އިޒްރޭލު ފުލުހުން ނަތަންޔާހޫގެ ޗީފް އޮފް ސްޓާފް ހައްޔަރު ކޮށްފި
ޣައްޒާގައި ހިނގަމުންދާ ހަނގުރާމައާ ގުޅޭ އަސްކަރީ ސިއްރު މައުލޫމާތުތަކެއް ލީކުވި މައްސަލައެއްގެ ތަހުގީގަށް ހުރަސްއެޅިކަމުގެ ތުހުމަތުގައި އިޒްރޭލުގެ ބޮޑުވަޒީރުގެ ޗީފް އޮފް ސްޓާފް ސާކީ ބްރޭވްމަން ފުލުހުން ހައްޔަރުކޮށްފި. ނަތަންޔާހޫގެ ކުރީގެ އެހީތެރި އެއް ކަމަށްވާ އެލީ ފެލްޑްސްޓީން 2024 ވަނަ އަހަރުގެ ސެޕްޓެމްބަރު މަހު އިޒްރޭލު ސިފައިންގެ ސިއްރު ލިޔުމެއް ޖަރުމަނުގެ ބިލްޑް ނޫހަށް ލީކުކޮށްލާފައިވާއިރު، އެ ލިޔުން ލީކުކޮށްލީ ހަމާސް އިން ހަނގުރާމަ ހުއްޓާލަން ބޭނުން ނުވާކަން ދައްކައި ނަތަންޔާހޫގެ ވާހަކަތަކަށް ބާރުދީ އާންމުންގެ ތާއީދު ހޯދުމަށް.
އިޒްރޭލުގެ ކެބިނެޓް ބައްދަލުވުމެއްގައި ސާކީ ބްރޭވްމަން (ކ) ނަތަންޔާހޫ އާ ވާހަކަ ދައްކަނީ | ގެޓީ އިމޭޖަސް
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ ޗީފް އޮފް ސްޓާފް އެ ގައުމުގެ ފުލުހުން ހައްޔަރު ކޮށްފި އެވެ.
ޣައްޒާގައި ހިނގަމުންދާ ހަނގުރާމައާ ގުޅޭ އަސްކަރީ ސިއްރު މައުލޫމާތުތަކެއް ލީކުވި މައްސަލައެއްގެ ތަހުގީގަށް ހުރަސްއެޅިކަމުގެ ތުހުމަތުގައި، ބޮޑުވަޒީރު ބެންޖަމިން ނަތަންޔާހޫގެ އިސް މުވައްޒަފަކު ފުލުހުންގެ ބެލުމުގެ ދަށަށް ގެންގޮސްފި ކަމަށް ފުލުހުން ބުނެފައިވާ އިރު އިޒްރޭލުގެ މީޑިއާތަކުން ރިޕޯޓްކުރާ ގޮތުގައި، ހައްޔަރުކޮށްފައިވަނީ ނަތަންޔާހޫގެ މިހާރުގެ ޗީފް އޮފް ސްޓާފް އަދި އިނގިރޭސިވިލާތަށް ސަފީރު ކަމަށް ކަނޑައަޅަން ނިންމާފައިވާ ސާކީ ބްރޭވްމަން އެވެ.
ފުލުހުން ނެރުނު ބަޔާނެއްގައި ބުނެފައިވަނީ، ބޮޑުވަޒީރުގެ އޮފީހުގެ އިސް އޮފިޝަލަކު ތަހުގީގަށް ހުރަސްއެޅިކަމުގެ ތުހުމަތުގައި ސުވާލުކުރުމަށްޓަކައި އާދީއްތަ ދުވަހު ހައްޔަރުކޮށްފައިވާ ކަމަށެވެ.
މި މައްސަލަ އަކީ ހަމާސްއާ ދެކޮޅަށް ކުރަމުންދާ ހަނގުރާމައިގެ ތެރޭގައި، އަސްކަރީ ސިއްރު މައުލޫމާތުތަކެއް ބޭރުގެ މީޑިއާތަކަށް ފޯރުކޮށްދިން މައްސަލައެކެވެ. ނަތަންޔާހޫގެ ކުރީގެ އެހީތެރި އެއް ކަމަށްވާ އެލީ ފެލްޑްސްޓީން ދާދިފަހުން ވަނީ، މި މައްސަލައިގެ ތަހުގީގަށް ހުރަސްއެޅުމަށް ބްރޭވްމަން މަސައްކަތް ކުރި ކަމަށް ތުހުމަތުކޮށްފަ އެވެ.
2024 ވަނަ އަހަރުގެ ސެޕްޓެމްބަރު މަހު ފެލްޑްސްޓީން ވަނީ އިޒްރޭލު ސިފައިންގެ ސިއްރު ލިޔުމެއް ޖަރުމަނުގެ "ބިލްޑް" ނޫހަށް ލީކުކޮށްލާފަ އެވެ. މި މައްސަލައިގައި އޭނާ ހައްޔަރުކޮށް، ދައުވާވެސް ވަނީ އުފުލާފަ އެވެ. އެ ލިޔުން ލީކުކޮށްލުމުގެ ބޭނުމަކީ، ހަމާސް އިން ހަނގުރާމަ ހުއްޓާލުމުގެ އެއްބަސްވުމަކަށް އަންނަން ބޭނުން ނުވާކަން ދެއްކުމާއި، ރަހީނުން މިނިވަން ކުރެވޭނީ ހަމައެކަނި އަސްކަރީ ބާރުގެ ބޭނުންކޮށްގެން ކަމަށް ބުނެ ނަތަންޔާހޫ ދައްކަވާ ވާހަކަތަކަށް ބާރުދީ، އާންމުންގެ ތާއީދު ހޯދުން ކަމަށްވެ އެވެ.
އިޒްރޭލުގެ ދައުލަތުގެ މީޑިއާ "ކާން" (KAN) އަށް ދިން އިންޓަވިއުއެއްގައި ފެލްޑްސްޓީން ބުނީ، މައުލޫމާތުތައް ލީކުވިތާ މާގިނަ ދުވަސްތަކެއް ނުވަނީސް އޭނާއާ ބައްދަލުކުރުމަށް ބްރޭވްމަން އެދުނު ކަމަށެވެ. އަދި އެ މައްސަލަ އަސްކަރިއްޔާއިން ތަހުގީގު ކުރަމުންދާ ކަމަށާއި، އެ ތަހުގީގު "ހުއްޓުވާލެވިދާނެ" ކަމަށް ބްރޭވްމަން ބުނި ކަމަށްވެސް ފެލްޑްސްޓީން ތުހުމަތުކުރި އެވެ.
މީގެ އިތުރުން، މި މައުލޫމާތު ލީކުކުރުމުގެ ކަންކަން ނަތަންޔާހޫ އަށް އެނގިވަޑައިގަންނަވާ ކަމަށާއި، ހަނގުރާމަ އަށް އާންމުންގެ ތާއީދު ހޯދުމަށް އެ ލިޔުން ބޭނުންކުރުމަށް ބޮޑުވަޒީރު ބޭނުންފުޅުވި ކަމަށްވެސް އޭނާ ބުންޏެވެ. އިޒްރޭލުގެ މީޑިއާ ރިޕޯޓްތައް ބުނާ ގޮތުގައި، މި މައްސަލައިގެ ތަހުގީގަށް އާދީއްތަ ދުވަހު ފުލުހުން ވަނީ ބްރޭވްމަންގެ ގެ ބަލައި ފާސްކޮށްފައެވެ.
