އިޒްރޭލުން ޣައްޒާގެ ފަލަސްތީީނު ރައްޔިތުން ސޯމާލީލޭންޑަށް ބަދަލުކުރަން އުޅޭކަމަށް ސޯމާލިއާގެ މިނިސްޓަރަކު ތުހުމަތުކުރައްވައިފި

ޣައްޒާގައި ދިރިއުޅޭ ފަލަސްތީނުގެ ރައްޔިތުން، ސޯމާލިއާ އިން ވަކިވެގަތުމަށް މަސައްކަތްކުރާ ސޯމާލީލޭންޑަށް ގަދަކަމުން ބަދަލުކުރުމަށް އިޒްރޭލުން  ރާވަމުންދާކަމަށް ސޯމާލިއާގެ ޑިފެންސް މިނިސްޓަރު އަޙްމަދު މުޢައްލިމް ފިޤީ ތުހުމަތުކުރައްވައިފި އެވެ. އަދި މިއީ ބައިނަލްއަޤުވާމީ ޤާނޫނުތަކާ ކަނޑައެޅިގެން ޚިލާފު، ނުރައްކާތެރި ރޭވުމެއްގެ ގޮތުގައި އޭނާ ވަނީ ސިފަކުރައްވާފަ އެވެ.

އަލްޖަޒީރާ އަށް ދެއްވި ބަސްދީގަތުމެއްގައި ފިޤީ ވިދާޅުވީ، އިޒްރޭލުން ފަލަސްތީނު މީހުން ސޯމާލީލޭންޑަށް ފޮނުވާލުމަށް ރާވާފައިވާކަމުގެ ކަށަވަރު މަޢުލޫމާތު ސޯމާލިއާ ސަރުކާރަށް ލިބިފައިވާ ކަމަށެވެ. މި ތުހުމަތުތަކާ ގުޅިގެން އިޒްރޭލާއި ސޯމާލީލޭންޑުން ވަނީ އެފަދަ ކަމެއް ހިނގަމުން ނުދާކަމަށް ބުނެ އިންކާރުކޮށްފަ އެވެ.

1991 ވަނަ އަހަރު ސޯމާލިއާ އިން ވަކިވެ މިނިވަންކަން އިޢުލާނުކުރި ނަމަވެސް، ސޯމާލީލޭންޑަކީ އދ. އިން ބަލައިގަންނަ ދައުލަތެއް ނޫނެވެ. ނަމަވެސް، މިދިޔަ ޑިސެމްބަރު މަހު އިޒްރޭލުން ވަނީ ސޯމާލީލޭންޑަކީ މިނިވަން ދައުލަތެއްގެ ގޮތުގައި ބަލައިގަތުމަށް ނިންމާފައެވެ. މިއީ ދުނިޔޭގެ ޤައުމަކުން މިފަދަ ނިންމުމެއް ނިންމި ފުރަތަމަ ފަހަރެވެ.

އިޒްރޭލުގެ ފޮރިން މިނިސްޓަރު ގިޑިއޯން ސާރް ވިދާޅުވި ގޮތުގައި، ފަލަސްތީނު މީހުން ސޯމާލީލޭންޑަށް ބަދަލުކުރުމަކީ ދެފަރާތުގެ ދެމެދުގައި ވެފައިވާ އެއްބަސްވުމުގެ ބައެއް ނޫނެވެ. ނަމަވެސް، ސޯމާލީލޭންޑާއެކު ސިޔާސީ، ސަލާމަތީ އަދި ތަރައްޤީގެ ދާއިރާތަކުން ގުޅުން ބަދަހިކުރުމުގެ މަޝްވަރާތައް ކުރިއަށްދާކަން އޭނާ ފާހަގަކުރެއްވި އެވެ.

ސޯމާލިއާގެ ރައީސް ޙަސަން ޝައިޚް މަޙްމޫދު ކުރިން ވިދާޅުވެފައި ވަނީ، އިޒްރޭލުން ހުށަހެޅި ތިން ޝަރުތަކަށް ސޯމާލީލޭންޑުން އެއްބަސްވެފައިވާ ކަމަށެވެ. އެއީ ފަލަސްތީނު މީހުން ވަޒަންވެރިކުރުވުމާއި، ގަލްފް އޮފް އަދަންގެ އައްސޭރިފަށުގައި އަސްކަރީ މަރުކަޒެއް ގާއިމުކުރުމާއި، އަދި އިޒްރޭލާއެކު ގުޅުން އާންމުކުރުމުގެ "އަބްރަހަމް އެކޯޑްސް" ގައި ބައިވެރިވުމެވެ.

މިނިސްޓަރު ފިޤީ ވަނީ ސޯމާލީލޭންޑް ބަލައިގަތުމަށް އިޒްރޭލުން ނިންމި ނިންމުން އަނބުރާ ގެންދިއުމަށް ގޮވާލައްވާފަ އެވެ. އަދި މިއީ ސޯމާލިއާގެ އިސްތިޤްލާލަށް ދިން ސީދާ ޙަމަލާއެއްގެ ގޮތުގައި އޭނާ ސިފަކުރެއްވި އެވެ. މީގެ އިތުރުން، އިޒްރޭލުން މަސައްކަތް ކުރަނީ މެދުއިރުމައްޗާއި އެ ސަރަހައްދުގެ ޤައުމުތައް ބައިބައިކޮށް، އެ ތަންތަނުގެ ކޮންޓްރޯލް ހޯދުމަށް ކަމަށްވެސް އޭނާ ތުހުމަތުކުރެއްވި އެވެ.

އަދަން ކަނޑު ގައި އިޒްރޭލުގެ އަސްކަރީ މަރުކަޒެއް

ސޯމާލިއާގެ މިނިސްޓަރު އިތުރަށް ތުހުމަތުކުރެއްވި ގޮތުގައި، ރަތް ކަނޑާއި އަދަން ކަނޑު ގުޅުވައިދޭ ބާބުލް މަންދަބް ކަނޑުއޮޅީގައި އަސްކަރީ މަރުކަޒެއް ބިނާކުރުމަށް އިޒްރޭލުން ދަނީ މަސައްކަތް ކުރަމުންނެވެ. ސޯމާލީލޭންޑުގެ އޮފިޝަލަކު ވަނީ މިފަދަ މަޝްވަރާތަކެއް ކުރިއަށްދާކަން ކަށަވަރުކޮށްދީފައި ކަމަށް އަލްޖަޒީރާ އިން ބުނެފައިވެ އެވެ. ނަމަވެސް، ޔަމަނުގެ ޙޫޘީން ބުނެފައިވަނީ އެ ސަރަހައްދުގައި އިޒްރޭލުގެ އެއްވެސް ހަރަކާތެއް އޮތުމަކީ ނުރައްކަލެއް ކަމަށާއި، އެފަދަ ތަނަކަށް ޙަމަލާދޭނެ ކަމަށެވެ.

އިޒްރޭލުގެ ފޮރިން މިނިސްޓަރު ސޯމާލީލޭންޑުގެ ވެރިރަށް ހަރްގޭސާ އަށް ކުރެއްވި ޒިޔާރަތާ ގުޅިގެން، އިސްލާމީ އުއްމަތުގެ ޤައުމުތަކާއި (OIC) އަދި އިތުރު 22 ޤައުމަކުން ވަނީ އެކަން ކުށްވެރިކޮށްފަ އެވެ. ތުރުކީގެ ފޮރިން މިނިސްޓަރު ހަކާން ފިދާން ވިދާޅުވީ، އެހެން ޤައުމުތަކުން ސޯމާލީލޭންޑް ބަލައިގަތުން ހުއްޓުވުމަށް އިސްލާމީ ޤައުމުތަކުން ގުޅިގެން މަސައްކަތް ކުރަމުންދާ ކަމަށެވެ.

އިންޑިއާއިން ވެސް ވަނީ ސޯމާލިއާގެ އިސްތިޤްލާލާއި ސަރަހައްދީ ފުރިހަމަކަމަށް އިޙްތިރާމްކުރާކަން ހާމަކޮށް، ސޯމާލީލޭންޑް ބަލައިގަތުމުގެ ވިސްނުމެއް ނެތްކަން ހާމަކޮށްފަ އެވެ.

ރައީސް މަޙްމޫދު ވަނީ ސޯމާލީލޭންޑުގެ ލީޑަރުންނަށް އިޒްރޭލާ އެކު އޮތް ގުޅުން ކަނޑާލައި، މޮގަދިޝޫ އާއެކު މަޝްވަރާ ކުރުމަށް ގޮވާލައްވާފަ އެވެ. އަދި ސޯމާލިއާ ސަރުކާރުގެ ރުހުމާ ނުލައި ސޯމާލީލޭންޑަށް ބައިނަލްއަޤުވާމީ ފެންވަރުގައި ބަލައިގަތުމެއް ނުލިބޭނެކަން ވެސް އޭނާ ފާހަގަކުރެއްވި އެވެ.

ސޯމާލީލޭންޑުގެ އޮފިޝަލުން ބުނަމުންދަނީ އިޒްރޭލުގެ ފިޔަވަޅާ އެއްގޮތަށް އިތުރު ޤައުމުތަކަކުން ވެސް އެތަން ބަލައިގަންނާނެ ކަމަށެވެ.