އެމެރިކާ އިން ވެނެޒުއޭލާގެ ތެޔޮ ރަސްމީކޮށް ވިއްކަން ފަށައިފި
ވިއްކި ތެލުގެ އަގު 500 މިލިއަން އެމެރިކާ ޑޮލަރަށް އަރާ.
ސާފު ނުކުރާ ތެޔޮ ބަރު ކޮށްފައިވާ ތެޔޮ ޓޭންކަރެއް ވެނެޒުއޭލާ ގައި ބަނދަރު ކޮށްފައި | ގެޓީ އިމޭޖަސް
އެމެރިކާ އިން ވެނެޒުއޭލާގެ ތެޔޮ ރަސްމީކޮށް ވިއްކަން ފަށައިފި އެވެ.
އެމެރިކާ ސަރުކާރުގެ އިސް އޮފިޝަލަކު ހާމަކުރެއްވި ގޮތުގައި، ވެނެޒުއޭލާގެ ތެލުގެ ފުރަތަމަ ޝިޕްމަންޓް މިހާރު ވަނީ ވިއްކާލާފަ އެވެ. މި ވިޔަފާރީގެ އަގު 500 މިލިއަން އެމެރިކާ ޑޮލަރަށް އަރަ އެވެ. ކުރިއަށް އޮތް ދުވަސްތަކާއި ހަފުތާތަކުގެ ތެރޭގައި އިތުރު ތެޔޮ ވިއްކުމަށް ހަމަޖެހިފައިވާ ކަމަށް ވެސް އެ އޮފިޝަލް ވިދާޅުވި އެވެ.
މި މަހުގެ ކުރީކޮޅު އެމެރިކާ އިން ވެނެޒުއޭލާ އަށް ހަމަލާދީ، އެ ގައުމުގެ ރައީސް ނިކޮލަސް މަދޫރޯ ހައްޔަރުކުރި ފަހުން، ވެނެޒުއޭލާގެ މުއްސަނދި ތެލުގެ ރިޒާވް ބޭނުންކުރުމަށް ރައީސް ޑޮނަލްޑް ޓްރަމްޕް ގެންގުޅުއްވާ ވިސްނުންފުޅު ވަނީ ވަރަށް ސާފުކޮށް ހާމަކުރައްވާފަ އެވެ.
ވެނެޒުއޭލާގެ ހަލާކުވެފައިވާ ހަކަތައިގެ ސިނާއަތް އަލުން އާރާސްތުކުރުމަށްޓަކައި، ތެޔޮ ކުންފުނިތަކުން މަދުވެގެން 100 ބިލިއަން ޑޮލަރު އިންވެސްޓްކުރާނެ ކަމަށް ޓްރަމްޕް މިދިޔަ ހުކުރު ދުވަހު ވިދާޅުވި އެވެ. ނަމަވެސް، މި އަދަދަކީ ކޮން އުސޫލަކުން ނިންމާފައިވާ އަދަދެއްކަން ސާފެއް ނުވެ އެވެ.
ވެނެޒުއޭލާގެ ތެލުން މަންފާ ހޯދުމަށް އެމެރިކާ ސަރުކާރުން ކުރަމުންދާ މަސައްކަތްތަކާ މެދު، އެމެރިކާގެ ބޮޑެތި ތެޔޮ ކުންފުނިތަކުގެ ވެރިން ވަނީ މިދިޔަ ހުކުރު ދުވަހު ވައިޓް ހައުސްގައި ބޭއްވި ބައްދަލުވުމުގައި ޝައްކު އުފައްދާފައެވެ. އެގްސޮން މޮބިލް ގެ ސީ.އީ.އޯ ޑެރަން ވުޑްސް ވިދާޅުވި ގޮތުގައި، ވެނެޒުއޭލާ ގައި ވިޔަފާރި ކުރުމަށް ގިނަ ހުރަސްތަކެއް އެބަހުއްޓެވެ. އަދި އެތަނުގައި އިންވެސްޓްކޮށްގެން ލިބޭނެ މަންފާ ދެނެގަތުމަށްޓަކައި ވެސް ގާނޫނީ އަދި ވިޔަފާރީގެ ވަރުގަދަ އޮނިގަނޑުތަކެއް ގާއިމުކުރަން ޖެހޭނެ ކަމަށް އޭނާ ފާހަގަކުރެއްވި އެވެ.
އެހެން ބައެއް ކުންފުނިތަކުގެ ވެރިން ވެސް ވަނީ ދާޚިލީ ހަމަނުޖެހުން ބޮޑު ވެނެޒުއޭލާ ގައި ވިޔަފާރިކުރުމަށް ފަސްޖެހޭކަން ހާމަކޮށްފަ އެވެ. ވައިޓް ހައުސް ގައި ބޭއްވި ދިގު ބައްދަލުވުމަކަށް ފަހު، އެ ގައުމުގައި ބިލިއަނުން އިންވެސްޓްކުރުމަށް އެއްވެސް ކުންފުންޏަކުން ރަސްމީކޮށް އެއްބަސްވެފައެއް ނުވެ އެވެ.
ތެލުގެ ފުރަތަމަ ވިޔަފާރިއާ ގުޅޭ ތަފުސީލުތައް ބުދަ ދުވަހާ ހަމައަށް މުޅިން ސާފުވެފައި ނުވި ނަމަވެސް، ވައިޓް ހައުސްގެ ތަރުޖަމާނު ޓޭލާ ރޮޖާސް ނެރުއްވި ބަޔާނެއްގައި ވިދާޅުވީ، ވެނެޒުއޭލާގެ ތެލުގެ އިންފްރާސްޓްރަކްޗާ އާރާސްތުކުރުމަށްޓަކައި މީގެ ކުރިން ނުކުރާ ފަދަ ބޮޑެތި އިންވެސްޓްމަންޓްތަކެއް ކުރުމަށް ތައްޔާރަށް ތިބި ކުންފުނިތަކާއެކު ޓްރަމްޕްގެ ޓީމުން އުންމީދީ މަޝްވަރާތަކެއް ކުރަމުންދާ ކަމަށެވެ.
ރޮއިޓާސް ނިއުސް އޭޖެންސީން ބުދަ ދުވަހު ރިޕޯޓްކޮށްފައިވާ ގޮތުގައި، ކެނެޑާ ފަދަ އެހެން ގައުމުތަކުގެ ތެލާ އަޅާބަލާއިރު، ވެނެޒުއޭލާގެ ސާފުނުކުރާ ތެޔޮ ވިޔަފާރިވެރިންނަށް ވިއްކަމުންދަނީ ވަރަށް ބޮޑު ޑިސްކައުންޓަކާ އެކުގަ އެވެ.
