އީރާނު ގައި ހަމަ ނުޖެހުން އުފައްދަން އެތެރެވި ޓެރަރިސްޓް ގްރޫޕެއް ހޯދައި، އެމީހުންގެ ހަރަކާތްތައް ހުއްޓުވައިފި

އީރާނުގެ ހުޅަނގު ބޯޑަރު ހުރަސްކޮށް އެ ގައުމަށް އެތެރެވި ޓެރަރިސްޓް ގްރޫޕެއް ހޯދައި، އެމީހުންގެ ހަރަކާތްތައް ކާމިޔާބުކަމާއެކު ހުއްޓުވައިފި ކަމަށް އީރާނުގެ އިންޓެލިޖެންސް މިނިސްޓްރީން ބުނެފި އެވެ. މި ގްރޫޕަކީ ދާދިފަހުން އެ ގައުމުގައި ހިނގި ހަމަނުޖެހުންތަކުގެ ތެރޭގައި މީހުންގެ ފުރާނަ އަށް ގެއްލުންދިނުމަށާއި، ތެހެރާން ގައި ހަތިޔާރު ބޭނުން ކޮށްގެން ނުރައްކާތެރި ހަމަލާތަކެއް ދިނުމަށް ރާވައިގެން އައި ބައެއް ކަމަށް އީރާނުން ބުނެ އެވެ.

އެ މިނިސްޓްރީން ހާމަކުރި ގޮތުގައި، ޖެނުއަރީ މަހުގެ 8 ވަނަ ދުވަހުގެ ރޭ މި ޓެރަރިސްޓް ގްރޫޕުން ވަނީ ތެހެރާންގައި ހުންނަ ފުލުހުންގެ މަރުކަޒަކަށް ހަތިޔާރު ބޭނުން ކޮށްގެން ހަމަލާދީފަ އެވެ. އެ މަރުކަޒު ހިސާރުކޮށް، އެތަނުގައި ހުރި ހަތިޔާރުތައް އަތުލުމުގެ ނިޔަތުގައި ދިން މި ހަމަލާގައި، އަސްކަރީ ހަތިޔާރު ބޭނުން ކޮށްގެން 850 އަށް ވުރެ ގިނަ ވަޒަން ޖަހާފައިވާ ކަމަށް ރިޕޯޓު ކޮށްފައިވެ އެވެ.

މި ހަމަލާގެ ސަބަބުން ފުލުހުންނާއި، ބަސީޖް ފޯސްގެ މެންބަރުންގެ އިތުރުން އާންމު ރައްޔިތުންގެ ތެރެއިން ބަޔަކު ވަނީ ޝަހީދުވެފަ އެވެ.

މި މީހުން ހައްޔަރުކުރުމަށް ހިންގި އޮޕަރޭޝަންގެ ތެރޭގައި ޓެރަރިސްޓުން ވަނީ ސަލާމަތީ ބާރުތަކަށް ބަޑީގެ ހަމަލާދީފަ އެވެ. ދެފަރާތުގެ ދެމެދުގައި ބަދަލު ކުރެވުނު ހަމަލާތަކުގައި އެއް ޓެރަރިސްޓަކު މަރުވެފައިވާއިރު، އިތުރު ހަތަރު މީހަކު ވަނީ ހައްޔަރުކޮށްފައި ކަމަށް ސަރުކާރުން ބުނެ އެވެ.

ވަކިން ނެރުނު ބަޔާނެއްގައި އިންޓެލިޖެންސް މިނިސްޓްރީން ވަނީ، ތެހެރާންގައި ހިނގި ބޮޑެތި ހަމަނުޖެހުންތަކާއި ކުށެއްނެތް އާންމުންގެ ފުރާނަ ގެއްލުމުގެ ޒިންމާ އުފުލަންޖެހޭ މައިގަނޑު އެއް ނެޓްވޯކް ވެސް ރޫޅާލާފައިވާ ކަމަށް ކަށަވަރުކޮށްދީފަ އެވެ. މި ނެޓްވޯކްގައި ހިމެނޭ ބައެއް މީހުންނާއި އާންމުންނަށް އަނިޔާވެރިވުމުގައި ބައިވެރިވި މީހުން މިހާރު ވަނީ ބަންދުކޮށްފަ އެވެ.

ހުކުރު ދުވަހު އީރާނުގެ ސަލާމަތީ ބާރުތަކުން ބުނި ގޮތުގައި، ތެހެރާނަށް އެތެރެކުރަން އުޅުނު 60،000 ހަތިޔާރު ވަނީ އަތުލައިގެންފަ އެވެ. އަދި އިޒްރޭލުގެ މޮސާޑުން ތަމްރީނު ދީފައިވާ ޓެރަރިސްޓް ސެލްއެއް ވެސް ވަނީ ހޯދާފަ އެވެ. މި ގްރޫޕުން ވަނީ ދާދިފަހުން ހިނގި ހަމަނުޖެހުންތަކުގެ ބޭނުން ހިފައިގެން ނުރައްކާތެރި ހަމަލާތަކެއް ދީފަ އެވެ.

އީރާނުގެ ލޯ އެންފޯސްމަންޓް ކޮމާންޑް (ފަރާޖާ) އިން ހާމަކުރި ގޮތުގައި "ބުޝެހްރު" ސަރަހައްދުގައި ހިންގި އޮޕަރޭޝަނެއްގައި ހަމަނުޖެހުން ހިންގާ މީހުންގެ އަތުން 60،000 ހަތިޔާރު ފެނިފައިވާ ކަމަށް ރިޕޯޓު ކޮށްފައިވެ އެވެ. އަދި މި އޮޕަރޭޝަން ގައި ދެ ޓެރަރިސްޓަކު ވަނީ ހައްޔަރުކޮށްފަ އެވެ.

މިދިޔަ މަހުގެ ފަހުކޮޅު ސުލްހަވެރިކަމާއެކު ފެށުނު މުޒާހަރާތައް ފަހުން ވަނީ އަނިޔާވެރި ހަމަނުޖެހުންތަކަކަށް ބަދަލުވެފަ އެވެ. މި ހަމަނުޖެހުންތަކުގެ ތެރޭގައި މުޒާހަރާކުރާ ބަޔަކު ވަނީ ސަލާމަތީ ބާރުތަކުގެ މީހުންނާއި އާންމުން މަރައި، ދައުލަތުގެ އުމްރާނީ ވަސީލަތްތަކަށް ބޮޑެތި ގެއްލުންތަކެއް ދީފަ އެވެ.

އީރާނުގެ އޮފިޝަލުން މި ހަމަނުޖެހުންތަކާއި ޓެރަރިސްޓް އަމަލުތަކުގެ ފަހަތުގައި ވަނީ އެމެރިކާ އާއި އިޒްރޭލުގެ ޔަހޫދީ ސަރުކާރު ކަމަށް ވަނީ ވިދާޅުވެފަ އެވެ.

އެމެރިކާ އާއި އިޒްރޭލުގެ މޮސާޑުން ވަނީ އެގައުމުގެ ތެރޭގައި އެމީހުންގެ ބައިވެރިވުން އޮތްކަމަށް އިއުތިރާފުވެފަ އެވެ. އެމެރިކާގެ ކުރީގެ ސެކްރެޓަރީ އޮފް ސްޓޭޓް މައިކް ޕޮމްޕެއޯ ކުރެއްވި ޓްވީޓެއްގައި، މަގުމަތީގައި ތިބި އީރާނު މީހުންނާއި އެމީހުންގެ ކައިރީގައި ހަރަކާތްތެރިވާ މޮސާޑް އެޖެންޓުންނަށް އާ އަހަރުގެ ތަހުނިޔާ ވަނީ ފޮނުވާފަ އެވެ.

މީގެ އިތުރުން، މޮސާޑުން ފާރިސީ ބަހުން ސޯޝަލް މީޑިއާގައި ކުރި ޕޯސްޓެއް ގައި، މުޒާހަރާކުރާ މީހުން އެންމެން އެކުގައި މަގުމައްޗަށް ނުކުތުމަށް ބާރުއަޅައި، އެމީހުންގެ އެޖެންޓުން ތިބީ ހަމައެކަނި ދުރުގައި ނޫން ކަމަށާއި، އަމަލީ ގޮތުން މުޒާހަރާކުރާ މީހުންނާއެކު މައިދާނުގައި ހަރަކާތްތެރިވަމުންދާ ކަމަށް ބުނެފައިވެ އެވެ.