ޣައްޒާގެ ޚާން ޔޫނިސް އަށް އިޒްރޭލުން ދިން ހަމަލާއެއްގައި ތިން މީހަކު ޝަހީދުކޮށްލައިފި

އިޒްރޭލުން ޣައްޒާގެ ރައްޔިތުންނާ ދެކޮޅަށް ހިންގަމުންދާ ގަތުލުއާންމުގެ ތެރެއިން، މިދިޔަ އޮކްޓޯބަރު މަހު އެއްބަސްވި ހަނގުރާމަ ހުއްޓާލުމުގެ އެއްބަސްވުމާ ޚިލާފަށް ޣައްޒާގެ ދެކުނަށް ދިން ހަމަލާތަކެއްގައި ފަލަސްތީނުގެ ތިން މީހަކު ޝަހީދުކޮށްލައިފި ކަމަށް ޣައްޒާގެ މަސްދަރުތަކުން ބުނެފި އެވެ.

މީގެ އިތުރުން، ހަމާސް އާ ދެކޮޅު ހަތިޔާރުއެޅި ގުރޫޕަކުން ދިން ހަމަލާއެއްގައި ސަލާމަތީ ބާރުތަކުގެ އިސް އޮފިސަރަކު ވެސް ވަނީ ޝަހީދު ކޮށްލާފަ އެވެ.

އަލްޖަޒީރާ އަށް މައުލޫމާތު ދިން މަސްދަރުތަކާ ހަވާލާދީ ބުނި ގޮތުގައި، ހޯމަ ދުވަހު އިޒްރޭލުގެ ކުއަޑްކޮޕްޓަރު ޑްރޯންއަކުން ޚާން ޔޫނިސް އަށް ދިން ހަމަލާއެއްގައި ތިން މީހަކު ވަނީ ޝަހީދުވެފަ އެވެ. އަދި ޚާން ޔޫނިސްގެ އަލް-ބަޠަން އަލް-ސަމީން ސަރަހައްދުގައި އިޒްރޭލު ސިފައިން ބަޑިޖެހުމުގެ ސަބަބުން ފަލަސްތީނުގެ އަންހެނަކު ޒަޚަމްވެފައިވާ ކަމަށް ވެސް ރިޕޯޓްތައް ބުނެ އެވެ.

މި ހަމަލާތައް ދީފައިވަނީ ހޯމަ ދުވަހު އިޒްރޭލު ސިފައިން ޣައްޒާގެ އެކި ސަރަހައްދުތަކަށް ވައިގެ މަގުންނާއި ބޮޑުބަޑިން ވަރުގަދަ ހަމަލާތަކެއް ދެމުންދަނިކޮށެވެ.

ފަލަސްތީނުގެ ނޫސް އެޖެންސީ 'ވަފާ' އިން ރިޕޯޓްކޮށްފައިވާ ގޮތުގައި، މި ހަމަލާގައި ޝަހީދުވެފައި ވަނީ ވިސާމް ޢަބްދުﷲ ސާލިމް އަލް-އަމޫރު އާއި، މަޙްމޫދު ސުބްޙީ ބްރައިކާ އަދި އާޠިފް ސަމީރު އަލް-ބަޔޫކް އެވެ.

2023 ވަނަ އަހަރުގެ އޮކްޓޯބަރު މަހުން ފެށިގެން އިޒްރޭލުން ކުރަމުންދާ މި ހަނގުރާމައިގައި މިހާތަނަށް 71,400 އަށްވުރެ ގިނަ މީހުން ޝަހީދުކޮށްލާފައިވާއިރު، އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ. އަދި 171,000 އަށްވުރެ ގިނަ މީހުން ޒަޚަމްވެފައިވާއިރު، އިޒްރޭލުގެ ހަމަލާތަކުގައި ޣައްޒާގެ ގެދޮރާއި، ހޮސްޕިޓަލްތަކާއި، ސުކޫލުތަކުގެ އިތުރުން އާންމު ޚިދުމަތްތައް ދޭ ހުރިހާ ވަސީލަތްތަކެއް ވަނީ ސުންނާފަތިކޮށްލާފަ އެވެ.

އޮކްޓޯބަރު 10 ވަނަ ދުވަހުން ފެށިގެން ހަނގުރާމަ ހުއްޓާލުމުގެ އެއްބަސްވުމެއް އޮތް ނަމަވެސް، އިޒްރޭލު ސިފައިން ދަނީ މެދުކެނޑުމެއްނެތި ހަމަލާތައް ދެމުންނެވެ. ޣައްޒާގެ ސިއްހީ ވުޒާރާ އިން ހާމަކޮށްފައިވާ ގޮތުގައި އެ ދުވަހުން ފެށިގެން މިހާތަނަށް ފަލަސްތީނުގެ 440 އަށް ވުރެ ގިނަ މީހުން ޝަހީދުކޮށްލައި، 1,200 އަށްވުރެ ގިނަ މީހުން ވަނީ ޒަޚަމްކޮށްލާފަ އެވެ.

ޣައްޒާގެ ސަރުކާރުގެ މީޑިއާ އޮފީހުން ބުނި ގޮތުގައި، އޮކްޓޯބަރު 10 އިން ފެށިގެން މިދިޔަ ހުކުރު ދުވަހުގެ ނިޔަލަށް އިޒްރޭލުން ވަނީ މަދުވެގެން 1,193 ފަހަރު ހަނގުރާމަ ހުއްޓާލުމުގެ އެއްބަސްވުމާ ޚިލާފުވެފަ އެވެ. މީގެ ތެރޭގައި ވައިގެ މަގުންނާއި، ބޮޑުބަޑިން އަދި ބަޑީގެ ހަމަލާތައް ހިމެނެ އެވެ.