކީ އީރާނު އަޅުވެތިކުރުން،" ކަމަށް ޚާމަނާއީ ވިދާޅުވި އެވެ. އޭނާ އިތުރަށް ވިދާޅުވީ، އިސްލާމީ އިންގިލާބަށް ފަހު އިމާމް ޚުމައިނީގެ އިސްނެންގެވުމާއެކު އީރާނުގައި އޮތް އެމެރިކާގެ ނުފޫޒު ނައްތާލެވުނު ނަމަވެސް، އެމެރިކާ އިން އަބަދުވެސް މަސައްކަތް ކުރަނީ އެމީހުންގެ ސިޔާސީ އަދި އިޤްތިޞާދީ ބާރުވެރިކަން އަލުން އީރާނުގެ މައްޗަށް ފަތުރަން ކަމަށެވެ.

އަދި މިއީ ހަމައެކަނި މިހާރުގެ އެމެރިކާ ސަރުކާރުގެ އަމަލެއް ނޫން ކަމަށާއި، މިއީ އެމެރިކާގެ ޒަމާންވީ ސިޔާސަތެއް ކަމަށްވެސް އޭނާ ފާހަގަކުރެއްވި އެވެ. އީރާނުގެ ބޮޑުމިނާއި، ގާބިލިއްޔަތާއި، އަދި ސައިންސާއި ޓެކްނޮލޮޖީގެ ދާއިރާ އިން ހޯދަމުންދާ ކުރިއެރުންތަކާއެކު އޮތް މިފަދަ ޤައުމެއްގެ ވަރުގަދަކަން ބަލައިގަންނަން އެމެރިކާ އަށް ކެތްނުކުރެވޭ ކަމަށް ލީޑަރު ވިދާޅުވިއެވެ.

"މި ހަމަނުޖެހުންތަކުގެ ތެރޭގައި އެމެރިކާ އިން ވަނީ، ތަންތަނުގައި ހުޅުޖަހައި މުދަލަށް ގެއްލުންދީ ހަމަނުޖެހުން ހިންގާ މީހުންނަކީ އީރާނުގެ ރައްޔިތުން ކަމަށް ސިފަކޮށްފައި. މިއީ އީރާނުގެ ރައްޔިތުންގެ އަބުރަށް އަރައިގަތުމަށް ކުރި ވަރަށް ބޮޑު އިހާނެތި ކަމެއް އަދި ޖަރީމާ އެއް،" ކަމަށް ޚާމަނާއީ ވިދާޅުވި އެވެ. އޭނާ ވިދާޅުވި ގޮތުގައި މި ހުރިހާ ކަމަކީ ވެސް ވަރަށް ސާފު ހެކިތަކާއެކު ފެންނަން ހުރި ކަންކަން ކަމަށްވާތީ، އެމެރިކާ އާއި އިޒްރޭލަކީ މިކަމުގައި ކުށްވެރިން ކަމަށް އޭނާ ވިދާޅުވި އެވެ.

މީގެ އިތުރުން، މި ހަމަނުޖެހުންތަކުގެ ފަހަތުގައި ތިބި ބައެއް މީހުންނަކީ އެމެރިކާ އާއި އިޒްރޭލުގެ އިދާރާތަކުން ތަމްރީނުދީ، ފައިސާދީގެން ރެކްރޫޓްކޮށްފައިވާ ބައެއް ކަމަށްވެސް ލީޑަރު ވިދާޅުވި އެވެ. "އެމީހުންނަށް ވަނީ ބިރުވެރިކަން ފެތުރުމާއި، ތަންތަން ހަލާކުކުރުމާއި، އަދި އާންމު ނިޒާމު ގެއްލުވާލާނެ ގޮތް ދަސްކޮށްދީފައި. އެމީހުން މަސައްކަތް ކުރީ ލީޑަރުންގެ ގޮތުގައި ފެންނަން،" އޭނާ ވިދާޅުވި އެވެ.

އީރާނުގެ ސަލާމަތީ ބާރުތަކުން އެމީހުންގެ ޒިންމާ ފުރިހަމައަށް އަދާކޮށް، މިފަދަ ގިނަ ބަޔަކު ހައްޔަރުކޮށްފައިވާ ކަމަށްވެސް އޭނާ ވިދާޅުވި އެވެ. ވާހަކަފުޅު ނިންމަވާލައްވަމުން ޚާމަނާއީ ވިދާޅުވީ، އީރާނުން ޤައުމު ހަނގުރާމައަކަށް ނުގެންދާނެ ކަމަށާއި، ނަމަވެސް އެތެރެ އާއި ބޭރުގެ ކުށްވެރިންނަށް އެމީހުން ކުރި އަމަލުތަކުގެ އަދަބު ނުދީ ދޫކޮށްނުލާނެ ކަމަށެވެ.