ސަލާމަތީ މަޖިލީހުގައި އެމެރިކާ އިން އީރާނަށް ވަރުގަދަ އިންޒާރުތަކެއް ދީފި
އީރާނާ ދެކޮޅަށް އެމެރިކާ އިން ހިންގާ "ޣައިރު ޤާނޫނީ އަމަލުތައް" ކުށްވެރިކުރުމުގައި އދ. އިން އަދާ ކުރަން ޖެހޭ ދައުރު ފުރިހަމަ އަށް އަދާ ކުރުމަށް އީރާނުގެ ޚާރިޖީ ވަޒީރު ވަނީ އދ ގެ ސެކްރެޓަރީ ޖެނެރަލްގެ އަރިހުން އެދިވަޑައިގެންފަ.
އދ.ގެ ގައި ހުންނަވާ އެމެރިކާގެ ސަފީރު މައިކް ވޯލްޓްޒް އީރާނާ ބެހޭ ސަލާމަތީ މަޖިލީހުގެ ކުއްލި ބައްދަލުވުމެއްގައި ވާހަކަފުޅު ދައްކަވަނީ. - ޖެނުއަރީ 15، 2026 | ރޮއިޓަސް
އދ. ގެ ސެކިއުރިޓީ ކައުންސިލް (ސަލާމަތީ މަޖިލިސް) ގެ ކުއްލި ބައްދަލުވުމެއްގައި، އީރާނާ ދެކޮޅަށް "ހުރިހާ ފިޔަވަޅެއް އެޅުމުގެ އިޚްތިޔާރު އޮތްކަމުގެ" އިންޒާރު އެމެރިކާ އިން ދީފި އެވެ.
ބުރާސްފަތި ދުވަހު އދ. ގެ ސަލާމަތީ މަޖިލީހުގައި އެމެރިކާގެ މަންދޫބު ވަނީ އީރާނަށް އަމާޒުކޮށް ވަރުގަދަ އިންޒާރުތަކެއް ތަކުރާރުކުރައްވާފަ އެވެ.
އީރާނުގައި ކުރިއަށްދާ މުޒާހަރާތައް ހުއްޓުވުމަށް އެ ޤައުމުގެ ސަރުކާރުން ބާރުގެ ބޭނުންކޮށް ހިންގަމުންދާ ލޭއޮހޮރުވުންތައް، އެމެރިކާ އާއި އީރާނުގެ ސަރުކާރާ އިދިކޮޅު ފަރާތްތަކުން ވަނީ ހަރުކަށި އިބާރާތުން ކުށްވެރިކޮށްފަ އެވެ. ބައެއް ފަރާތްތަކުން ހާމަކުރާ ގޮތުގައި، މި ހަމަނުޖެހުންތަކުގައި މިހާތަނަށް މަދުވެގެން 2,637 މީހުން ވަނީ މަރުވެފަ އެވެ.
އދ. އަށް ކަނޑައަޅުއްވާފައި ހުންނަވާ އެމެރިކާގެ ސަފީރު މައިކް ވޯލްޓްޒް ދެއްވި ބަޔާނެއްގައި ވިދާޅުވީ، ރައީސް ޓްރަމްޕަކީ އދ. އިން ފެންނަ ފަދަ ހުއްޓުމެއް ނެތް ވާހަކަދެއްކުމުގެ ބަދަލުގައި، އަމަލީ ގޮތުން ފިޔަވަޅު އަޅުއްވާ ބޭފުޅެއް ކަމަށެވެ. އަދި މި ލޭއޮހޮރުވުންތައް ހުއްޓުވުމަށްޓަކައި ހުރިހާ ފިޔަވަޅެއް އެޅުމުގެ އިޚްތިޔާރު އޮތްކަން ރައީސް ޓްރަމްޕް ޞަރީޙަކޮށް ބަޔާންކުރައްވާފައިވާ ކަމަށާއި، މިކަން އީރާނުގެ ވެރިންނަށް އެނގިވަޑައިގަންނަވާނެ ކަމަށް ވެސް އޭނާ ވިދާޅުވި އެވެ.
ވޯލްޓްޒް މިހެން ވިދާޅުވީ، މުޒާހަރާގެ ބައިވެރިން މަރަމުންދާތީ އެމެރިކާ އިން ބަދަލުހިފުމުގެ ފުރުސަތު އޮތް ކަމަށް ބެލެވިފައިވާ ދަނޑިވަޅެއްގަ އެވެ. ނަމަވެސް، ރައީސް ޓްރަމްޕް ވަނީ މީހުން މެރުން ހުއްޓެމުންދާ ކަމަށް ފެންނަ ކަމަށް ވިދާޅުވެ، މަސްރަހް ފިނިކުރެއްވުމުގެ އިޝާރާތެއް ދެއްވާފަ އެވެ. ބުރާސްފަތި ދުވަހާ ހަމަ އަށް އައިއިރު، އީރާނުގެ ސަރުކާރާ ދެކޮޅަށް ކުރަމުންދިޔަ މުޒާހަރާތައް ވަނީ ވަރަށް ބޮޑަށް މައިތިރިކޮށްފަ އެވެ. އެހެން ނަމަވެސް، ސަރުކާރުގެ އަމުރަށް މުޅި ގައުމުން އިންޓަނެޓާއި މުވާސަލާތީ ޚިދުމަތްތައް ކަނޑާލާފައި އޮތް އޮތުން އަދިވެސް ދެމިއޮތެވެ.
އދ. ގެ ސަލާމަތީ މަޖިލީހުގެ މި ކުއްލި ބައްދަލުވުމަށް އެދިފައި ވަނީ އެމެރިކާ އިންނެވެ. އަދި މި ބައްދަލުވުން ފެށުމުގެ ގޮތުން، އީރާނުގެ ސަރުކާރާ ދެކޮޅު ދެ އެކްޓިވިސްޓުން ކަމަށްވާ މަސީހް އަލީ ނެޖާދު އަދި އަޙްމަދު ބާޠިބީ ވަނީ، އެ ގައުމުގެ ސަރުކާރުން އެމީހުންނަށް އަމާޒުކޮށް ހިންގާފައިވާ އަނިޔާވެރި އަމަލުތަކުގެ ތަފްޞީލުތައް ހިއްސާކޮށްފަ އެވެ.
ބައްދަލުވުމުގެ ތެރެއިން ފެނިގެންދިޔަ ފާހަގަކޮށްލެވޭ ކަމަކީ، އަލީ ނެޖާދު ސީދާ އީރާނުގެ މަންދޫބާ މުޚާތަބުކޮށް ވާހަކަދެއްކުމެވެ. އޭނާ ބުނި ގޮތުގައި، އޭނާ މަރާލުމަށް އީރާނުން ތިން ފަހަރެއްގެ މަތިން މަސައްކަތްކޮށްފައިވެ އެވެ. އަދި ބްރޫކްލިން ގައި ހުންނަ އޭނާ ގެ ގޭގެ ބޭރުން، އޭނާ މަރާލަން އައި މީހާ އަމިއްލަ ލޮލުން ދުށް ކަމަށް ވެސް އޭނާ ބުންޏެވެ. އަލީ ނެޖާދު މި ވާހަކަތައް ދެއްކިއިރު، އީރާނުގެ މަންދޫބު އިނީ އެއްވެސް ސަމާލުކަމެއް ނުދީ ކަން ފާހަގަ ކުރެވެ އެވެ.
މި ބައްދަލުވުން ފެށުމުގެ ކުރިން، އީރާނުގެ ޚާރިޖީ ވަޒީރު އައްބާސް އަރަގްޗީ އާއި އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ވަނީ ފޯނުން ވާހަކަދައްކަވާފަ އެވެ. އީރާނުގެ ތަސްނީމް ނިއުސް އެޖެންސީން ރިޕޯޓްކުރި ގޮތުގައި، އީރާނާ ދެކޮޅަށް އެމެރިކާ އިން ހިންގާ "ޣައިރު ޤާނޫނީ އަމަލުތައް" ކުށްވެރި ކުރުމުގައި އދ. އިން އަދާ ކުރަން ޖެހޭ ދައުރު ފުރިހަމައަށް އަދާ ކުރުމަށް އަރާގްޗީ ވަނީ އެދިވަޑައިގެންފަ އެވެ.
