ފަލަސްތީނުގެ ދައުލަތެއް ގާއިމު ކުރުން ހުއްޓުވުމަށް އިޒްރޭލުން ވެސްޓް ބޭންކުގައި އިތުރު 19 އާބާދީ ގާއިމުކުރަން ހުއްދަދީފި
އިޒްރޭލުގެ ފައިނޭންސް މިނިސްޓަރު ސްމޮޓްރިޗްގެ އޮފީހުން ބުނި ގޮތުން ފާއިތުވި ތިން އަހަރު ތެރޭގައި ހުއްދަ ދީފައިވާ ސެޓްލްމަންޓްތަކުގެ ޖުމްލަ އަދަދު 69 އަށް އަރައިފި. އދ.ގެ ސެކްރެޓަރީ ޖެނެރަލް ގުޓެރޭސް ވަނީ އިޒްރޭލުން ވެސްޓް ބޭންކުގައި އާބާދީތައް އިންތިހާ އަށް ފުޅާކުރަމުން ގެންދާތީ ނުރުހުން ފާޅުކުރައްވާފައި.
އިޒްރޭލުން ހިފާފައިވާ ހުޅަނގު އައްސޭރީ ގައި ވަޒަންވެރި ކުރުވާފައިވާ ޔަހޫދީ އާބާދީތަކެއްގެ ކުރިމަތީގައި އިޒްރޭލުގެ ދިދަ ނަގާފައި - އޮގަސްޓް 14، 2025
އިޒްރޭލުގެ ސަލާމަތީ ކެބިނެޓުން ވެސްޓް ބޭންކުގައި 19 އާ އާބާދީ ގާއިމުކުރުމަށް ހުއްދަ ދީފިއެވެ. އާދީއްތަ ދުވަހު އެ ގައުމުގެ ހައްދުފަހަނަ އެޅި ވާތުފިޔައިގެ ފައިނޭންސް މިނިސްޓަރު ހާމަ ކުރި ގޮތުގައި މި ފިޔަވަޅަކީ ފަލަސްތީނުގެ ދައުލަތެއް ގާއިމުކުރުން ހުއްޓުވުމަށް އަމާޒުކޮށްގެން އެޅި ފިޔަވަޅެއް ކަމަށެވެ.
ފައިނޭންސް މިނިސްޓަރު ބެޒަލެލް ސްމޮޓްރިޗްގެ އޮފީހުން ނެރުނު ބަޔާނެއްގައިވާ ގޮތުން، މި ނިންމުމާއެކު ފާއިތުވި ތިން އަހަރު ތެރޭގައި ހުއްދަ ދީފައިވާ ސެޓްލްމަންޓްތަކުގެ ޖުމްލަ އަދަދު 69 އަށް އަރައެވެ.
މިއީ ބައިނަލްއަޤްވާމީ ޤާނޫނުތަކުގެ ދަށުން ޤަވާއިދާ ޚިލާފު ތަންތަން ކަމަށް ބެލެވޭ އިރު އެންމެ ފަހުގެ ހުއްދަ މި ދިނީ، ވެސްޓް ބޭންކުގައި އިޒްރޭލުން ގަވާއިދާ ޚިލާފަށް އާބާދީތައް ފުޅާކުރުން ކުރާ މަސައްކަތުގެ ދަށުން 2017 ވަނަ އަހަރުން ފެށިގެން އެންމެ މަތީ ދަރަޖައަށް އާބާދު ކުރުން އިތުރުވެފައިވާ ކަމަށް އދ. އިން ބުނިތާ މަދު ދުވަސްކޮޅެއްގެ ތެރޭގަ އެވެ.
"ފައިނޭންސް މިނިސްޓަރު ބެޒަލެލް ސްމޮޓްރިޗް އާއި ޑިފެންސް މިނިސްޓަރު އިޒްރޭލް ކަޓްޒް ހުށަހެޅި، ޔަހޫދިއްޔާ އާއި ސަމާރިޔާ ގައި 19 އާ ސެޓްލްމަންޓް އިއުލާންކޮށް ރަސްމީކުރުމަށް ހުށަހެޅި ހުށަހެޅުން ކެބިނެޓުން ފާސްކޮށްފިއެވެ،" ބަޔާނުގައި ބުނެފައިވެއެވެ. މި ނިންމުން ނިންމާފައިވަނީ ކޮން އިރަކު ކަމެއް އެ ބަޔާނުގައި ބުނެފައެއް ނުވެއެވެ.
ސްމޮޓްރިޗް އަކީ އާބާދީތައް ފުޅާކުރުމަށް ވަރަށް ބޮޑަށް ވަކާލާތުކުރާ ފަރާތެކެވެ. އޭނާ ވެސް ހިމެނެނީ ވެސްޓް ބޭންކުގައި އިޒްރޭލުން ޤަވާއިދާ ޚިލާފަށް ހަދާފައިވާ އާބާދީއެއްގައި ދިރިއުޅޭ މީހުންގެ ތެރޭގައެވެ.
"އަހަރެމެން މިވަނީ ފަލަސްތީނުގެ ޓެރަރިސްޓް ދައުލަތެއް ޤާއިމުވުން ހުއްޓުވާފައެވެ،" އޭނާގެ ބަޔާނުގައި އިތުރަށް ބުނެފައިވެ އެވެ.
"އަހަރެމެންގެ ކާބަފައިންގެ ވާރުތަ ބިމުގައި، އަހަރެމެންގެ ހައްގުގެ މަގުގައި ކުޑަވެސް ޝައްކެއްނެތި، ތަރައްޤީކޮށް، އިމާރާތްކޮށް، އާބާދުކުރުން ކުރިއަށް ގެންދާނެކަން ކަށަވަރެވެ."
އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް ވަނީ އިޒްރޭލުން އެ ބިމުގައި އާބާދީތައް "އިންތިހާއަށް" ފުޅާކުރަމުން ގެންދާތީ އެކަމާ ނުރުހުން ފާޅުކުރައްވާފަ އެވެ.
މި މަހުގެ ކުރީކޮޅު އޭނާ ވިދާޅުވީ "މިކަމުގެ ސަބަބުން ހަމަނުޖެހުންތައް އިތުރުވެ، ފަލަސްތީނުގެ ރައްޔިތުންނަށް އެމީހުންގެ ބިމަށް އެނބުރި ދިއުމަށް ހުރަސްއެޅި، ފުރިހަމަ އަށް މިނިވަން، ޑިމޮކްރެޓިކް، ފަލަސްތީނުގެ ދައުލަތެއް ޤާއިމުކުރުމުގެ ފުރުސަތަށް ނުރައްކާވާނެ އެވެ."
ޣައްޒާ ހަނގުރާމަ ފެށުނު ފަހުން ފަލަސްތީނުގެ ދައުލަތެއް ޤާއިމުކުރުމަށް ގޮވާލާ ގޮވާލުންތައް ވަނީ އިތުރުވެފައެވެ. ޔޫރަޕުގެ ބައެއް ޤައުމުތަކާއި، ކެނެޑާ އަދި އޮސްޓްރޭލިއާ އިން ވަނީ މިފަދަ ދައުލަތެއް ރަސްމީކޮށް ބަލައިގަތުމަށް މަސައްކަތް ކޮށްފައެވެ. މިކަމުގެ ސަބަބުން އިޒްރޭލުން ވަނީ އެ ޤައުމުތަކަށް ފާޑުކިޔައިފައެވެ.
