ހައިމާކު ދަތްގަނޑު ދެ ފަހަރަކު ޖައްސާލި ގޮތަށް، ވެލިދޫ ބަނދަރު ގެ މަސައްކަތް ހުއްޓިފަ
މިދިޔަ އަހަރު ރައީސް މުއިއްޒު ވެލިދޫ އަށް ވަޑައިގަތުމުން ރައްޔިތުން ހުށަހެޅި ޕެޓިޝަންގެ ޖަވާބެއް އަދިވެސް ނުލިބޭ ކަމަށާއި ވެލިދޫ ގައި ތަރައްގީގެ މަޝްރޫޢުތައް އެކަށީގެންވާ ގޮތަށް ނުހިނގާކަން ރައްޔިތުން ފާހަގަކުރޭ.
ރަށެއްގެ ފަޅު ފުންކުރުމުގެ މަސައްކަތުގައި ހައިމާކެއް ހަރަކާތްތެރިވަނީ | އެމްޓީސީސީ
ނ. ވެލިދޫ ބަނދަރު ގެ ދެކޮޅުން ކުޑަ ތަންކޮޅެއް ކޮނެލުމަށް ފަހު، އެ ރަށުގެ ބަނދަރު ތަރައްގީ ކުރުމުގެ މަސައްކަތް ކުރިޔަށް ނުގޮސް ހުއްޓިފަ ވާކަމަށް ވެލިދޫ ކައުންސިލް މެމްބަރު ޙާފިޡާ އިބްރާހިމް ވިދާޅުވެއްޖެ އެވެ.
ވެލިދޫ ބަނދަރުގެ މަސައްކަތާ ގުޅޭގޮތުން ރާއްޖެ އެމްވީ އަށް މައުލޫމާތު ދެއްވަމުން ޙާފިޡާ ވިދާޅުވީ، ބަނދަރު މިހާރު އޮންނަ ގޮތުން ހާއްސަކޮށް އިރުވައި މޫސުމުގައި އޮޑިވެރިންނަށް ބޮޑެތި ގެއްލުންތަކެއް ލިބެމުން އަންނަ ކަމަށެވެ. ވެލިދޫ ބަނދަރަކީ ފުދޭވަރަކަށް ގިނަ އޮޑިދޯނި ފަހަރު ވަދެ ނިކުމެ ހަދާ ބަނދަރެއް ކަމަށާއި، ވެލިދޫ އޮންނަ ލޮކޭޝަންގެ ސަބަބުން މާލެ ދަތުރު ކުރާ ބޯޓުތަކުން ވެސް މޫސުން ގޯސްވެއްޖެ ނަމަ، ރޭގަނޑު މަޑުކުރުމަށާއި އެހެނިހެން ޒަރޫރީ ބޭނުންތަކަށް ވެސް ވެލިދޫ ބަނދަރުގައި އާންމު ގޮތެއްގައި މަޑުކުރާކަމަށް ޙާފިޡާ ވިދާޅުވި އެވެ.
ޙާފިޡާ ވިދާޅުވީ ވެލިދޫ އަކީ ގިނަ ސަފާރީ އުޅަނދުތަކެއް ވެސް އޮންނަ ރަށަކަށް ވުމުން މި ބަނދަރުގެ މުހިންމުކަން އިތުރުވާ ކަމަށެވެ. ނަމަވެސް ބަނދަރު މިހާރު އޮންނަ ގޮތުން ގޮތުން އިރުވައި މޫސުމުގައި އޮއިދައުރު ކުރާ ގޮތުން އޮޑިދޯނި ފަހަރަށް ގިނަ ގެއްލުންތަކެއް ލިބޭ ކަމަށް ޙާފިޡާ ފާހަގަކުރެއްވި އެވެ. ވެލިދޫ ބަދަރަކީ އިރުމަތި ފަރާތުގައި އޮންނަ ބަނދަރަކަށް ވުމުން، އިރުވައި މޫސުމުގައި އޮޑިވެރިންނަށް ބޮޑެތި ގެއްލުންތަކެއް ލިބިފައި އެބަހުރިކަމަށް ވެސް ޙާފިޡާ ފާހަގަކުރެއްވި އެވެ.
ކައުންސިލުން ރިކުއެސްޓް ކޮށްގެން ބަނދަރު އަޕްގްރޭޑް ކުރުމުގެ މަސައްކަތް ސަރުކާރުން ފެށިކަމަށާއި، ނަމަވެސް މިހާރު މި މަސައްކަތް ކުރިޔަށް ނުގޮސް ހުއްޓިފައި މި އޮތީ ކީއްވެކަމެއް އެއްވެސް ގޮތަކަށް ނޭނގޭކަމަށް ޙާފިޡާ ވިދާޅުވި އެވެ. މި ސަރުކާރުން ވެލިދޫގައި ފެށި އެހެން މަސައްކަތްތަކެކޭ އެއްގޮތަށް ބަނދަރުގެ މަސައްކަތް ވެސް މި އޮތީ ހުއްޓިފައި ކަމަށާއި، މަސައްކަތް ހުއްޓިފައި އޮއްވައި އަނެއްކާ މި އޮތީ މި އަހަރުގެ އިރުވައި މޫސުން ކުރިމަތިވެފައިކަމަށް ހާފިޡާ ވިދާޅުވި އެވެ.
2025 ވަނަ އަހަރުގެ ޖުލައި މަހު ރައީސް ޑރ. މުޙައްމަދު މުއިއްޒު ވެލިދޫ އަށް ވަޑައިގަތުމުން ރައްޔިތުންގެ ތެރެއިން ވަރަށް ގިނަ ބަޔަކު ސޮއިކޮށް ޕެޓިޝަނެއް ވެސް ހުށަހެޅިކަމަށާއި، އޭގެ ފަހުން އެތަކެއް މަހެއް ފާއިތުވެގެން ދިޔަ އިރުވެސް އެ ޕެޓިޝަންގެ ޖަވާބެއް އަދި ކައުންސިލަށް ނުލިބޭ ކަމަށް ޙާފިޡާ ވިދާޅުވި އެވެ.
މިދިޔަ އަހަރު ރައީސް މުއިއްޒު ވެލިދޫ އަށް ވަޑައިގަތުމުން ރައްޔިތުންގެ ތެރެއިން ވަރަށް ގިނަ ބަޔަކު ސޮއި ކޮށް ޕެޓީޝަނެއް ވެސް ހުށަހެޅި. އޭގެ ފަހުން އެތަކެއް މަހެއް ފާއިތުވެގެން ދިޔަ އިރުވެސް އެ ޕެޓިޝަން ގެ ޖަވާބެއް އަދި ކައުންސިލަށް ނުލިބޭ. ރައީސް ވިދާޅުވި ބަނދަރު ގެ ކަން ކަން ހައްލު ކޮށްދޭން. އެހެން ނަމަވެސް އަދިވެސް މި ބަނދަރު އޮތް ގޮތް ފެންނަން މި އޮތީ. މިކަން މިހެން އޮތުމުގެ ސަބަބުން ރައްޔިތުން ވަރަސް ބޮޑު ތަކުލީފުތަކެއް އުފުލަން ޖެހޭ، ހާއްސަކޮށް އޮޑިދޯނި ފަހަރު ގެންގުޅޭ ފަރާތްތަކަށް ވަރަށް ބޮޑު ތަކުލީފަކާ އެކު ވަރަށް ބޮޑެތި ގެއްލުންތަކެއް ލިބެމުންދޭ މިކަން މިހެން އޮތުމާ ގުޅިގެން.ނ. ވެލިދޫ ކައުންސިލް މެމްބަރު ޙާފިޡާ އިބްރާހިމް
ރައީސް މުއިއްޒުގެ ވެރިކަމުގެ ފުރަތަމަ ދެ އަހަރު ފާއިތުވެގެން ގޮސްފައިވާއިރު، ވެލިދޫގައި ތަރައްގީގެ އެއްވެސް މަޝްރޫޢެއް އެކަށީގެންވާ ގޮތަށް ނުހިނގާކަން އެރަށު ރައްޔިތުން ބުނެ އެވެ. ނިމިދިޔަ އެމްޑީޕީ ސަރުކާރުން އެރަށުގައި ފަށާފައިވާ މަޝްރޫޢުތައް ވެސް މިހާރު މަޑުޖެހިފައިވާކަމަށް ރައްޔިތުން ވަނީ ފާހަގަކޮށްފަ އެވެ.
އަތޮޅުތަކުގެ ރަށްރަށުގައި އަސާސީ ޚިދުމަތްތައް ޤާއިމްކޮށް، ރައްޔިތުންގެ ދިރިއުޅުމުގެ ފެންވަރު މަތިކުރުމަށްޓަކައި އެމްޑީޕީ ސަރުކާރުން ވަނީ ރަށްރަށުގައި އުމްރާނީ ތަރައްގީގެ ވަރަށް ގިނަ މަޝްރޫޢުތައް ހިންގާފަ އެވެ. އެހެން ނަމަވެސް، މި ސަރުކާރުން އެ މަޝްރޫޢުތައް ކުރިޔަށް ގެންދިއުމުގައި ލަސްވެފައިވާކަން ރައްޔިތުން ފާހަގަކުރެ އެވެ.
