''މިހާރު ބާޒާރުމަތީ ފިހާރައިގެ ވިކުރާ ކޮންމެ މަހެއްގެ 5 ން ފެށިގެން ހީވަނީ ވަޅިއަކުން ކަނޑާ ވައްޓާލާ އެއްޗެއްހެން'': އިބޫ

މިސަރުކާރުގެ އިގްތިސާދީ ސިޔާސަތުގެ ސަބަބުން ބާޒާރުމަތީ ފިހާރައިގެ ވިކުރާ ކޮންމެ މަހެއްގެ 5 އަކުން ފެށިގެން ވަރަށް ބޮޑަށް ދަށްވާ ކަމަށާއި، ވިޔަފާރިވެރިން ތިބީ މާޔޫސްވެފައި ކަމަށް ޓޫރިޒަމް މިނިސްޓްރީގެ ކުރީގެ ސްޓޭޓް މިނިސްޓަރު އިބްރާހިމް ރަޝީދު (މާމިގިލި އިބޫ) ވިދާޅުވެއްޖެ އެވެ. 

ބުރާސްފަތި ދުވަހުގެ ރޭ ފަލަސުރުހީ ޕްރޮގްރާމްގައި އިބޫ ވަނީ ވަރަށް ބޮޑަށް ރައީސް ޑރ.މުހައްމަދު މުއިއްޒު ވެރިކަމުގައި އަމަލުކުރާ އިގްތިސާދީ ސިޔާސަތަށް ވަރަށް ބޮޑަށް ފާޑު ވިދާޅުވެފަ އެވެ.

ބާޒާރުމަތީގައި ހުންނަ ފިހާރަތަކުގެ ވިކުރާއަށް އިޝާރާތް ކުރައްވައި އިބޫ ވިދާޅުވީ ކޮންމެ މަހެއްގެ 5 ގެ ފަހުން ވިކުރާ ވަރަށް ބޮޑަށް ދަށްވާ ކަމަށާއި، އޭގެފަހުން މަސް އެއްކޮށް ނިމެނީ އެހާލަތުގައި ކަމަށެވެ.

އެވާ ގޮތަކީ ދައުލަތުން މުސާރަ ލިބޭނެ މަހުގެ 28 މަސް ނިމޭހިސާބުގައި. ސިވިލް ސަރވިސް މުވައްޒަފުންނާ ސަރުކާރުގެ ވަޒީފާއެއްގައި ތިއްބަވާ ބޭފުޅުންނަށް މުސާރަ ލިބުނީމަ އެއްކަލަ މަސް ދުވަހަށް ބާޒާރު ކޮށްލުމާ މިކަންކަން އެނގިގެން މިދަނީ. ދެން އެދާ ގޮތަށް ގޮސްފައި އަނެއްކާ ވެސް އަނެއް މަސް ނިމެންދެން ނާރާ މިއޮންނަނީ ޕްރައިވެޓް ސެކްޓަރ ނުހިނގާތީ. އަމިއްލަ ކުންފުނިތަކުގައި ވިސްނަވާލައްވާ އަޅުގަނޑުމެން އެންމެނަށް އެނގޭ ކަމެއް އަމިއްލަ ކުންފުނިތަކުގައި މުސާރަ ދެވޭނީ 5 ނުވަތަ 10 ހިސާބުގައި. އެގޮތަށް މުޅި އިގްތިސާދުގެ މުސާރަ މަސް ދުވަހުގެ ތެރެއަށް ބެހިގެން ނުވަތަ ދެތިން ހަފްތާއަށް ބެހިގެންދާއިރު، ވިކުރާ ވެސް އެގޮތަށް ފެންނަމުން ދިޔަ. އެހެންނަމަވެސް މިހާރު ބާޒާރުމަތީ ފިހާރާގެ ވިކުރާ މަހުގެ 5 އަކާ ހަމައަށް ހީވަނީ ހަމަ ވަޅިއަކުން ކަނޑާ ވައްޓާލާ އެއްޗެއްހެން. 

ޓޫރިޒަމް މިނިސްޓްރީގެ ކުރީގެ ސްޓޭޓް މިނިސްޓަރު އިބްރާހިމް ރަޝީދު 

ޕްރައިވެޓް ސެކްޓަރއަށް އަލިއަޅުއްވާލައްވާ އިބޫ ވިދާޅުވީ އެމްޑީޕީގެ ވެރިކަންތަކުގައި ވަރަށް ބޮޑު އެހީތެރިކަމެއް މިސެކްޓަރއަށް ދީފައިވާ ކަމަށާއި، ކުރިއަރުވާފައިވާ ކަމަށެވެ. އެއާއެކު ރައްޔިތުންނާއި ގައުމުގެ ހާލަތު އެއްކޮށް ރަނގަޅު ވެގެން ދިޔަ ކަމަށް އޭނާ ވިދާޅުވި އެވެ.

އިބޫ ވިދާޅުވީ ރާއްޖެއަށް ގެސްޓްހައުސް ވިޔަފާރި ގެނައީ އެމްޑީޕީން ކަމަށާއި، އެއީ ރަނގަޅު ސިޔާސަތަކާއެކު ކުރިއަށް ގެންދިޔަ ވިޔަފާރިއަކަށްވާތީ، އެކަމުގެ ނަތީޖާ ރަނގަޅު ކަމަށެވެ. ގެސްޓްހައުސް ތަކާއެކު ގިނަ ވަޒީފާތައް އުފެދިފައިވާ ކަމަށާއި، ދަތުރުފަތުރުގެ ނިޒާމު ވެސް ވަރަށް ބޮޑަށް ކުރިއަރާފައިވާ ކަމަށެވެ. ރަށްރަށަށް ފަތުރުވެރިން ދިއުމުގެ ސަބަބުން މިއަދު ފެރީތައް ދަތުރުނުކުރާ ރަށެއް މިރާއްޖޭގައި ނެތް ކަމަށް އޭނާ ވިދާޅުވި އެވެ. 

އިބޫ ވިދާޅުވީ އިގްތިސާދު ފުޅާ ކުރެވެނީ ސިޔާސަތެއްގެ ތެރެއިން ކަމަށާއި، މިސަރުކާރުގައި އެ ސިޔާސަތެއް ނެތް ކަމަށެވެ. އެހެންކަމުން މިއަދު  ޕްރައިވެޓް ސެކްޓަރ މުޅިން އެއްކޮށް ހަލާކުވާ މަންޒަރު ފެންނަ ކަމަށް އޭނާ ވިދާޅުވި އެވެ.

މީގެ އިތުރުން އިބޫ ވިދާޅުވީ ދައުލަތުގެ ކުންފުނިތަަކަށް ވައްދާ މުވައްޒަފުން އިތުރުވެ، ވަޒީފާ ނެތި ކޮފީތަކުގައި ތިބޭ މީހުން ގިނަވުމުން އިގްތިސާދާއި، އުފެއްދުންތެރިކަން ކުރިނާރާނެ ކަމަށެވެ.