އިޒްރޭލުން އަސާސީ ތަކެތި އެތެރެކުރުމަށް އަދިވެސް ހުރަސްއަޅަމުންދާ ކަމަށް އިންސާނީ އެހީދޭ ޖަމިއްޔާތަކުން ބުނަމުންދާއިރު ވެސް އިޒްރޭލުން ބުނަނީ ބޭނުންވާ މިންވަރަށް ކާބޯތަކެތި އެތެރެކުރެވެމުންދާ ކަމަށް.
ޣައްޒާގެ ދެކުނުގައި އޮންނަ ޚާން ޔޫނިސްގެ މަވާސީ ސަރަހައްދުގައި ހުންނަ ޗެރިޓީ ބަދިގެ އަކުން ފަލަސްތީނުގެ ރައްޔިތުންނަށް ކާއެއްޗެހި ބަހަނީ - ޖުލައި، 22، 2025
ޣައްޒާގެ އިންސާނީ ހާލަތު އަލުން ގޯސްވަމުންދާތީ އެކަމާ މެދު ނުހަނު ކަންބޮޑުވާކަން އިނގިރޭސިވިލާތާއި، ކެނެޑާ އަދި ފަރަންސޭސިވިލާތް ހިމެނޭހެން އެތައް ގައުމުތަކުން ހާމަ ކޮށްފި އެވެ.
އަންގާރަ ދުވަހު މި ގައުމުތަކުން ނެރުނު ގުޅިފައިވާ ބަޔާނެއްގައި ވަނީ، ޣައްޒާގެ ހާލަތު ރަނގަޅު ކުރުމަށްޓަކައި ކުއްލި ފިޔަވަޅުތަކެއް އެޅުމަށް އިޒްރޭލަށް ގޮވާލާފައެވެ.
އިނގިރޭސި ޚާރިޖީ ވުޒާރާއިން އާންމުކުރި މި ބަޔާނުގައި ބުނެފައިވަނީ، އަމިއްލަ ޖަމިއްޔާ ޖަމާއަތްތަކަށް އެއްވެސް ހުރަހެއް ނެތި، ދެމެހެއްޓެނިވި ގޮތެއްގައި މަސައްކަތް ކުރުމުގެ ފުރުސަތު އިޒްރޭލުން ފަހިކޮށްދޭންޖެހޭނެ ކަމަށެވެ. އަދި ފަލަސްތީނުގެ ސަރަހައްދުތަކުގައި އދ. އިން ކުރިއަށްގެންދާ އިންސާނީ އެހީގެ މަސައްކަތްތަކަށް ހުރަސްނޭޅުމަށް ވެސް ބަޔާނުގައިވެއެވެ.
ކެނެޑާ، ޑެންމާކް، ފިންލޭންޑް، ފަރަންސޭސިވިލާތް، އައިސްލޭންޑް، ޖަޕާން، ނޯވޭ، ސްވިޑަން، ސްވިޒަލޭންޑް އަދި އިނގިރޭސިވިލާތުގެ ޚާރިޖީ ވަޒީރުން ސޮއިކުރައްވާފައިވާ މި ބަޔާނުގައި، ޣައްޒާގެ އިންސާނީ ހާލަތު އަލުން އިންތިހާއަށް ގޯސްވަމުންދާ ދިއުމާމެދު ނުހަނު ބޮޑަށް ކަންބޮޑުވާކަން ވަނީ ހާމަކޮށްފައެވެ.
މީގެ އިތުރުން، ބޭހާއި ވަގުތީ ހިޔާވަހިކަން ގާއިމުކުރުމަށް ބޭނުންވާ ސާމާނު ފަދަ ތަކެތި އެތެރެކުރުމުގައި އިޒްރޭލުން ގެންގުޅޭ "އަސާސެއް ނެތް ހުރަސްތައް" ނައްތާލުމަށާއި، ޣައްޒާ އަށް އިންސާނީ އެހީގެ ސާމާނު ވެއްދޭ މިންވަރު އިތުރުކުރުމަށްޓަކައި ބޯޑަރުތައް ހުޅުވައިދިނުމަށް ވެސް ވަނީ ބާލާފައެވެ.
2023 ވަނަ އަހަރުގެ އޮކްޓޯބަރު މަހު ހަމާސްގެ ހަނގުރާމަވެރިން އިޒްރޭލަށް ދިން ހަމަލާތަކާ ގުޅިގެން، ދެ އަހަރެއްހާ ދުވަހު އިޒްރޭލުން ޣައްޒާ އަށް ދެމުންދިޔަ ވަރުގަދަ ހަމަލާތަކަށްފަހު، މިދިޔަ އޮކްޓޯބަރު މަހު ދެފަރާތުން ވަނީ ހަމަލާ ބަދަލުކުރުން ހުއްޓާލުމަށް އެއްބަސްވެފައެވެ.
ދުނިޔޭގެ ބަނޑުހައިހޫނުކަމުގެ ނުރައްކާތެރިކަން ބަލާ މޮނިޓަރިން އިދާރާތަކުން ޑިސެމްބަރު 19 ގައި ބުނެފައިވަނީ، ހަމަލާ ބަދަލުކުރުން ހުއްޓާލުމަށްފަހު އިންސާނީ އެހީ އާއި ކާބޯތަކެތި ވެއްދުމުގެ ފުރުސަތު ކުރިއަށްވުރެ ބޮޑަށް ލިބުމާ ގުޅިގެން، ޣައްޒާގައި އޭރު އޮތް ބޮޑު ތަދުމަޑުކަމުގެ ހާލަތު މިހާރު ނެތް ކަމަށެވެ.
ނަމަވެސް، އިންސާނީ އެހީ ފޯރުކޮށްދޭ ޖަމިއްޔާތަކުން ބުނަމުންދަނީ، ތޮއްޖެހިފައިވާ ޣައްޒާގެ ރައްޔިތުންނަށް މިހާރު ފޯރުކޮށްދޭ އެހީގެ މިންވަރު ވަރަށް މަދު ކަމަށާއި، އަސާސީ ގިނަ ތަކެތި އެތެރެކުރުމަށް އިޒްރޭލުން އަދިވެސް ހުރަސްއަޅަމުންދާ ކަމަށެވެ. މިއާ ޚިލާފަށް އިޒްރޭލުން ބުނަމުންދަނީ ބޭނުންވާ މިންވަރަށް ކާބޯތަކެތި އެތެރެކުރެވެމުންދާ ކަމަށާއި، މައްސަލައަކީ ޣައްޒާގެ އެތެރޭގައި އެތަކެތި ބެހުމުގައި ހުރި ގޮންޖެހުންތައް ކަމަށެވެ.
