އެމެރިކާ އިން މަސައްކަތް ކުރަނީ އަސްކަރީ ހަމަލާ ދޭން ބަހަނާ އެއް ހޯދުމަށް ކަމަށް އީރާނުން ބުނެފި

އެމެރިކާ އިން މަސައްކަތް ކުރަނީ އަސްކަރީ ހަމަލާ ދޭން ބަހަނާ އެއް ހޯދުމަށް ކަމަށް އީރާނުން ބުނެފި އެވެ.

އީރާނުގައި ކުރިއަށްދާ މުޒާހަރާތައް ހުއްޓުވުމަށް އެގައުމުގެ ސަރުކާރުން މަސައްކަތް ކުރަމުންދާ ދަނޑިވަޅެއްގައި، އެމެރިކާގެ ރައީސް ޑޮނަލްޑް ޓްރަމްޕް "ވަރުގަދަ ފިޔަވަޅުތަކެއް" އަޅާނެ ކަމުގެ އިންޒާރު ވަނީ ދެއްވާފަ އެވެ. އެއާ އެކު އަންގާރަ ދުވަހު އީރާނުން ބުނީ އެމެރިކާ އިން މަސައްކަތް ކުރަނީ އަސްކަރީ ގޮތުން ނުފޫޒު ފޯރުވުމަށް ބަހަނާއެއް ހޯދުމަށް ކަމަށެވެ.

އދ. ގައި ހުންނަ އީރާނުގެ މިޝަނުން 'އެކްސް' މެދުވެރިކޮށް ހާމަކޮށްފައިވާ ގޮތުގައި، އީރާނާމެދު އެމެރިކާ އިން ގެންގުޅޭ ސިޔާސަތުތަކަކީ ދަތިކުރުމުގެ ފިޔަވަޅުތަކާއި، ބިރުދެއްކުމާއި، އަދި ރޭވުންތެރިކަމާއެކު ހަމަނުޖެހުން އުފައްދައިގެން އެގައުމުގެ ވެރިކަން ބަދަލުކުރުމަށް ކުރާ މަސައްކަތްތަކެކެވެ. އަދި މިއީ އަސްކަރީ ގޮތުން އީރާނަށް އަތްގަދަ ކުރުމަށްޓަކައި އެމެރިކާ އިން ބޭނުންކުރާ އުކުޅެއް ކަމަށާއި، މި ރޭވުންތައް އަނެއްކާ ވެސް ނާކާމިޔާބުވާނެ ކަމަށް އެ މިޝަނުން ބުނެފައިވެ އެވެ.

ރައީސް ޑޮނަލްޑް ޓްރަމްޕް އަންގާރަ ދުވަހު ވިދާޅުވީ، އީރާނުގެ ސަރުކާރާ ދެކޮޅަށް ތެދުވި އާންމުން ހުއްޓުވުމަށްޓަކައި އެގައުމުގެ ކަމާބެހޭ ފަރާތްތަކުން މީހުން ދަންޖައްސަން ފަށައިފިނަމަ، އެމެރިކާ އިން އެކަމަށް ވަރަށް ވަރުގަދަ ރައްދެއް ދޭނެ ކަމަށެވެ.

ސީ.ބީ.އެސް ނިއުސް އަށް ދެއްވި އިންޓަވިއުއެއްގައި، ބުދަ ދުވަހު މީހުން ދަންޖައްސަން ފަށާފާނެ ކަމަށް ބުނެ ކުރެވުނު ސުވާލަކަށް ޖަވާބު ދެއްވަމުން ޓްރަމްޕް ވިދާޅުވީ، "އެފަދަ ކަމެއް ކޮށްފިނަމަ އެމެރިކާ އިން ވަރަށް ވަރުގަދަ ފިޔަވަޅުތަކެއް އަޅާނަން،" ކަމަށެވެ.

އޮންލައިންކޮށް އާންމުކޮށްފައިވާ ވީޑިއޯ ކްލިޕެއްގައި ޓްރަމްޕް އިތުރަށް ވިދާޅުވީ، "އެތައް ހާސް ބަޔަކު މަރަމުންދާއިރު، މިހާރު ތިޔަ ބުނަނީ ދަންޖައްސާ ވާހަކަ. އެކަން އެމީހުންނަށް ނިމިގެންދާ ގޮތް އަޅުގަނޑުމެން ބަލާނަން،" ކަމަށެވެ.

މި އިންޓަވިއު ދެއްވާފައި ވަނީ އެމެރިކާގެ މިޗިގަން ސްޓޭޓްގެ ކާރުޚާނާއަކަށް ޒިޔާރަތް ކުރައްވައި، އިގްތިސާދާ ބެހޭގޮތުން ތަގުރީރެއް ދެއްވުމަށް ވަޑައިގެން އުޅުއްވަމުންނެވެ.

އެ ތަގުރީރުގައި ޓްރަމްޕް ވަނީ މީގެ ކުރިން ސޯޝަލް މީޑިއާގައި ވިދާޅުވި ފަދައިން، އީރާނުގެ މުޒާހަރާ ކުރާ މީހުންނަށް "އެހީތެރިކަން ފޯރުކޮށްދޭނެ" ކަމަށް ވިދާޅުވާ ވާހަކަ ތަކުރާރު ކުރައްވާފަ އެވެ. މީގެ އިތުރުން، އީރާނުގައި ހިނގަމުންދާ ހަމަނުޖެހުންތަކުގައި މަރުވި މީހުންގެ ސީދާ އަދަދު ސާފުނުވާ ކަމަށްވެސް އޭނާ ވިދާޅުވި އެވެ.

ޓްރަމްޕް ވިދާޅުވީ، "އަޅުގަނޑަށް އެކި އަދަދުތައް އިވޭ. އެންމެ މީހަކު މަރުވުމަކީ ވެސް ބޮޑުވަރެއް. އެކަމަކު ބައެއް ފަހަރު އިވެނީ މަދު އަދަދުތަކެއް، އަދި އަނެއްބައި ފަހަރު އިވެނީ ވަރަށް ގިނަ އަދަދުތަކެއް،" ކަމަށެވެ.