މި ސަރުކާރުގެ ވިސްނުމަކީ ގަސްތުގައި ދިވެހި ރައްޔިތުން ފުނޑާލާ، އަޅުވެތިކޮށް ނިކަމެތި ކުރުން: ޔައުގޫބު
ޔައުގޫބު ވިދާޅުވީ ސަރުކާރުން އަމިއްލަ މީހުންގެ ވިޔަފާރިތަކަށް ވަދެ ހަލާކުކޮށްލާފައިވާ ކަމަށް. މިސާލެއްގެ ގޮތުން އައިނު ކުންފުންޏަކާއި ގެދޮރުވެރިޔާގެ ފްލެޓްތަކަށް ފަރުނީޗަރ ހެދުމަށް އެފްޑީސީން ވަތްތަން ފާހަގަކުރައްވައި އެފްޑީސީ ފަދަ ދައުލަތުގެ ބަޖެޓުން ހިންގާ ކުންފުންޏަކާ އާދައިގެ ވިޔަފާރިވެރިޔަކަށް ވާދަކުރަން ޖެހިފައިވާ ކަމަށް ވިދާޅުވި.
ދާންދޫ ދާއިރާގެ ކުރީގެ މެންބަރު ޔައުގޫބު އަބްދުﷲ | ރާއްޖެ އެމްވީ
މި ސަރުކާރުގެ ވިސްނުމަކީ ގަސްތުގައި ދިވެހި ރައްޔިތުން ފުނޑާލާ، އަޅުވެތިކޮށް، ނިކަމެތިކުރުން ކަމަށް ދާންދޫ ދާއިރާގެ ކުރީގެ މެންބަރު ޔައުގޫބު އަބްދުﷲ ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ޔައުގޫބު ވިދާޅުވީ ސަރުކާރުން އަމިއްލަ މީހުންގެ ވިޔަފާރިތަކަށް ވަދެ ވިޔަފާރިތައް ހަލާކުކޮށްލާފައިވާ ކަމަށެވެ. މިސާލެއްގެ ގޮތުގައި އައިނު ހެއްދުމުގެ މައްސަލައަށް އިޝާރާތް ކުރައްވާ ޔައުގޫބު ވިދާޅުވީ މީގެ ކުރިން ވެސް ނަންބަރު އައިނު ވިއްކަމުން ދިޔަ ކަމަށެވެ. އަދި ރާއްޖެއާއި ރާއްޖެއިން ބޭރުގެ މި ސަރަޙައްދުގައި ޤައުމުތަކުގައި ދެމުންދާ ސަރވިސް އެކޮލިޓީގައި ރާއްޖޭގައި އަމިއްލަ ވިޔަފާރިތަކުން އެކަން ކުރަމުން ދިޔަ ކަމަށެވެ. އަދި މިއަދު ވެސް އެކަން ކުރަމުން އަންނަނީ އެގޮތަށް ކަމަށް އޭނާ ވިދާޅުވި އެވެ.
ޔައުގޫބު ވިދާޅުވީ ކަން އެހެން އޮތްނަމަވެސް ފެންނަނީ، އައިނު ކުންފުންޏެއް ހަދާފައި ސަރުކާރުން އެ ވިޔަފާރިތެރިއަށް ވަތްތަން ކަމަށެވެ. ޓެކްސީގެ ހިދުމަތް ވެސް ސަރުކާރަކުން ދޭން ނުޖެހޭ ކަމަށާއި ޓެކްސީގެ ޚިދުމަތް މިއަށްވުރެ ރަނގަޅަށް ދޭންޖެހޭ އިރު، އެކަން ރަނގަޅުކުރެވޭނެ އެތައް ގޮތެއް އެބައޮތް ކަމަށެވެ. އެގޮތުން ޓެކްސީ ޑްރައިވަރުންނާއި ސަރުކާރާ ގުޅިގެން ކުރެވޭނެ ބައިވަރު ކަންތައްތައް އެބަހުރި ކަމަށް ޔައުގޫބު ވިދާޅުވި އެވެ.
ސަރުކާރަކުން ނުޖެހޭނެ އެ ވިޔަފާރި ތެރެއަށް ވަންނާކަށް. އަޅުގަނޑުމެން އެމް.ޑީ.ޕީގެ ފުރަތަމަ ސަރުކާރުގެ ސިޔާސަތުގެ ތެރެއިން އަޅުގަނޑުމެން އެންމެ ކާމިޔާބުކަމާއެކު މި ކުރަމުން އައި އެއްކަންތައް، ގެސްޓްހައުސް ވިޔަފާރި. އަޅުގަނޑުމެންނަށް ފެނިގެންދިޔައީ ކުންފުނިތައް، ބޮޑެތި ބިޔަ ކުންފުނިތަކާއި އަދި ސަރުކާރުގެ އެކި ސައިޒްތަކުގެ ކުންފުނިތަކުން ގެސްޓްހައުސްގެ ވިޔަފާރިތަކަށް ވަދެގެންދިޔަތަން. ހަމަ އެއާއެއްކޮށް، އޭގެއިތުރަށް އަޅުގަނޑަށް އިހަކަށްދުވަހު މި ފާހަގަވި ކަމަކީ، ގެދޮރުވެރިޔާގެ 4000 ފްލެޓް، ދެން އަޅުގަނޑު އެ 4000 ފްލެޓަށް ވަންނައިރު އަބަދުވެސް އެތަނަށް ބޭނުންވާ، ކޮންމެ މީހަކުވެސް އެބަ ބޭނުންވޭ އެ މީހަކު ވަކިގޮތަކަށް ބޭނުންވާ ވަކި ކަސްޓަމައިޒް މޮޑިފައިޑް އެއްޗެހިތަކެއް ހަދައިގެން އެ މީހަކު ހިތްހަމަޖެހޭ ފެންވަރަކަށް ހަދައިގެން އެތަނަށް ވަންނަން. ދެން އެ މަސައްކަތް ކުރާނެ ދިވެހިން އެބައުޅޭ. ދިވެހި ކުންފުނިތައް އެބައޮތް. ދިވެހި ވަކިވަކި ގުރޫޕުތައް އެބައުޅޭ. އެހެންނަމަވެސް، އަޅުގަނޑުމެން އިހަކަށްދުވަހު ފެނިގެންދިޔައީ ދައުލަތުގެ ބަޖެޓުން ފައިނޭންސްކުރާ އެފް.ޑީ.ސީން އިޢުލާނެއް ކޮށްފައި މި އޮންނަނީ ތިމަންނަމެން އަލަމާރި އެނދު އެއްޗެހި ޖަހައިދެމޭ، ފައިސާ ދައްކަން ވެސް އިންސްޓޯލްމަންޓަށް ދެއްކޭގޮތަށް.ދާންދޫ ދާއިރާގެ ކުރީގެ މެންބަރު ޔައުގޫބު
ޔައުގޫބު ވިދާޅުވީ އެފްޑީސީން މިކަން ކުރާ އިރު އެ ކުންފުންޏަކީ ދައުލަތުގެ ބަޖެޓުން މިލިއަނުން ޚަރަދުކުރާ ކުންފުންޏެއް ކަމަށެވެ. އަދި އެ މީހުންނަށް ފައިސާ ނެތިގެން ލާރި ނުލިބިގެން، ދަތިވެގެން އުޅޭކަށް ނުޖެހޭނެ ކަމަށާއި، އާދައިގެ ނިކަމެތި ވިޔަފާރިވެރިޔާ ވާދަކުރަންޖެހޭނީ ސަރުކާރުން ބަޖެޓް ދީގެން ހިންގާ ކުންފުންޏަކާ ކަމަށެވެ. ޔައުގޫބު ވިދާޅުވީ އެ މަސައްކަތް ކުރަމުންދިޔައީ އެތައް ބައެއްގެ ވިޔަފާރި، އެތައް ބައެއްގެ އާމްދަނީ، އެތައް ބައެއްގެ ވަޒީފާ މިކަމުގެ ސަބަބުން ގެއްލިގެންދާ ކަމަށެވެ.
އޭނާ ވިދާޅުވީ މިއީ ރައީސް މުޢިއްޒު ސިޔާސީ ބޭނުމަށްޓަކައި، މީހުން ނިކަމެތިކުރަންވެގެން، މީހުންގެ އަތްމަތި ދަތިކުރަންވެގެން ކުރަމުންދާ މަސައްކަތްތަކެއްގެ ތެރެއިން ކުރަމުން އަންނަ ކަމެއް ކަމަށެވެ.
ހަމައެއާއެކު، މިސާލަކަށް ބަލަމާހިނގާ ބޭންކް އޮފް މޯލްޑިވްސްއަކީ މުޅިން ފައިނޭންޝަލް އިންސްޓިޓިއުޝަނެއ. ދުވަހަކު ވެސް މި ރާއްޖޭގެ ތާރީޚުގައި ކީއްކުރަން، ޤައުމެއްގެ ތާރީޚުގައި ވެސް އެހެން އެކަހަލަ ކަންކަން ކުރާ ބައެއް ނޫން، ބޭންކްތަކަކީ، ފައިނޭންޝަލް އިންސްޓިޓިއުޝަނަކީ. އެކަމަކު އަޅުގަނޑުމެންނަށް މިއަދު ފެނިގެންދިޔައީ ބޭންކް އޮފް މޯލްޑިވްސްއަކީ ކޮންސްޓްރަކްޝަން ކޮމްޕެނީ، ރިއެލް އެސްޓޭޓް ކޮމްޕެނީ. ބޭންކް އޮފް މޯލްޑިވްސް، އެ މީހުންނާ ނުގުޅޭ އެތައް ކަމެއް، ބިން ހިއްކާ ކުންފުންޏަކަށް ބަދަލުވެގެންދިޔައީ. އެމް.އޭ.ސީ.އެލް މިވީ ފުޓްސަލް ދަނޑު އަޅާ ކުންފުންޏަކަށް. ރޯޑް ކޯޕަރޭޝަން މިވީ ހަމަ އެގޮތަށް. ހަމަ އެ މީހުންނަށް މުޅިން މެންޑޭޓުންވެސް ބޭރު ކަންކަން ކުރަމުންދާ ތަން މި ކުންފުނިތަކަށް ބަދަލުވެގެންދިޔައީ. އެއްވެސް ވަރެއްގެ އިންތިޒާމެއް ނެތި މުޅި ދައުލަތް، މުޅި ސަރުކާރު އޮޅުންބޮޅުންގަނޑެއްގެ ތެރެއަށް ވައްޓަމުންދާ ތަން މި ފެންނަނީ.ދާންދޫ ދާއިރާގެ ކުރީގެ މެންބަރު ޔައުގޫބު އަބްދުﷲ
ޔައުގޫބު ވިދާޅުވީ ރައީސް މުޢިއްޒު ވެރިކަމުގައި ބާކީ މި އޮތް 2 އަހަރަށް ބެހެއްޓުމަކީ ވެސް ދިވެހި ރައްޔިތުންނަށް އިޢާދަކުރަން ދަތިއުނދަގޫ ބޮޑެތި ގެއްލުންތަކެއް ވާނެ ދުވަސްތަކެއް ކަމަށެވެ. އެހެންކަމުން އޭގެ ކުރިއަށްވެސް މި ސަރުކާރު ބަދަލުކުރަން ރައްޔިތުން ނުކުންނަން ޖެހޭ ކަމަށެވެ.
