ވައިޓް ހައުސްގެ ބައްދަލުވުމަށް ފަހު ގްރީންލޭންޑާއި ޑެންމާކުން ބުނަނީ ޓްރަމްޕް ހުންނެވީ އެ ސަރަހައްދު "ހިފަން" ނިންމަވައިގެން ކަމަށް

ވައިޓް ހައުސްގެ ބައްދަލުވުމަށް ފަހު ގްރީންލޭންޑާއި ޑެންމާކުން ބުނަނީ ޓްރަމްޕް އެ ސަރަހައްދު "ހިފަން" ނިންމަވައިގެން ހުންނެވި ކަމަށް ބުނެފި އެވެ.

ވޮޝިންގޓަނުގައި އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުގެ އިސްވެރިންނާ ބައްދަލުކުރެއްވުމަށް، ޑެންމާކާއި ގްރީންލޭންޑްގެ ޚާރިޖީ ވަޒީރުން އެމެރިކާ އަށް ވަނީ ދަތުރުފުޅެއް ކުރައްވައިފަ އެވެ.

ނަމަވެސް، ބުދަ ދުވަހު ބޭއްވުނު މި ބައްދަލުވުންތަކަށްފަހު އެނގިގެން ދިޔައީ، ޑެންމާކުގެ ބާރުގެ ދަށުގައި އޮންނަ އަމިއްލަ ދާޚިލީ މިނިވަންކަން ލިބިފައިވާ ގްރީންލޭންޑް ހޯދުމަށް ޓްރަމްޕް ކުރައްވާ މަސައްކަތްޕުޅު ހުއްޓުވުމުގައި އެއްވެސް ކުރިއެރުމެއް ލިބިފައިނުވާ ކަމެވެ.

ބައްދަލުވުމަށްފަހު ނޫސްވެރިންނާ ވާހަކަދައްކަވަމުން ޑެންމާކުގެ ޚާރިޖީ ވަޒީރު ލާސް ލޮކޭ ރަސްމުސެން ވިދާޅުވީ، އެމެރިކާގެ ވިސްނުން ބަދަލުކުރުމަށް ކުރި މަސައްކަތުން ނަތީޖާއެއް ނުފެނުނު ކަމަށެވެ. އަދި ރައީސް ޓްރަމްޕްގެ ބޭނުންފުޅަކީ ގްރީންލޭންޑްގެ މައްޗަށް ވެރިވެގަތުން ނުވަތަ އެ ބިން ހިފުން ކަމަށް ވަރަށް ސާފުވާ ކަމަށް އޭނާ ފާހަގަކުރެއްވި އެވެ.

ރަސްމުސެން އާއި ގްރީންލޭންޑްގެ ޚާރިޖީ ވަޒީރު ވިވިއަން މޮޓްޒްފެލްޑް، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އަދި ނައިބު ރައީސް ޖޭ.ޑީ ވޭންސްއާ ބައްދަލުކުރެއްވީ ގްރީންލޭންޑާ މެދު އުފެދިފައިވާ ނުތަނަވަސްކަމަށް ހައްލެއް ހޯދުމުގެ އުންމީދުގަ އެވެ.

ނަމަވެސް، މި ބައްދަލުވުމުގައި މައިގަނޑު ޚިޔާލުތަފާތުވުންތަކަށް އެދެވޭ ހައްލެއް ނުލިބުނެވެ. އޭގެ ބަދަލުގައި، ދެ ފަރާތުގެ އޮފިޝަލުން ނިންމެވީ ގްރީންލޭންޑްގެ ކޮންޓްރޯލާއި އާކްޓިކް ސަރަހައްދުގެ ސަލާމަތީ ކަންކަމާ ގުޅޭގޮތުން މަޝްވަރާކުރުމަށް "ވާކިންގ ގްރޫޕް" އެއް އެކުލަވާލުމަށެވެ.

ރަސްމުސެން ވިދާޅުވި ގޮތުގައި، މި ގްރޫޕުގެ މައިގަނޑު އަމާޒަކަށް ވާންޖެހޭނީ ޑެންމާކުގެ އިސްތިޤްލާލަށް އުނިކަން ނާންނާނެހެން، އެމެރިކާގެ ސަލާމަތީ ކަންބޮޑުވުންތަކަށް ހައްލެއް ހޯދުމެވެ.

ގްރީންލޭންޑްގެ ވަޒީރު މޮޓްޒްފެލްޑް ވިދާޅުވީ، އެމެރިކާއާ އެކު ގުޅިގެން މަސައްކަތް ކުރަން ބޭނުންވި ނަމަވެސް، އޭގެ މާނައަކީ ގްރީންލޭންޑަކީ އެމެރިކާގެ މިލްކަކަށް ވުން ނޫން ކަމަށެވެ. އެމެރިކާ ގައި ހުންނަ ގްރީންލޭންޑްގެ މަންދޫބުންގެ އޮފީހުން ވެސް ވަނީ އެ ގައުމުގެ އަސްލު ވަޒަންވެރިން ކަމަށްވާ "ކަލާލިޓް" މީހުންގެ ބަސް، ގްރީންލޭންޑާ ގުޅޭ ކޮންމެ ނިންމުމެއްގައި ވެސް ހިމަނަންޖެހޭނެ ކަމަށް ބުނެފަ އެވެ.

އާކްޓިކް ސަރަހައްދުގައި ރަޝިޔާ އާއި ޗައިނާގެ ނުފޫޒު ގަދަވަމުންދާތީ، އެމެރިކާ އާ އެކު ސަލާމަތީ ގޮތުން އިތުރަށް ގުޅުން ބަދަހިކުރަން ޔޫރަޕްގެ ގައުމުތަކުން ވަނީ ހުށަހަޅާފަ އެވެ. ނަމަވެސް، މި ހުށަހެޅުންތަކުން ވެސް ޓްރަމްޕްގެ ވިސްނުންފުޅަށް ބަދަލެއް ނައެވެ. އޭނާ އަދިވެސް ހުންނެވީ އެ ސަރަހައްދުގެ މިލްކުވެރިކަން ހޯއްދެވުމުގެ އަޒުމުގައެވެ.

ބުދަ ދުވަހު އޯވަލް އޮފީހުގައި ބޭއްވި ރަސްމިއްޔާތެއްގައި ޓްރަމްޕް ވަނީ، އެމެރިކާގެ ގައުމީ ސަލާމަތަށްޓަކައި ގްރީންލޭންޑްގެ މިލްކުވެރިކަން ބޭނުންވާ ކަމަށް ވިދާޅުވާ ވިދާޅުވުން ތަކުރާރު ކުރައްވާފަ އެވެ. އަދި ބޭރުގެ ހަމަލާއަކުން ދިފާއުވުމުގެ ގާބިލުކަން ޑެންމާކުގެ ކިބައިގައި ހުރިތޯ ވެސް އޭނާ ސުވާލު އުފެއްދެވި އެވެ.

"ރަޝިޔާ ނުވަތަ ޗައިނާ އިން ގްރީންލޭންޑަށް އަރައިގަންނަން ބޭނުންވެއްޖެ ނަމަ، އެކަން ހުއްޓުވަން ޑެންމާކަށް ކުރެވޭނެ އެއްވެސް ކަމެއް ނޯންނާނެ. އެކަމަކު އަހަރެމެންނަށް އެކަން ކުރެވޭނެ،" ޓްރަމްޕް ވިދާޅުވި އެވެ.

ނަމަވެސް، ޑެންމާކާ އެކު ބަދަހި ގުޅުމެއް އޮންނަ ކަމަށާއި، ބުދަ ދުވަހުގެ ބައްދަލުވުންތަކުގެ ތަފްސީލު ފަހުން އޮޅުންފިލުއްވާނެ ކަމަށް ވެސް ރައީސް ޓްރަމްޕް ވިދާޅުވި އެވެ.