އީރާނަށް އެމެރިކާ އިން ހަމަލާ ދިނުން ހުއްޓުވުމަށް ސައުދީ، ގަތަރު އަދި އުމާނުން އިސްނަގައިގެން ބޮޑެތި މަސައްކަތްތަކެއް ކުރި ކަމަށް ބުނެފި

އީރާނަށް ހަމަލާއެއް ދިނުމުގެ ސަބަބުން ސަރަޙައްދީ މަސްލަޙަތު ގެއްލި، ނުރައްކާތެރި ނަތީޖާތަކެއް ކުރިމަތިވެދާނެތީ، އެމެރިކާގެ ރައީސް ޑޮނަލްޑް ޓްރަމްޕް އެ ނިންމެވުން ބަދަލުކުރެއްވުމަށް ސައުދީ އަރަބިއްޔާ، ގަތަރު އަދި އުމާނުން އިސްނަގައިގެން ބޮޑެތި މަސައްކަތްތަކެއް ކޮށްފައިވާ ކަމަށް ސައުދީގެ އިސް އޮފިޝަލަކު އޭއެފްޕީ ނޫސް އެޖެންސީއަށް މަޢުލޫމާތު ދީފި އެވެ.

ނަން ހާމަނުކުރުމަށް އެދި އެ އޮފިޝަލް ވިދާޅުވި ގޮތުގައި، އީރާނުގެ ހެޔޮ ނިޔަތް ސާބިތުކޮށްދިނުމަށް ފުރުޞަތެއް ދިނުމަށް ރައީސް ޓްރަމްޕަށް ބާރުއެޅުމުގެ ގޮތުން، ގަލްފުގެ މި ތިން ޤައުމުން ވަނީ ފަހު ވަގުތު ވަރަށް ބޮޑު ޚާރިޖީ މަސައްކަތްތަކެއް ކޮށްފަ އެވެ. އަދި މިކަމާ ގުޅޭ މަޝްވަރާތައް އަދިވެސް މެދުކެނޑުމެއް ނެތި ކުރިއަށްދާ ކަމަށް އޭނާ ވިދާޅުވި އެވެ.

އީރާނުގައި މުޒާހަރާކުރާ މީހުންނާ ދެކޮޅަށް އެ ޤައުމުގެ ސަރުކާރުން އަޅަމުންދާ ހަރުކަށި ފިޔަވަޅުތަކާ ގުޅިގެން އެމެރިކާ އިން ހަމަލާ އެއް ދީފާނެ ކަމުގެ ބިރު ބޮޑުވެފައިވާ ދަނޑިވަޅެއްގައި، ގަތަރުގައި ހުންނަ އެމެރިކާގެ މައި އަސްކަރީ މަރުކަޒަކުން ބައެއް މުވައްޒަފުން ވަނީ ގެންގޮސްފަ އެވެ. މީގެ އިތުރުން ސައުދީ އަރަބިއްޔާ އާއި ކުވެއިތުގައި ތިބި އެމެރިކާގެ ޑިޕްލޮމެޓިކް މިޝަންތަކުގެ މުވައްޒަފުންނަށް ވެސް ސަމާލުވުމަށް ވަނީ އަންގާފަ އެވެ.

އީރާނުގެ ހަރުކަށި ފިޔަވަޅުތަކާ ދެކޮޅަށް އެމެރިކާ އިން އަސްކަރީ ގޮތުން ފިޔަވަޅު އަޅާނެ ކަމުގެ އިންޒާރު ތަކުރާރުކޮށް ދެމުންދާއިރު، ތެހެރާނުން ވަނީ އެމެރިކާގެ އަސްކަރީ މަރުކަޒުތަކަށާއި މުދާ އުފުލާ އުޅަނދުފަހަރަށް ހަމަލާދީ ބަދަލުހިފާނެ ކަމަށް ބުނެފަ އެވެ. އެމެރިކާގެ ގިނަ އަދަދެއްގެ އަސްކަރީ މަރުކަޒުތަކާއި ވަޞީލަތްތައް ހުރީ ގަލްފު ސަރަޙައްދުގަ އެވެ.

ނަމަވެސް، އެކި އިންޒާރުތަކަށްފަހު ރައީސް ޓްރަމްޕް ވަނީ އޭނާގެ ނިންމެވުން ބަދަލުކުރައްވާފަ އެވެ. އޭނާ ވިދާޅުވި ގޮތުގައި އީރާނުން މުޒާހަރާގެ ބައިވެރިންނަށް މަރުގެ އަދަބު ނުދޭނެ ކަމުގެ ޔަޤީންކަން "ވަރަށް މުހިންމު މަޞްދަރުތަކަކުން" ވަނީ ލިބިފައި ކަމަށެވެ.

ސައުދީ އޮފިޝަލް ވިދާޅުވި ގޮތުގައި ގަލްފުގެ ޤައުމުތަކުން ކުރި މި މަސައްކަތްތަކުގެ މައިގަނޑު ބޭނުމަކީ ސަރަޙައްދުގެ ހާލަތު ކޮންޓްރޯލުން ނެއްޓިގެން ދިޔަ ނުދިނުމެވެ. "އީރާނަށް ދޭ ހަމަލާއެއްގެ ސަބަބުން މުޅި ސަރަޙައްދަށް ނޭދެވޭ ބޮޑެތި އަސަރުތަކެއް ކުރާނެ ކަމަށް އަޅުގަނޑުމެން ވޮޝިންގޓަނަށް ދެންނެވިން،" އޭނާ ވިދާޅުވި އެވެ.

އޭނާ އިތުރަށް ސިފަކުރެއްވި ގޮތުގައި، އެއީ ސަރަޙައްދުގެ މަސްލަޙަތު ހިމާޔަތްކުރުމަށްޓަކައި ނިދިނަގައިލައިގެން ބުރަ މަސައްކަތެއް ކުރަން ޖެހުނެވެ. އަދި އުފެދިފައިވާ އިތުބާރާއި ހެޔޮ މާޙައުލު ދެމެހެއްޓުމަށްޓަކައި މުޢާމަލާތްތައް އަދިވެސް ކުރިއަށްދާ ކަމަށް އޭނާ ވިދާޅުވިއެވެ.

ގަލްފު ގެ އެހެން އޮފިޝަލަކު ވިދާޅުވި ގޮތުގައި، ގަލްފު ސަރަހައްދުގައި ހުރި އެމެރިކާގެ ތަންތަނަށް އީރާނުން ހަމަލާދީފި ނަމަ، އެކަމުގެ ސަބަބުން ސަރަޙައްދުގެ ޤައުމުތަކާ އޮންނަ ގުޅުމަށް ނޭދެވޭ އަސަރުކުރާނެ ކަމުގެ މެސެޖު ވެސް ވަނީ އީރާނަށް ރައްދުކޮށްފަ އެވެ.