ތެހެރާން ގައި ހުންނަ ނިއުޒީލެންޑްގެ އެމްބަސީ ބަންދުކޮށް، އެ ގައުމުގެ ޑިޕްލޮމޭޓުން ފުރައިފި

އީރާނުގެ ސަލާމަތީ މަސްރަހު ގޯސްވަމުންދާތީ، ތެހެރާން ގައި ހުންނަ ނިއުޒީލެންޑްގެ އެމްބަސީ ވަގުތީ ގޮތުން ބަންދުކޮށް، އެ ގައުމުގެ ޑިޕްލޮމޭޓުން އީރާނުން ބޭރުވެފައިވާ ކަމަށް ނިއުޒީލެންޑް ސަރުކާރުން ހުކުރު ދުވަހު ހާމަކޮށްފި އެވެ.

ނިއުޒީލެންޑްގެ ފޮރިން މިނިސްޓްރީގެ ތަރުޖަމާނަކު ވިދާޅުވި ގޮތުގައި، އެމްބަސީގެ މުވައްޒަފުން ރޭގެ ވަގުތެއްގައި އީރާނުން ފުރާފައި ވަނީ އާންމު ދަތުރުފަތުރުގެ ފްލައިޓްތަކެއްގައި ރައްކާތެރިކަމާއެކުގަ އެވެ. އީރާނުގެ މަސްރަހު ނުރައްކާތެރިވަމުންދާތީ، ތެހެރާން ގައި ހުންނަ އެމްބަސީގެ މަސައްކަތްތައް މިހާރު ވަނީ ތުރުކީގެ އަންކާރާ އަށް ބަދަލުކޮށްފަ އެވެ.

"އީރާނަށް އެއްވެސް ބޭނުމަކު ދަތުރު ނުކުރުމަށް އަޅުގަނޑުމެން އަދިވެސް އިލްތިމާސްކުރަން. އަދި މިވަގުތު އީރާނުގައި ތިބި ނިއުޒީލެންޑްގެ ހުރިހާ ރައްޔިތުން ވެސް މިހާރުން މިހާރަށް އެ ގައުމުން ފޭބުމަށް ބާރުއަޅަން،" ތަރުޖަމާނު ވިދާޅުވި އެވެ.

މީގެ އިތުރުން، އީރާނުގައި ތިބި ނިއުޒީލެންޑްގެ ރައްޔިތުންނަށް ކޮންސިއުލާ އެހީތެރިކަން ފޯރުކޮށްދިނުމުގެ ގާބިލުކަން މިވަގުތު ވަރަށް ބޮޑަށް ހަނިވެފައިވާ ކަމަށް ފޮރިން މިނިސްޓްރީން ބުނެފައިވެ އެވެ.

މުވާސަލާތީ ގޮތުން ދިމާވެފައިވާ ބޮޑެތި ގޮންޖެހުންތަކުގެ ސަބަބުން، އީރާނުގައި ތިބި މީހުންނާއި އެމީހުންގެ އާއިލާތަކާ ގުޅުމަށް ދަތިތަކެއް ހުރިކަން ފާހަގަކުރައްވައި، އީރާނުގައި ތިބި ނިއުޒީލެންޑްގެ ރައްޔިތުންނަށް ފުރުސަތު ލިބުނުހާ އަވަހަކަށް އާއިލާތަކަށް ޚަބަރު އެންގުމަށް އެ މިނިސްޓްރީން ވަނީ އިރުޝާދު ދީފަ އެވެ.