އިޒްރޭލުން ހަމަލާދީ ޣައްޒާ ގައި ތިން މީހަކު ޝަހީދުކޮށްލައިފި

އާދީއްތަ ދުވަހު ޣައްޒާގެ ދެކުނުގެ ރަށެއް ކަމަށްވާ ޚާން ޔޫނިސްގެ އެކި ސަރަހައްދުތަކުގައި އިޒްރޭލު ސިފައިން ދިން ހަމަލާތަކެއްގައި ފަލަސްތީނުގެ މަދުވެގެން ތިން މީހަކު ޝަހީދުކޮށްލާފައިވާ ކަމަށް އެ ސަރަހައްދުގެ ސިއްހީ އިދާރާތަކުން ބުނެފިއެވެ.

ސިއްހީ އެހީތެރިން މައުލޫމާތު ދޭ ގޮތުގައި، ޝަހީދުވި މީހުންގެ ތެރޭގައި 15 އަހަރުގެ ކުއްޖަކާއި، އިޒްރޭލުން ހިފާފައިވާ ސަރަހައްދުން ބޭރުގައި މަސައްކަތް ކުރަނިކޮށް ބަޑިޖަހާ މަރާލި މަސްވެރިއެއްގެ އިތުރުން، ޚާން ޔޫނިސްގެ އިރުމަތީ ގައި އިޒްރޭލުގެ  ކޮންޓްރޯލް އޮންނަ ސަރަހައްދެއްގައި ހުއްޓާ ބަޑިޖަހާ މަރާލި މީހަކު ހިމެނެއެވެ.

މި ހާދިސާތަކާ ގުޅޭގޮތުން އިޒްރޭލުގެ އަސްކަރިއްޔާ އިން އަދި ވަކި އެއްޗެއް ބުނެފައެއް ނުވެއެވެ.

އޮކްޓޫބަރު މަހު ހަނގުރާމަ ހުއްޓާލުމުގެ އެއްބަސްވުމަކަށް އައި ފަހުން ވެސް، އިޒްރޭލުން ގެންދަނީ ތަކުރާރުކޮށް ވައިގެ ހަމަލާތައް ދެމުންނެވެ. އިޒްރޭލުން ދައުވާ ކުރާ ގޮތުގައި މި ހަމަލާތަކަކީ ހަމަލާ ދިނުން ހުއްޓުވުމަށާއި މުޖާހިދުންގެ އިންފްރާސްޓްރަކްޗާ ހަލާކުކޮށްލުމަށް ދޭ ހަމަލާތަކެކެވެ.

ޣައްޒާގެ ސިއްހަތާ ބެހޭ ވުޒާރާއިން ބުނާ ގޮތުގައި ހަނގުރާމަ ހުއްޓާލި ފަހުން ފަލަސްތީނުގެ 420 މީހުން ޝަހީދުވެފައިވާ އިރު، މުޖާހިދުންގެ ހަމަލާތަކުގައި އިޒްރޭލުގެ ތިން ސިފައިން މަރުވެފައިވެއެވެ.

އެމެރިކާގެ ރައީސް ޑޮނަލްޑް ޓްރަމްޕްގެ މެދުވެރިކަމުގައި ގާއިމުކުރި ހަނގުރާމަ ހުއްޓާލުމުގެ އެއްބަސްވުމާ ހިލާފުވަމުންދާ ކަމަށް ބުނެ އިޒްރޭލާއި ހަމާސް އިން ދަނީ އެއް ބަޔަކު އަނެއް ބަޔަކަށް ތުހުމަތު ކުރަމުންނެވެ.

ޓްރަމްޕްގެ ހަނގުރާމަ ހުއްޓާލުމުގެ ޕްލޭންގެ ފުރަތަމަ މަރުހަލާގައި ޣައްޒާގެ 53 އިންސައްތަ އޮތީ އިޒްރޭލު ގެ ކޮންޓްރޯލްގެ ދަށުގައެވެ. މި މަރުހަލާގައި ހިމެނެނީ ޣައްޒާގައި ތިބި އަސީރުން މިނިވަންކުރުމާއި އިޒްރޭލުން ހައްޔަރުކޮށްފައިވާ ފަލަސްތީނު މީހުން ދޫކޮށްލުމެވެ.

އެންމެ ފަހުން ހަވާލުކުރަން އޮތް އަސީރަކީ 2023 އޮކްޓޫބަރު 7 ގައި މަރުވި އިޒްރޭލުގެ ފުލުހެއްގެ ހަށިގަނޑެވެ. 

ޣައްޒާގެ ސިއްހަތާ ބެހޭ ވުޒާރާ އިން ބުނާ ގޮތުގައި އިޒްރޭލުން ޣައްޒާ އަށް ދެމުންދާ އަސްކަރީ ހަމަލާތަކުގައި މިހާތަނަށް ފަލަސްތީނުގެ 71,000 އަށްވުރެ ގިނަ މީހުން ޝަހީދުވެފައިވެ އެވެ. މިކަމާ ގުޅިގެން އިޒްރޭލުގެ މައްޗަށް ނަސްލު ނައްތާލުމާއި ހަނގުރާމައިގެ ޖަރީމާތަކުގެ ތުހުމަތު ކުރެވުނު ނަމަވެސް، އިޒްރޭލުން އެ ހުރިހާ ތުހުމަތުތަކަކަށް އިންކާރު ކުރެ އެވެ.