ސުލްހައިގެ އެއްބަސްވުމުގެ ފަހުން ޣައްޒާ ގައި 100 އަށް ވުރެ ގިނަ ކުޑަކުދިން އިޒްރޭލުން ޝަހީދު ކޮށްލައިފި
ޝަހީދުވި ކުދިންގެ ތެރޭގައި ހިމެނޭ 60 ފިރިހެން ކުދިންނާއި 40 އަންހެން ކުދިންގެ ތެރެއިން ގާތްގަނޑަކަށް ހުރިހާ ކުދިންނަކީ ވެސް ވައިގެ ހަމަލާތަކާއި، ޑްރޯން ހަމަލާތަކާއި، ޓޭންކުތަކުން ދިން ހަމަލާތަކުގެ އިތުރުން، ބަޑީގެ ހަމަލާތަކާއި ކުއަޑްކޮޕްޓަރު ބޭނުންކޮށްގެން ދިން ހަމަލާތަކުގައި މަރުވި ކުދިން.
2024 ވަނަ އަހަރުގެ މެއި މަހުގެ 6 ވަނަ ދުވަހު ޣައްޒާގެ ދެކުނުގައި އޮންނަ ރަފަހް އަށް ދިން ހަމަލާ އެއްގައި ޝަހީދު ކޮށްލި ކުޑަކުއްޖެއްގެ ހަށިގަނޑު ހިފައިންގެ ކުއްޖާގެ މަންމަ ހިތާމަ ކުރަނީ. | ގެޓީ އިމޭޖަސް
އޮކްޓޫބަރު މަހުގެ ކުރީކޮޅު ގާއިމުކުރި ސުލްހައިގެ އެއްބަސްވުމަށް ފަހު، ޣައްޒާ ގައި 100 އަށް ވުރެ ގިނަ ކުޑަކުދިން ޝަހީދުވެފައިވާ ކަމަށާއި، މީގެ ތެރޭގައި ޑްރޯން އަދި ކުއަޑްކޮޕްޓަރު ބޭނުންކޮށްގެން ދީފައިވާ ހަމަލާތަކުގެ ޝިކާރައަކަށްވި ކުދިން ހިމެނޭ ކަމަށް އދ.ގެ ކުޑަކުދިންނާ ބެހޭ އެޖެންސީން ހާމަކޮށްފި އެވެ.
ޣައްޒާ ގައި ހުންނަވައިގެން ވީޑިއޯ މެދުވެރިކޮށް އދ.ގެ ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ޔުނިސެފްގެ ތަރުޖަމާނު ޖޭމްސް އެލްޑާ ވިދާޅުވީ، ސުލްހައިގެ އެއްބަސްވުމުގެ ފަހުން ވެސް ޣައްޒާ ގައި 100 އަށްވުރެ ގިނަ ކުޑަކުދިންގެ ފުރާނަ ގެއްލިފައިވާ ކަމަށެވެ.
"ދިރިހުރުމުގެ ފުރުސަތު އަދިވެސް އޮތީ ނުރައްކާތެރި ހާލަތެއްގައި. ސުލްހައިގެ މުއްދަތުގައި ބޮން އެޅުމާއި ބަޑީގެ ހަމަލާތައް މަދުވި ނަމަވެސް، އެ ހަމަލާތައް މުޅިން ހުއްޓިފައެއް ނުވޭ،" އެލްޑާ ވިދާޅުވިއެވެ.
ޝަހީދުވި ކުދިންގެ ތެރޭގައި ހިމެނޭ 60 ފިރިހެން ކުދިންނާއި 40 އަންހެން ކުދިންގެ ތެރެއިން ގާތްގަނޑަކަށް ހުރިހާ ކުދިންނަކީ ވެސް ވައިގެ ހަމަލާތަކާއި، ޑްރޯން ހަމަލާތަކާއި، ޓޭންކުތަކުން ދިން ހަމަލާތަކުގެ އިތުރުން، ބަޑީގެ ހަމަލާތަކާއި ކުއަޑްކޮޕްޓަރު ބޭނުންކޮށްގެން ދިން ހަމަލާތަކުގައި މަރުވި ކުދިން ކަމަށް އޭނާ ވިދާޅުވި އެވެ. އަދި ބައެއް ކުދިން މަރުވެފައި ވަނީ ހަނގުރާމައިގެ ތެރޭގައި ގޮވާފައިނުވާ ބޮން ފަދަ ތަކެތި ގޮވުމުގެ ސަބަބުން ނެވެ.
އޭނާ އިތުރަށް ފާހަގަކުރެއްވި ގޮތުގައި، މި އަދަދަކީ ހަމައެކަނި އެކަށީގެންވާ މައުލޫމާތު ލިބިފައިވާ މަރުތަކަށް ބިނާކޮށްފައިވާ އަދަދަކަށް ވާތީ، މިއީ އަސްލު މަރުވި ކުދިންގެ އަދަދަށްވުރެ މަދު އަދަދަކަށް ވުން ވަރަށް ގާތެވެ.
