މޫނު ނިވާކޮށްގެން ތިބި ޔަހޫދީންތަކެއް ފަލަސްތީނުގެ ނުކުޅެދޭ މީހެއްގެ ގައިގާ ވަރަށް ރަހުމު ކުޑަކޮށް ލަޓިގަނޑުންނާއި ކޮޅުފައިންތަޅާ އަނިޔާކުރާ މަންޒަރު ފެންނަ ވީޑިއޯ އެއް އާންމުވެއްޖެ

ހުޅަނގު އައްސޭރީ (ވެސްޓް ބޭންކް) ގައި މޫނު ނިވާކޮށްގެން ތިބި ބަޔަކު ރަހުމު ކުޑަކޮށް ފަލަސްތީނުގެ ނުކުޅެދޭ މީހެއްގެ ގައިގާ ލަޓިގަނޑުންނާއި ކޮޅުފައިންތަޅާ އަނިޔާކުރާ މަންޒަރު ފެންނަ ވީޑިއޯ އެއް އާންމުވެއްޖެ އެވެ.

އެސޯސިއޭޓެޑް ޕްރެސް (އޭޕީ) އަށް ލިބިފައިވާ ވީޑިއޯ ފުޓޭޖްތަކުންނާއި އެ ހާދިސާ ލޮލުން ދުށް މީހުން ކިޔައިދީފައިވާ ގޮތުގައި، އިޒްރޭލުން ހިފާފައިވާ ހުޅަނގު އައްސޭރީގައި، މޫނު ނިވާކޮށްގެން ތިބި އަދި ދަނޑިގަނޑު ފަދަ ތަކެތި ހިފައިގެން ތިބި އެތައް ބަޔަކު ދަނޑުވެރިކަން ކުރާ ތަނަކަށް ވަދެ، ފަލަސްތީނުގެ ރައްޔިތަކަށް ވަރަށް އަނިޔާވެރިކޮށް ހަމަލާދީ ޒަހަމްކޮށްލާފައިވެ އެވެ.

ސެކިއުރިޓީ ކެމެރާތަކުން ރެކޯޑުކުރެވިފައިވާ މި ވީޑިއޯ އިން ފެންނަ ގޮތުގައި، ކަޅު ހެދުމުގައި ތިބި މޫނު ނިވާކޮށްފައިވާ ބަޔަކު، ބިމަށް ވެއްޓިފައި އޮތް މީހެއްގެ ގައިގައި ތަޅައި ކޮޅުފައިން ޖަހަމުންދެ އެވެ.

މި ހާދިސާ ހިނގި ވަގުތު އެތަނުގައި ތިބި އެ މަރުކަޒު ހިންގާ އާއިލާގެ ދެ މެންބަރަކު ބުނި ގޮތުގައި، ހުޅަނގު އައްސޭރީގެ އުތުރުގައި އޮންނަ ދީރު ޝަރަފް އަވަށުގައި ހުރި އެ މަރުކަޒު ތެރެއިން ނުކުންނަން މަސައްކަތް ކުރަނިކޮށް، އުމުރުން 67 އަހަރުގެ ބާސިމް ސާލިޙް ޔާސީނަށް ހަމަލާދިނީ ހައްދުފަހަނަޅާފައިވާ ޔަހޫދީ ވަޒަންވެރިންނެވެ. 

އެމީހުން ބުނި ގޮތުގައި މިހާރު ހޮސްޕިޓަލުގައި ފަރުވާދެމުންދާ ޔާސީންގެ އަތުގެ ކަށިތައް ބިންދައިގެން ގޮސްފައިވާއިރު، އޭނާގެ މޫނަށާއި، މޭމައްޗާއި، އަދި ބުރަކަށީގެ އެކި ތަންތަނަށް ވަނީ ބޮޑެތި އަނިޔާތަކެއް ލިބިފައެވެ. މީގެ އިތުރުން އެ މަރުކަޒުގައި އޮތް ހަތަރު ކާރެއްގައި ހުޅުޖަހައި ވަނީ މުޅިން އަންދާލާފަ އެވެ.

މިއީ ހުޅަނގު އައްސޭރީގައި ހައްދުފަހަނަޅާފައިވާ ވަޒަންވެރިން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ އަމަލުތައް އިތުރުވަމުންދާ ކަމުގެ ހެއްކެކެވެ. މިދިޔަ އޮކްޓޯބަރު މަހާއި ނޮވެމްބަރު މަހުގެ ކުރީކޮޅު ފަލަސްތީނުގެ ޒައިތޫނި ބިންނަ މޫސުމުގައި މިފަދަ ހަމަލާތައް ވަނީ ވަރަށް ބޮޑަށް އިތުރުވެފަ އެވެ.

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ މި އަމަލުތައް ހިންގާ މީހުންނަކީ "ހައްދުފަހަނައެޅި ބައެއް" ކަމަށް ސިފަކޮށް، ގާނޫނު އަތަށް ނުނެގުމަށް ގޮވާލާފައިވީ ނަމަވެސް، އިންސާނީ ހައްގުތަކަށް މަސައްކަތްކުރާ ޖަމިއްޔާތަކުންނާއި ފަލަސްތީނުގެ ރައްޔިތުން ބުނާ ގޮތުގައި މިއީ ވަރަށް ފުޅާކޮށް، ކޮންމެ ދުވަހަކު ހުޅަނގު އައްސޭރީގައި ހިންގަމުންދާ ނިޒާމީ ޖަރީމާތަކެކެވެ.

މި ހާދިސާއާ ގުޅިގެން އިޒްރޭލުގެ ސިފައިން އަދި ވަކި އެއްޗެއް ބުނެފައެއް ނުވެ އެވެ.

ޖަރުމަނާއި ފަލަސްތީނުން ގުޅިގެން ހިންގާ މި މަރުކަޒުގެ ވެރިންގެ ތެރެއިން އެކަކު ބުނި ގޮތުގައި، މިއީ ފާއިތުވި އެއް އަހަރު ދުވަހުގެ ތެރޭގައި އެތަނަށް ހަމަލާދިން ތިންވަނަ ފަހަރެވެ. މީގެ ކުރިން ސެޕްޓެމްބަރު މަހު ދިން ހަމަލާގައި އެތަނުގެ އޮފީސްތަކާއި ވަސީލަތްތަކަށް ބޮޑެތި ގެއްލުންތަކެއްދީ، 600،000 އަށްވުރެ ގިނަ އެމެރިކާ ޑޮލަރުގެ ގެއްލުން ލިބިފައިވާ ކަމަށް އޭނާ ބުންޏެވެ.

ބުރާސްފަތި ދުވަހު ޔަހޫދީ ވަޒަންވެރިން އެ ސަރަހައްދަށް އަންނަތަން ފެނުމުން، އެތަނުގައި މަސައްކަތްކުރާ މީހުން ވަނީ އެތަނުން ފިލާފައެވެ. ނަމަވެސް، ޔާސީނަކީ ބީރު މީހަކަށް ވާތީ، އެތަނުން ދިއުމަށް މީހުން ދިން އިންޒާރުތައް އޭނާ އަށް ނީވުނު ކަމަށް ރިޕޯޓް ތައް ބުނެފައިވެ އެވެ.

ވީޑިއޯއިން ފެންނަ ގޮތުގައި، މޫނު ނިވާކޮށްގެން ތިބި ބަޔަކު ޔާސީންގެ ފަހަތުން ދުވަމުން ދަނިކޮށް އޭނާ ބިންމައްޗަށް ވެއްޓެ އެވެ. އެވަގުތު އެކަކު އޭނާގެ ގައިގައި ކޮޅުފައިން ޖަހާއިރު، އަނެކަކު ދަނޑިބުރިއަކުން އޭނާގެ ގައިގައި ތަޅަ އެވެ. އަދި އޭނާ ކަކޫ މައްޗަށް ތިރިވެގެން އޮއްވައި އަލުން ހަމަލާދީ، އޭނާ ބިންމައްޗަށް ވެއްޓިފައި އޮއްވައި ވެސް ބޮލުގައި ކޮޅުފައިން ޖަހައި އަނިޔާކުރެއެވެ. އެމީހުން އެތަން ދޫކޮށް ދިޔައިރު ޔާސީން އޮތީ ބިންމައްޗަށް ވެއްޓި ހަބަރު ހުސްވެފައި ކަމަށް ރިޕޯޓުތައް ބުނެ އެވެ.